إكتبيني في دفاترك عاشق

نظرية "القفة" .. والايد الواحدة

2011-06-01T13:28:00.000+04:30

عاجبني جدا الجو بتاع اليومين دول ... ناس نازلة الميدان .. وناس طالعة البرج .. وناس هتنام عالكنبة ... واللعبة شغالة

مرة الجيش والشعب ايد واحدة في ميدان التحرير....والسلفيين والكنيسة والازهر والنظام ايد واحدة في عدم الخروج على الحاكم.... الجيش والشرطة ايد واحدة قدام السفارة الاسرائيلية ... الجيش والشرطة والاخوان والسلفيين ايد واحدة قدام صناديق الاستفتاء ... اليراليين واليساريين والاعلاميين والبرادعي وعمر موسى ايد واحدة قالو لأ للاستفتاء .. والسعودية ومبارك واسرائل ايد واحدة ضدد محاكمة مبارك ... والاقباط والمسلمينايد واحدة ضدد الفتنة وضدد تخازل الجيش والشرطة في ردع الفتنة .... ومع الدعوة للموجة الثانية من ثورة الغضب المصرية ... السلفيين والاخوان ونجيب ساويرس ايد واحدة لدعم الجيش ودرء الفتنة بين الشعب والجيش

باختصار كدة نظرية الايد الواحدة لم تعد صالحة لتفسير الحالة التي تمر بالشارع المصري الآن .... ومن الواضح انه يجب علينا ايجاد نظرية جديدة تستطيع تفسير انتقال الايد الواحدة بشكل مستفز وغير مبرر بين طوائف الشعب وجماعاته .... أرى أنها نظرية "القفة" ... اي نعم القفة الواحدة

المثل المصري قديم ومتوارث " القفة أم ودنين يشيلوها اتنين" ومتى اجتمع ما بداخل القفة مع رغبات الاتنين تمتد الايدي لرفع القفة بمحتواها ... القفة بالتأكيد ودوما تحتوي على مصالح مشتركة للي شايلين القفة وبذلك يمكننا أن نستبدل شعار "ايد واحدة ايد واحدة" ... بشعار "قفة واحدة .. مصلحة واحدة" .... الاخوان المسلمين والسلفيين -بعدما كفرو بما آمنو به من قبل وأصبح لهم حزب سياسي تحت التأسيس- يرون أن القفة الآن تحتوي على انتخابات برلمانية سيكون لهم فيها نصيب الأسد وعدد لا بأس به من الممثلين في اللجنة التأسيسية للدستور

الاحزاب الليبرالية وجمعية التغيير وغالبية مرشحي الرئاسة لهم قفتهم التي تتمثل في محاولات مستميته فاشلة في التواجد في الشارع وبتأخير الانتخابات البرلمانية قد تكون لهم فرصة في التواجد ... ويا حبذا لو أمكن تشكيل مجلس رئاسي من مجموعتهم وتشكيل دستور جديد قبل البدء في اجراء اي عملية انتخابية

المجلس الأعمى للقوات المصلحة له قفته أيضا ... ليسو كلهم ملائكة .. وبالتأكيد ليسو شياطين .. لدى بعضهم بالتأكيد الرغبة في الاستمرار في الحكم بشكل أو آخر ... انا أحب جيش مصر .. خير أجناد الأرض ... لكن المجلس الأعمى ليس وحده الجيش

عند آخر الليل يمكنك أن تشاهد آخر عروض وصيحات الموضة الحديثة في أشكال وتنويعات القفف ... يأتي كل منهم ليعرض محتويات قفته ... من من يفضل منى الشاذلي وبأبأبتها المعهودة .. أو يسري فودة بروابط عنقه الانجليزية التقليدية ... أو ريم ماجد بتسريحات شعرها المستفزة وابتسامتها الصفراء

تختلف أشكال القفف في الشارع المصري .. وتختلف محتوياتها بين أغراض دائمة ومؤقته ..... لكن تظل القفة الأكبر .. قفة المواطن المصري البسيط .. قفة ممتلئة بالهموم والأمراض والفقر والجوع والظلم والقهر ... يحملها وحدة على عاتقه .. تجده على رؤوس الغيطان وبداخلها فحل بصل وحتة جبنة مالحة ... تجده بها أمام مستشفى الحميات بالمركز ينتظر دوره أمام الطبيب الذي لا يأتي .. أو يستجدي مدير الادارة ليستجيب لطلب نقل زوجته المدرسه من مدرسة السيدة خديجة بعزبة النخل الى مدرسة صفية زغلول بدار السلام حيث مقر سكنه ... قد يسافر نفس المواطن بقفته فوق رأسه الى دولة من دول الخليج يبحث عن لقمة عيش لحياة أفضل لاولاده ويرفض الكفيل اعطاءه إجازته السنوية وباقي أجرته فيسلمه لجماعة الأمر بالمنكر بدعوى عدم طهارة القفة ... قد يغرق بها في البحر المالح قبالة سواحل ايطاليا فتلتقط القفة اوروبية شقراء تتاجر بمحتوياتها ضدد مصلحة أصحاب القفة الأصليين ... رآه بعضهم وقد دهسته سيارة على الطريق السريع وفارق الحياة ... ولكن ولله الحمد القفة بمحتوياتها سليمة ميراثا لأبنائه القصر من بعده

أيها المعلنون عن بضاعتكم الفاسدة ........ قفتي أنا من غير ودان.

متلخبط غزله

2011-06-01T13:25:00.000+04:30

الخفاش .. او الوطواط .. كائن ليلي بيعيش في الضلمة .. بيعرف يطير ويتحرك ويتعامل .. لكن أول ما ينور النور بيصيبه حالة عمى أو زغللة .. ويبتدي يخبط في الحيط .. أو في الوطاويط اللي حواليه.

طوال السنوات الماضية تم وطوطوة المجتمع المصري وبدا حبسه داخل صناديق مغلقة اصابته بحالة من الوطوطة اللاشعورية ... لم يظهر في طوال الستين عاما الماضية مفكر مصري بارز وان كانت هناك بعض الاصوات المستنيرة القوية انكفئت هذه الاصوات على كتبها او صعدت لابراجها العاجية دون حدوث حالة تنوير للمجتمع تأخذ بيده ليعبر عن نفسه ويمارس الحياة الطبيعية ... الانسان المصري تحول الى كائن مستهلك شره ... يحدثك عن قزازة الزيت وكيلو السكر وباكو الشاي والموبايل ابو كاميرا .. لم نجد حياة عقلية للمجتمع ... برصد سريع لأهم القضايا التي ناقشها المجتمع في العشر سنوات الأخيرة كمثال .. لن نجد قضية واحدة لها علاقة بالمجتمع كعقل جمعي لأفرادة .. بل سنجدها كلها قضايا تعبر عن البطن الجمعي ... قضايا الأكل والشرب والجنس هي صاحبة السيادة

ثورة 25 يناير كانت الاضاءة الشديدة والمباشرة التي اضاءت المجتمع .. مجتمع الوطاويط ... الذي بدأ على الفور في التخبط ... تخبط بين الافراد .. وجماعات المصالح .... وتخبط بجدار البيت الواسع .. مصر ...حالة هروب جماعي من الضوء الشديد الكاشف والفاضح ايضا ... في أقل من أربعة أشهر تمت أحداث كثيرة .. فتن .. مصالحات .. صفقات .. توافقات ... لكن هل اعتدنا الضوء بعد؟للأسف بدأ المجتمع عملية تصفية حسابات واسعة .. بين الافراد والجماعات .. وبدأت عملية تقييم لكل جماعة أو مجموعة من قبل الآخرين بشكل هيستيري ... الكل يتهم الكل .. حتى بات المجتمع المصري كله متهم بالعمالة والخيانة لصالح طرف ما خارج مصر ...

ارجوك ابذل مجهودا بسيطا وقم بتوصيل خط أو خيط بين الاطراف التالية ... المجلس الأعلى - الحزب الوطني- الفلول - الشرطة - أمريكا - اسرائل - الاخوان - ايران - السعودية - السلفيين - الليبراليين - البرادعي - عمرو موسى - شباب ائتلاف الثورة - شرم الشيخ - طرة - الميدان

شبكة خيوط عنكبوتيه معقدة جدا .. سيزداد تعقيدها من شخص لآخر .. من مع من .. من ضدد من .. هل يمكننا أن نسترخي قليلا .. ونفكر جيدا في فك هذا الارتباط الجهنمي بين كل هذه الخيوط وتوضيح المسارات من أجل مصلحة البيت الكبير ... مصر

العطن في الوطن

2011-06-01T11:44:00.002+04:30

الثورة

كلمة رائعة ... تشعرك حين نطقها بالدف .. بالطاقة تدب في اوصالك. اليوم تم اختياره من قبل العديد من نشطاء التدوين والحقوقيين للكتابه عن انتهاكات الشرطة العسكرية .. او القوات المسلحة على العموم .. لكن السؤال الذي يملأ الفراغ في جمجمتي ، هل حقا قامت ثورة الشعب؟

________________________________________

بمراجعة سريعة لن الجأ فيها لكتب التاريخ لكن سوف الجأ لما علق بذهني عن ثورات مصر، كانت مصر تحكم بالمماليك وهم عسكر يتم شرائهم وبيعهم في سوق النخاسة مفوضين من قبل الدولة العثمانية للحكم .. بعد الحملة الفرنسية واحساس المصريين بالصدمة نتيجة عوامل كثيرة لا مجال لذكرها كلها لكن كان من أهمها مقتل شاب من الاسكندرية اسمه محمد كريم على يد مخبرين وظباط من أمن الدولة تابعين للحملة الفرنسية .... هنا قام المصريون بثورتهم الاولى ... وبمنتهى الطيبة اجتمع عمنا عمر مكرم قائد ائتلاف شباب الثورة في ذلك الحين .. مع قادة من الاحزاب الليرالية للبحث عن راعي لثورتهم الشعبية ، ووجدو ضالتهم في اللواء محمد علي باشا .. وسلموه ثورتهم كي يرعاها .. فقبض عليهم في ميدان التحرير وذهب بهم الى المحكمة العسكرية بالهايكستب ليحكم على عمر مكرم بالنفي اربع سنوات مع ايقاف التنفيذ.

استلم اللواء محمد علي باشا الحكم وحتى يستقر له الامر جمع كل المماليك وأعضاء ائتلاف الثورة والمشاركون في الحوار الوطني على مأدبة باللقلعة وأثناء خروجهم بلغ عنهم الأمن المركزي والشرطة العسكرية التي تعاملت معهم بقنابل الغاز والرصاص المطاطي على حد وصف سيادة اللواء محمد علي .. وقتلو جميعا الا واحد بالرصاص الحي حسب كل كتب التاريخ فيما سمي تاريخيا بمذبحة القلعة في سنة 1811 ميلادية منذ 200 سنة بالتمام والكمال.

استمر حكم سيادة اللواء 42 سنة ميلادية خلفه من بعدها أولادة وأحفادة الذين تخرجو من الكلية الحربية وكانو كلهم قادة الجيوش من بعده.

في سنة 1952 ونتيجة لزهق ظباط جيش مولانا القائد الأعلى فاروق ابن فؤاد ابن اسماعيل ابن ابراهيم ابن سيادة االوا محمد علي باشا قام مجموعة من هولاء الظباط بخلع مولانا الملك والاستيلاء على حكم البلاد وانتقلت البلاد من حكم جلالة الملك حفيد سيادة اللواء الى ظباط جيش جلالته من بكباشية واومباشية فيما عرف بثورة 23 يوليو او الانقلاب العسكري .. انقلاب البكباشي ضدد سيادة اللوا

مع الثورة دي كان فيها ناس مقهورة من جلالة اللوا الملك زي الاخوان المسلمين والاحزاب الليبرالية بررضه فقامت بمعاونة الظباط حتى تستقر البلاد .. ولما استقرت البلاد قام الظباط بحركة مقص رجل في ميدان آخر من ميادين مصر هو ميدان المنشية بالاسكندرية وتم القبض على الاخوان المسلمين والاحززاب الليبرالية وطلعو بيهم على الهايكستب ... للأسف ساعتها لم تكن هناك ريم ماجد ولا منى الشاذلي عشان يغطو الأحداث.

السادة الظباط سلمو الحكم من ظابط لظابط .. ظابط يوجهنا شرقا... وآخر يحملنا غربا ... وثالث يجسم على صدورنا عمرا .. لا شرق ولا غرب ولن يتزحزح ومتربع على كرسيه الناس زهقت من طولة الركنة فقامت الجموع وخلعته من كرسية بعد أن تعطن الكرسي .. وتعطن هو من فوقه .. وفاحت رائحة العطن في الوطن

بعدما تعبت الجموع الطيبة أرادت أن تستريح ومن أمام مسجد عمر مكرم .. ظل الجميع يبحث عن من يحمي الثورة حتى تعود الجماهير كي تستحم وتغير ملابسها وتقتات وتدفع العجلة للأمام وتشاهد حلقات يسري فودة عن ثورتهم فلم يجدو غير السيد عمر مكرم الذي شاركهم ثورة القاهرة الثالثة أيضا وهو يقف وسطهم فوق منصته ومن أمام مسجده الذي أشار لهم بان يسلموها لسيادة اللواء محمد علي .. فقالو له أن محمد علي قد مات بعد أصابه الجنون .. فقال لهم طيب روحو لعمو اللواء اللي واقف الناحية التانية ... فقالو له انه شهيد مصر عبدالمنعم رياض .. لم تجد الجماهير سوى أن تترك ثورتها لعمو اللوا اللي كان واقف على دبابته عند مدخل الميدان.

عندما أرادت الجماهير أن تعود لتستكمل ثورتها كان سيادة اللوا قد استعاد مكانته فالمخلوع لواء ايضا .. واللوا احق باللوا .. فقالهم يلا يا حبايبي من هنا .. أمكم في العش ولا طارت ... استدعى سيادة عمو اللوا حامي ثورة الشعب كتب التاريخ .. فاستخدم كل منتجات اللواءات السابقين .. الرصاص الحي ضدد أصحاب الثورة ... السجن لاحفاد الرجل الطيب عمر مكرم .. النفي لكل من خالفه الرأي .. لكن كل لواءات المماليك السابقين كانت لهم من المروءة ما يمنعهم عن النساء ... ستذكر كتب التاريخ يوما أن عمو اللوا حامي ثورة الشعب قد انتهك نساء الارض وقام بفضح استارهن واسرارهن وتعريتهن واغتصابهن في حادثة لم يسبقهم اليها أحد لا من السابقين ولا السافلين ولا الفاسقين.

عمو سيادة اللوا ..... اللهم افضح سترك

______________

عن قصة واقعية*

حدادا على خالد سعيد

2010-06-25T21:17:00.001+04:30

Mourning for Khalid Saeed

حداداً على خالد سعيد

مبروك عليك الجزمة......مبروك

2008-12-15T22:24:00.004+03:30

احنا معانا جزمة

مفيش في حياتنا ازمة

بمب ولب

2008-12-08T08:19:00.002+03:30

يااااه

ليا زمان ما كتبتش حاجة هنا

بس انهاردة العيد

وأنا لسه بعيد لوحدي

الحمد لله

العيد ده مختلف

محدش يسألني ليه

دي بس محاولة للتفاؤل

عيد مختلف

انا مبسوط

وفرحان

عشان ربنا جعله يوم عيد

فلازم نفرح

كل سنة وأنا طيب

والعيد الجاي

أكون فرحان أكتر وأكتر

رمضان كريم

2008-09-01T16:37:00.001+04:30

عاووووو

2008-04-25T19:01:00.001+04:30

وادي جزاة اللي ما يسمعش كلمة ماما تقولها

مبارك يستقبل نظيف

2008-04-18T02:42:00.001+04:30

الصفحة الأولى

44328

‏السنة 132-العدد

2008

ابريل

‏12 من ربيع الآخر 1429 هـ

الجمعة

مبــــــــارك يســـــــتقبل الدكتور أحمد نظيف


استقبل الرئيس حسني مبارك قبل ظهر أمس بمقر رئاسة الجمهورية بمصر الجديدة‏,‏ الدكتور أحمد نظيف رئيس مجلس الوزراء‏.

فما الذي حدث؟

2008-04-11T00:48:00.003+04:30

بصراحة ليا فترة مش قادر اكتب حاجة

نفسي مسدودة بعيد عنكم

انا ما ليش في السياسة والحوارات بتاعتها

بحب اكتب عن الدنيا الحلوة

وعن كوم الضبع بلدي

وحواديت الناس الطيبين

وكل ليلة احط راسي عالمخدة

وافتكر كلمة امي

تبات نار تصبح رماد

من كذا اسبوع مش عارف اكتب

انا هنا في الغربة

وكل اللي بسمعه عن البلد ان كيلو العدس بقى بعشرة جنية

والزيت بعششرة

والناس مش لاقية العيش

بتموت في الطوابير

والشقة بتاعتي واقفة عالسقف

بعد ما الحديد بقى بست الاف جنيه

عموما انا برضه مش جاي اكتب ولا اتكلم

انا جاي تشاركوني في قراءة المقال الجميلة دي

سيدي الرئيس

بقلم خيري رمضان ١٠/٤/٢٠٠٨

لا تصدق من يقول لك إن كل الذين خرجوا يوم ٦ أبريل «شوية» حرامية، وأن الشباب والفتيات المقبوض عليهم، مأجورون ومغرضون.. لا تصدقهم حين يقولون لك إنهم قلة ومندسة، وليسوا منا، وأنهم ما جاعوا وما غضبوا، وما أنّوا وما رفضوا، إلا لأنهم عصاة، مارقون.

سيدي الرئيس.. دعني أذكّر سيادتكم بنا، بهذا الشعب الذي تحمل الكثير.. لقد فرحت كثيرا بتوليك رئاسة الجمهورية منذ ٢٧ عاما.. فأنت من عائلة، تشبة عائلاتنا.. كافح والدك الشريف حتي يجعلك طيارا، وهذا الطيار شارك في نصرنا الكبير في أكتوبر، وأصبح رئيسنا منا، عاني مثلنا، أكل علي «الطبلية» مثلما أكلنا، ودبر حياته سنوات براتبه البسيط.. أحببناك لأنك تشبهنا ولن ترضي بظلمنا.. فما الذي حدث؟

تحملنا معك سنوات وسنوات، ننتظر الرخاء، حكومة خلف حكومة، والرخاء لا يأتي، «اشتدي يا أزمة كي تنفرجي»، لكن الأزمة اشتدت ولم تنفرج.. لم نغضب، وإن غضبنا لا ننفجر، كان رهاننا عليك كبيرا، لأننا لا نتخيل أنك ستترك أبناء طبقتك يضيعون، وأبناء شعبك يجوعون، ولكن ما حدث غير ذلك؟

من هم مثل والدك ووالدي ـ سيدي الرئيس ـ انهزموا، انكسروا، انبطحوا، هزمهم رغيف الخبز والفساد، عجزوا عن مواجهة أبنائهم فانتحروا، وانحرف الأبناء، فغضبوا من أوطانهم وغضبوا منك.

سيدي الرئيس.. لقد ابتعدت عنا، حملتنا مسؤولية كل ما يحدث، نحن سبب كل الأزمات، نأكل بإفراط، ننجب بلا تفكير، ننتقد بلا فهم، ولم تقل لنا، لماذا كل هذا الفساد في بر مصر.. لماذا يعيش الذين يحلبون هذا الوطن وينهبونه، يعيشون في رخاء، ويهربون في المساء؟ لماذا يموت الفقراء فقط حرقا في القطارات، أو غرقي في البحر، أو في طابور الخبز؟

سيدي الرئيس.. تأمل قليلا الإعلانات في الصحف والتليفزيون، ها هي منتجعات الصفوة، وقصور الساحل الشمالي والجنوبي، ما أحلي الحياة في «كومبوند».. الذين يبنون ويعلنون ويسكنون.. هم أنفسهم الذين يحكمون.. يحصلون علي الأراضي بلا ثمن ليبيعوها بالمليارات.. أما شعبك، فليستمر في العشوائيات، يعيش منفردا منبوذا، وإذا قدمت له الحكومة سكنا بعد أن تلقيه في الشوارع بالأعوام، شقة ٦٠ مترا بقرض من البنك، بالفوائد، ومن لم يدفع فليذهب إلي السجن، كله بالقانون، القانون الذي لا يري إلا الفقراء، ويغفل عمدا أو أمرا من سرقونا.

سيدي الرئيس.. إن من يحدثونك عنا ـ وأغلبهم أصدقاء أو من اختيار نجلك جمال ـ لا يعرفوننا، لم يجلسوا يوما مثلنا ومثلك علي «الطبلية».. يصافحوننا بالقفازات، يأكلون غير ما نأكل بالشوكة والسكين، ينامون علي ريش النعام، ويقضمون الوطن كل صباح، ثم يلعنوننا في المساء.

سيدي الرئيس.. أذكرك، في ١٨ و١٩ يناير، وصف الرئيس الراحل أنور السادات ما حدث بأنه انتفاضة حرامية، وفي عهدك قال القضاء إنها ثورة الجياع.. فدع الحقيقة تظهر في عهدك، ولا تستمع لكل من حولك، اسأل حسني مبارك، الطيار، المقاتل، الذي قبل يوما يد والده المكافح، هل هذا الشعب، الغاضب، الجائع، مجموعة لصوص مأجورين؟

سيدي الرئيس.. كثيرون ممن حولك، لا يريدون أن تري الحقيقة، وتعرف أنهم سر مأساة هذا الشعب، ولو طالوا لقبضوا علينا جميعا، وأودعونا في سجون مظلمة.. فاسمعنا قليلا: نحن نرفض الحرق والنهب، لكننا نريد أن نحيا ولا نهان، أن ينام أبناؤنا في أمان، ألا نخشي من سجن أو سجان.. لا نريد إلا عيشة كريمة، نأكل ونعمل وننام.. هل هذا كثير علينا؟!

سيدي الرئيس.. ترددت كثيرا قبل أن أكتب إليك، فمن حولك باطشون، لا يريدون أن يسمعوا إلا أصواتهم، ولكنها كلمة الحق، إن لم تخرج الآن الآن، فقل علي ضمائرنا السلام.. عد إلي شعبك، اسمعه، اربت علي كتفه.. فنحن نشعر باليتم والخوف!!

عاوج الطاقية

2008-03-14T06:33:00.002+03:30

يا واد يا حتة سكرة

يا ابو الطاقية مشجرة

عاوج الطاقية ورايح فين

والجلابية مزهرة

عفوا: أنا غير متعاطف مع غزة

2008-03-02T07:52:00.003+03:30

قاتل جدي في حروب النكبة

اتذكر حكاياته عن جوعه الشديد في الصحراء

وحبات التين التي لا مثيل لها

تلك التي كانو يقتاتون بها من الجوع

بينما نكبة ٌ تحل بنا.

جند والدي عام 65

سافر الى اليمن السعيد في سنوات المد الثوري

كان هناك يقاتل اعداء الثورة العربية حين سلبت سيناء

وفرشت على ارضها الملاءة الحمراء

كان يعلو جبال صعدة

او يفترش ميناء الحديدة

بينما نكسة ٌ تحل بنا.

لم يصبني الدور

حين كنا نصلي قضاء الحاجة

ان يعتقنا رب العالمين

من ان نصبح عساكر مراسلة

في الوطن الغائب.

سافرت بعيدا عن الوطن

حين كان يتقاتل أبناء الوطن

على دورهم في طابور العيش.

توفر لي قنوات النميمة والدعارة العقلية

جرعتي اليومية من الغم الوطني

اطفالٌ قتلى

وامهاتٌ ثكلى

وصواريخ القسام تدك ارض العدو

اي هراء

من قال ان القاء النفس في التهلكة بطولة

من قال ان القتال من خلف النساء والأطفال بطولة

من لم يقرأ أويفهم

"وأعدو"

لا يحدثني عن الجهاد في الاسلام

من لم يراجع غزوات النبي

وخطط القتال

لا يحدثني عن الجهاد.

ما يحدث الان في غزة

انتحار

ولا بلوم احدهم الا نفسه

من يرفضون الحديث عن اسرائيل

يحدثونا من ستين عام خلت

من زمان غير زماننا

من عالم غير عالمنا

اسرائيل الآن ملئ السمع والبصر

تتمدد سفاراتها العامرة

من الخليج الى المحيط

تمضغ افواهنا ليل نهار

"من بقلها وقثائها و فومها وعدسها و بصلها"

وتلعق السنتنا بقايا الكلام

"الى البحر سنلقي بها"

انا لا اتعاطف مع غزة

فلا وقت الأن للتعاطف مع المتغابين

والمتعامين

والصم الجاهلين

راجعو تاريخ الارض

واقرأو ذاكرة الحامض النووي لارض فلسطين

لن تجدوها يوما قد حررت على يد ساكنيها

دوما يأتيها المدد من الجنوب

"فَلَمَّا دَخَلُواْ عَلَيْهِ قَالُواْ يَا أَيُّهَا الْعَزِيزُ مَسَّنَا وَأَهْلَنَا الضُّرُّ وَجِئْنَا بِبِضَاعَةٍ مُّزْجَاةٍ فَأَوْفِ لَنَا الْكَيْلَ وَتَصَدَّقْ عَلَيْنَا إِنَّ اللّهَ يَجْزِي الْمُتَصَدِّقِين"

اسألو تحتمس الثالث

اسألو صلاح الدين

اسألو قطز

اسألو الناصر محمد بن قلاوون

سيقولون لكم انتظرو الأن

تعلمو الدرس

لن تجنو غير الدمار

لا يجب عليكم ان تتصدو للثور الهائج

حظكم عاثر يا سادة

ستحرقون وتقتلون

ولن يشعر بكم احد

فمن يلقي بنفسه الى التهلكة لا يلوم الا نفسه

انتظرو

فالجنوب قادم

فقط

سيدفع اقساط المحمول

ويحصل على بعض ارغفة الخبز المدعم

وزجاجة زيت طعام

وكيلو عدس مبشور

وينهي انتخابات المجالس المحلية

ويأتي لكم

حتى حينها

عذرا

انا لا اتعاطف معكم

فلا احد يتعاطف مع الاغبياء

او المتغابين

الى حضرة المهندز ابا الحاج احمد عز

2008-02-13T05:02:00.000+03:30

الدوحة في 14 فبراير 2008

الاستاذ المهندس احمد بك عز

ولي امري

وولي امر كل الشباب الطافشين من البلد امثالي

تحية اجلال ونعمات وفتحية وام الخير

عزي العزيز

اعرفك انه باعت لكم مع الواد سيد ابو حسين مبلغ وقدره ستة الاف جنيه مصري عدا ونقدا

وهي كل ما قدرت استحصل عليه يا ابا الحاج احمد خلال الفترة الماضية

وده عشان عايز ابتدي اصب سقف المطرح بتاعي

حكم يا ابا الحاج احمد انا ناوي ادلى اجوز عالصيف الجاي

واوعدك يا ابا الحاج احمد ان كل مدخراتي ومستحوشاتي هتكون عندك اول باول لغاية اما نخلص السقف

انت عارف البت خضرة بت عمي احمد ابو اسماعين بت دلعة ونغشة

وامها النبوية محمد المرسي مشترطة ان بتها تسكن تحت سقف بالمسلح

زي كل بنات البندر

المقصد يا ابا الحاج

عشان ما اطولش عليك

وانا عارف ان وراك لجنة سياسات

ومجلس

وبلاوي متلتلة

دا غير العروسة الجديدة - ربنا يجعلها قدم السعد عليك ونشوف الحديد لما يبقى بعشر تلاف قادر يا كريم

غايته يا ابا الحاج احمد

العيال العفشة هنا قالت عليك كلام مش ولا بد

قالو عنك انك قليل اصل وهتاكل عليا فلوسي

ومش هترضى تصبر عليا في تمن الحديد المسلح

قلت لهم انتو اللي واطين وقلالات اصل

محدش يعرف المهندس احمد قدي

دا عز

وابن عز

ولا تمكن ابدا يقصر معايا في موضوع سخصي زي دون

دا قليل ان ما حسب كلفة السقف كلاته نقوطي في فرحي على البت خضرة بت عمي الحاج احمد ابوسماعين وخالتي النبوية المرسي

مختصر القول يا ابا الحاج احمد

مرسل لكم مع الواد السيد ابو حسين

مبلغ الستلاف جنيه تحويشة الاربع شهور اللي فاتو

وموبايل اوكيا بالسماعة الجيليت بلو توخاصته

وريسيفر تيشيتال من ابو شفرة مفكوكة واللي بيجيب تركيا واسرائيل

ربنا ينصرك على كل اللي يعاديك

ولا يطمع فيك ملط ولا زلط

ولا يشمت فيك عدو ولا حبيب

ويخليك عزنا وعزوتنا

التوكيع

واحد من رعاياك المتغربين

هو ليه محدش اغتال صلاح الدين؟

2008-01-31T07:14:00.001+03:30

انا هنا مش بفرض رأي

ولكن عايز اتكلم مع حد

عايز حد يرد عليا

ممكن اكون صح

ممكن اكون غلط

هكون سعيد بكل الردود

باللي هيقول اني صح

واللي هيغلطني

بصراحة

انا بحس ان انور السادات

بالحرب اللي خاضها

وبالسلام اللي عمله

لا يقل عن صلاح الدين الايوبي

ان لم يكن يفوقه

عايز حد يراجع تاريخ الرجلين

بسرعة كدة

الاتنين وصلو للحكم بشكل غريب

تقدر تقول بالصدفة

الاتنين كانو تحت ظل رجل اقوى

اسد الدين شيريكوه وعبدالناصر

الاتنين اشتركو في النكسة

صلاح الدين انهزم جيشة في معركة الرملة

والمؤرخين وقتها سموها الكسرة

الاتنين رجعو من النكسة وعملو ثورة تصحيح

صلاح الدين رجع من الكسرة وابتدا الاصلاحات الداخلية

والحرب على تجار الحشيش والافيون

الاتنين دخلو حرب

ولكنهم ما حققوش نتيجة حقيقية غير بالصلح

الاول اسمه صلح الرملة

والتاني كان اسمه كامب ديفيد

الصلحين كان فييهم ترضية للطرف الاخر

وتقدر تقول ظلم لينا

صلاح الدين سمح للصليبين بأنهم يحكمو امارات الساحل

ويبرطعو فيها على راحتهم

وما اتحررتش الامارات دي غير على يد امراء لاحقين

من عينة الناصر محمد بن قلاوون

وبرضه صلاح الدين سمح للصليبين بزيارة القدس ودخولها

على الرغم من انهم قتلو كل من في المدينة وقت دخولها

ده غير البلاوي السودة بتاعتهم مع الحجاج في طريق الحج

وقتلهم وسلبهم

صلاح الدين من اصل كردي جاء الى مصر في ظروف غريبة

السادات شرب من نيلها

وياما غنى لها

وغنى عليها على رأي شيرين

صلاح الدين هو مقصد الخطباء والشعراء والدعاة

والسادات ايتها عيل بشخة يطلع يشتم فيه

صحيح

زمار البلد ما بيرقصشي

سر الخلطة

2008-01-28T05:42:00.000+03:30

*على مسرح الدفنة بشيراتون الدوحة

كان الصوت والاحساس المصري شرين

يطرب المستمعين

في واحدة من ليالي مهرجان الدوحة

الذي اطلق عليه هذا العام

الليلة الكبيرة

احتفاءا برموز الفن المصري

*على ملعب كوماسي بغانا

كان محمد زيدان يطلق كرة قوية نحو المرمى

محرزا هدفه الاول في البطوله الافريقية

وهدف مصر الثاني ضمن رباعية غير متوقعة

امام اسود الكاميرون

*على جانبي السور الحدودي

الفاصل بين قطاع غزة ومصر

كان اكثر من 700 الف فلسطيني يعبرون الى داخل مصر

للحصول على احتياجاتهم الاساسية

في حماية الامن المصري

******************************

*في لحظات قدرية

كانت مصر دوما في صدارة الاخبار

دون ان يعرف كائنا من كان

عن سر الخلطة

اللهم اغفر له وارحمه

2008-01-24T05:50:00.000+03:30

خارجا من احدى روايات
باولو كويليو
يحدثك عن فلسفة الشرق
ورقصة الصوفية
في حلقات الذكر.

مر عامان على رحيله

الحاج "حسن فندي"

عمي حسن

مازلت اتحين العودة الى
"كوم الضبع"
كي التقيه على دكته الخشبية.

هل سيمن الزمان علي بمثلها؟!

اللهم اغفر له وارحمه

مدونات قديمة للبيع

2008-01-16T06:55:00.000+03:30

لسه هبتدي انام
بحكم اني كائن ليلي طوال العام المنصرم
لقيت ابو ندى داخل يصبح عليا
ابو ندى ده عرفني بنفسه
تاجر مدونات
ايوا
بيشتري مدونات قديمة
الروبابكيا يعني
طب ايه المطلوب
قال ايه
عايز ياخد مني الباس وورد واليوزر نيم
ويديني بدل منه موقع على النت
ابوشنب دوت كوم
قال لي ان فيه 680مدون باعو خلاص
بصراحة العرض كان مغري
وعنيا زغللت
وكنت هنسحب من كي بوردي واضحي باعز ما املك
اللي همه باس ووردي ويوزر نايمي
بس بصراحة انا خفت اسيبهم
والجو اليومين دوول برد
وامشي زلبوط في الشارع
كانت هتبقى مشكلة والله
طلبت منه بيانات اكتر
قال لي انه في الاردن
ودي شركة جديدة
ليها فرع في امريكا
وفرع في الاردن
وهتشتغل من اول مارس
http://www.bloggersreview.com/
واللي فوق ده الموقع بتاعها
انا بصراحه الدم الصعيدي غللي في عروقي
وقلت لا يسلم التدوين من الاذى
حتى اعرف مين همه ال 680 اللي باعو
ام هند في الموضوع
انا قلت للراجل ان ليا شركا في المدونة
وان المدونة دي اتحاد ملاك
ومقدرش اعمل حاجة
ولا اتصرف فيها
غير بعد ما اشور اتحاد الملاك
اخيرا
شركاءي الاعزاء في المدونة
ايه رأيكم
نتمم البيعة
ولا عندكم رأي تاني
عيزين تبيعو قول بيع
بيع يا لطفي
قصدي يا ابوشنب
ابو ندى تليفوناته عندي
ايميله عندي
والوسطاء يمتنعون

******************************
تحديث
ده جزء من الحوار اللي تم بيني وبين ابوندا

ضاعت البيعة يا جدعااااااان

***********************

تاجر المدونات: مرحبا كيفك استاذي

تاجر المدونات: ؟

ابوشنب: عال والله

تاجر المدونات: تمام

ابوشنب: ايه الاخبار معك

تاجر المدونات: بس حبيت اسلم عليك

ابوشنب: الله يسلمك

تاجر المدونات: تمام الحمد لله

ابوشنب: العدد زاد؟

تاجر المدونات: الحمد لله

ابوشنب: ولا لسه ما فيش زباين

تاجر المدونات: لا الحمد لله ما هو مش بس انا بشتغل في معاي 5 شباب وصبايا بساعدوني

ابوشنب: ممتاز

استأذنك؟

تاجر المدونات: الله معاك

ابوشنب: ارقام الموبايل راحت مني

تاجر المدونات: اسف للازعاج

ابوشنب: ممكن تعيدها لي

تاجر المدونات: أكيد

تاجر المدونات: 00962xxxxxxxxx

تاجر المدونات: xxxxxxxx

تاجر المدونات: 00962xxxxxxxxx

ابوشنب: على فكرة انت بعد ما خرجت كان ليا صديق عرضت عليه الفكرة ورحب جدا

تاجر المدونات: ممتاز كتير

ابوشنب: بس هو كان بيقول مش ممكن يكون مقابلها مادي فلوس يعني

تاجر المدونات: مدونته قديمه

ابوشنب: هو مش عايز موقع بيقول انه زهق من النت

اها

تاجر المدونات: مدونته قديمة ؟

ابوشنب: من بداية 95

تاجر المدونات: والله

ابوشنب: ابريل 95

تاجر المدونات: ممكن عنوانها

ابوشنب: طب اعرف بس الاول هو ممكن ياخد مقابلها فلوس يعني

تاجر المدونات: حسب المدونة

ابوشنب: هو عموما البيانات بتاعتها معايا

تاجر المدونات: اذا كانت تستوفي الشروط اللي عنا

ابوشنب: وهو مفوضني لو حب يبيعها

ابوشنب: الشروط اللي هيه ايه؟؟

تاجر المدونات: اعطيني عنوانها خليا اشوفها بس

ابوشنب: ليه يعني هتعاينها ههههههههه

تاجر المدونات: ههههههههههه

ابوشنب: طيب لو انا حبيت ابيع مدونتي بمقابل مادي ينفع ولا لأ؟

تاجر المدونات: ينفع ونص

ابوشنب: يعني تجيب كام

تاجر المدونات: ايوه

ابوشنب: انا بدون من نوفمبر 95

تاجر المدونات: عمر المدونه واحد من الشروط مش كلها انت عايز كم فيها ؟

ابوشنب: والله انت تقول كام انا معرفش اقدر

تاجر المدونات: انا ما بدي احكيلك سعر أبخسلك فيها بعدين الله بحاسبني انت البائع احكي

ابوشنب: اديني راوند فيجر

تاجر المدونات: round figure?

ابوشنب: ايون

تاجر المدونات: aboshanab.blogspot.com

تاجر المدونات: مزبوط ؟

ابوشنب: ايوه

تاجر المدونات: ثواني

تاجر المدونات: انت صرت كاتب عني يا رجل

ابوشنب: اها

تاجر المدونات: ما شاء الله عليك

ابوشنب: انا قلت لك هسأل الشركا اللي معي ومنهم اللي ما اعرفش اتصل بيه

تاجر المدونات: بس الشركاء ما حدش منهم راضي

ابوشنب: فنزلت بوست عشان يقولو رأيهم

ابوشنب: لا دول اتنين بس اللي مش راضيين لسه ناس كتير هتقول بيع خاصة لو فيه فلوس

ابوشنب: اه

تاجر المدونات: اها

ابوشنب: تجيب كام معاك

تاجر المدونات: والله ما بقدر احكيلك سعر انت احكي

تاجر المدونات: على فكرة لحد الان ما في حد طلب منا فلوس الكل طلب عنوان على الانترنت وموقع

ابوشنب: اكيد مش مصريين ههههههههه

تاجر المدونات: عشان هيك انا متحير معاك على كل حال فكر بالموضوع وانا تحت أمرك

ابوشنب: عموما ادرس المدونة

تاجر المدونات: انت مش راح تخسر حاجه

ابوشنب: وشوفها تجيب كام

تاجر المدونات: انت راح تبتدي مدونه جديده

ابوشنب: وانا كمان ممكن اجيب لك حبايبي كتير

ابوشنب: اكيد

تاجر المدونات: وعنوان مدونتك الجديده راح على المدونه القديمة مدة سنه

ابوشنب: مدونة جديدة بشخصية جديدة وشكل جديد

تاجر المدونات: أكيد والتجديد بفيد ما بيضر

تاجر المدونات: اعطيني السعر اللي في بالك وانا تحت أمرك

تاجر المدونات: ومتل ما حكوها

ابوشنب: الواحد احيانا بيتسجن جوه القالب اللي عمله لنفسه

تاجر المدونات: بين الشاري والبايع يفتح الله

ابوشنب: المدونة اللي بتضحك لازم تضحك واللي بتتكلم في السياسة سياسه عايز اجدد

تاجر المدونات: مزبوط والله بس جدد بطريقه صح

ابوشنب: ولا مش عارف؟!

حاجة اول مرة تتمن بفلوس

ابوشنب: صح ازاي ليك وجهة نظر يعني؟

تاجر المدونات: ما فهمت عليك والله اسف

ابوشنب: اجدد بطريقه صح ازاي يعني؟؟

تاجر المدونات: فكر خليها ليك تفكر فيها

ابوشنب: هل لك رؤية

تاجر المدونات: لا والله

ابوشنب: طيب ايه عيوب المدونة الحالية

تاجر المدونات: ما فيها عيوب .......... العفو منك مش القصد

ابوشنب: لا والله انا ممكن اعمل مدون جديدة وبعد كام سنة ابيعها برضه لو جابت مقابل كويس فعايز حاجة تجيب تمن كويس ساعتها

تاجر المدونات: العملية مش بالسهوله اللي انتي متصورها انت كم زائر بيدخل على مدونتك يوميا

ابوشنب: لا قليل لأني ما ليش في الفرقعة

تاجر المدونات: يعني ؟

ابوشنب: اربعة خمسة بالكتير ومش كلهم بيسيبو تعليقات طبعا

تاجر المدونات: طيب هادا من أهم اللاشياء اللي بنزل سعر المدونه كمان. انت كم موضوع بتكتب يوميا ؟

ابوشنب: موضوع بالاسبوع بالشهر

تاجر المدونات: مممممممممممممم اها

تاجر المدونات: بتعرف تكتب انجليزي كويس ؟

ابوشنب: الحمد لله

تاجر المدونات: so u dont mind to let me write in english ... right ?

ابوشنب: ok

تاجر المدونات: great sir

first your blog is the minimal status to meet our standards

this offer will not be available in 48 hours

i am really sorry

if you are intrested

let me know as soon as possiple

possible؟؟

ابوشنب: ya

: but i don't speak about my blog only

: i have another

: and i have my close friends blogs also

: which have a very good numbers of reader

تاجر المدونات: aha

: what are the URLs

: ?

ابوشنب: like Shokir, Bonduk, Smsma

: and i can speak in their tongues

تاجر المدونات: great

: good

: listen my friend

: as i told you before .. we are a new company . and we are looking for good blogs

: so

: would you please tell me the price in your mind ?

: to tell you if we can continue or not

: i dont want to waste your time or my time

ابوشنب: ok for my blog 1000 buck

تاجر المدونات: 1000$

ابوشنب: ya

تاجر المدونات: ?

تاجر المدونات: oooh ok thank you for your time

: very much

: c u soon

ابوشنب: ok

تاجر المدونات: take care my friend

: bye

ابوشنب: bye

وطن

2008-01-05T02:19:00.000+03:30

وحشتني بجد
انا اللي عمري ما اخدت لبالي من تغير ارقام السنين على سبورة الفصل
البت دي وحشتني في ليلة راس السنة
واتمنيت اكون ساعتها في مصر
كنت هاخدها وننزل نتمشى في الشارع
واعزمها على الكفته اللي بتحبها
ومش بعيد كنا دخلنا سينما
مش عارف كنا هندخل اي فيلم
لان انا وهيا
بنحب افلام احمد حلمي
وهو ما منزلش حاجة في الفترة دي
وحشتني لدرجة اني رجعت من الشغل ادور على صورتها معايا في الشنطة
للاسف صورة واحدة ليها معايا
انا غبي بجد
ليه ما اخدتش صور تانيه ليها وانا راجع
وحشتني قوي
لما تيجي تقول لي
انت طيب قوي يا محمد
من يومين
اكتشفت انها تشبه ممثلة
شفتها في مسلسل مع نور الشريف وعبلة كامل
عرفت ان اسمها ياسمين جيلاني
بس برضه ما لقتش صور لياسمين
بخطط من دلوقتي
لما انزل الاجازة هعمل ايه
هشتري كاميرا مخصوص عشان اصورها صور كتير
ممكن نروح دريم بارك
واكيد احمد حلمي هيكون منزل فيلم ساعتها
ونروحه في سينما اوديون
ونطلع نجري من الشارع اللي ورا لغاية محطة المترو
وناكل كفته عند صبحي في جسر السويس
وناخد الكنبة اللي ورا في الميكروباص لوحدنا
عشان تعرف تنام كويس
اول مرة ندخل سينما سوا
ساعتها الفلوس اللي معايا كانت خلاص
فاطريت اني اخد من الفلوس بتاعتها
عشرة جنيه
ولغاية دلوقتي بتقول ان ليها عليا عشرة جنيه
مع اني دفعتها مية مرة

ليلة راس السنة
ومع اول لحظة من عمر السنة الجديدة
مسكت التليفون
وكلمتها
قلت لها
انتي اكتر حاجة وحشاني في الدنيا يا علا
ربنا يفرح الايام بيكي

****************************

تحديث

ردا على جميع الاعزاء اللي علقو
وكل قراء المدونة
بنشر صورة علا
صاحبة احلى ابتسامة في الدنيا
الصورة مسحوبة سكانر
وظالمة علا كتير
علا احلى من كل التصاويير

وائل عباس

2007-12-28T05:31:00.000+03:30

ايا كان
متفق مع اللي بيكتبه او لا
وبعد ما اتفرجت على الكمين بتاع المحور
بقوله
انا معاك
وعلى رأي اللي كانو بيتصلو
انا ما ليش حد في الشرطة

انتي اشتغلي ايه؟؟

2007-12-26T07:08:00.000+03:30

واحد راكب - شيبشبوشي خضراء انين سلندر جير مو 2008 لأعلى سعر

*************************
بعض المواضيع الناشفة اللي فاتت
قلت ادخل امسي عالحبايب
بحكم مولدي في قرية في اقصى جنوب مصر
كان ليا احتكاك بالوسائل البدائية لوسائل النقل
فاكر واحنا صغيرين
كنا بنلعب بالجديان والمعيز في الشوارع
كان كل واحد مننا يمسك له جدي او معزة
ويتخيل انها حصان عربي اصيل
وكنا نعمل بيها سبق
بينا وبين بعض
افتكر ان اخويا الكبير وقع من على جدي من دول ودراعه انكسر
لما كبرنا شوية
ابتدينا ندور على الحمير والجحوش الصغيرة
اللي لسه مولودة
ومحدش روضها
ونتسابق بيها برضة
المرة دي انا اللي كنت راكب ورا اخويا الكبير ووقعنا على الارض
وانكسرت ايدي الشمال
افتكر ساعتها محدش كان بيهتم انه يروح لدكتور
فأمي شالتني
وطلعت بيا على واحدة ست مجبراتيه
ربطت لي دراعي
ولفته في قماش
وانا بصرخ من الالم
ومع الوقت
دراعي ابتدى يلتئم
ولكن بشكل مش مظبوط
واصبح عندي الكوع ضارب شمال
ومنظرة لا يمت بصلة لايدي اليمين
اخدت فترة اخاف من ركوب الحمير
الى ان ظهرت وظيفة حيوية للموضوع
وهو انه احيانا كتير بيكون ابويا وعمي في الزرع
وعايزين حد يودي لهم الغدا
والمسافة بعيدة على اني امشي
ده بالاضافة الي مشوار الطاحون في قرية مجاورة
المهم ابتدو يعلموني ازاي استقر لوحدي على ظهر الحمارة
وبعد محاولات مستمرة
ابتديت اوزن نفسي
عمي كان يقول عليا مخنطل
يعني حاجة كدة زي خايب
المهم اتعلمت ركوب الحمير
وكنت اروح اودي الغدا والطحين واجيب البرسيم من الزرع
مكنش عندنا حصان او جمل عشان اتعلم ركوبهم
لكن الجمل ركبته مرات كتير
خاصة ايام الحصاد واحنا بنجيب القمح للجرن
بصراحة ركوبه ممتع
والحركة بتاعته بتجبر جسمك على الترنح بشكل لذيذ
واحساسك انك مرتفع
حاجة لذيذة
ده غير ركوب الجاموسة واحنا راجعين من المرعى
او وهيا نازلة الترعة

مع دخولي المدرسة الاعدادية
ابتديت اتعلم ركوب العجلة
عشان اروح المدرسة
كنت اروح اخد العجلة بتاعة اخويا من وراه
واتعلم عليها
المهم
افتكر اني كنت بروح المدرسة الثانوي بالعجلة
كانت مدرستي في المركز
والمسافة حوالي خمسة كيلو بين البلد والمركز
رايح جاي كل يوم
كانت بتبقى لذيذة في الشتا
الواحد جسمه كان بيدفا من الحركة
كان اخر ما احتجت ان اتعلمه هو سواقة العجلة
العربيات مكنتش متاحة بالنسبة ليا
ومكنش من احلامي العاجلة انه يكون معايا عربية
او اني اتعلم سواقتها حتى
كانت المواصلات العامة كفاية
الميكروباص
او الاتوبيس
او المترو
او التاكسي
غالبا كنت بركب جنب السواق
وهو المكان المفضل لدي
لما جيت الخليج
اتصدمت انه ما فيش مواصلات عامة
والتاكسي حاجة نادرة وغالي
والشركة اللي بشتغل فيها بتوفر عربيات للمهندسين
اول ما وصلت سألوني عن رخصة السواقة بتاعتي
عشان يدوني عربية
وللأسف كان ردي
انا ما بعرفش اسوق
تن تا تا
تررم تررم

المهم الناس تفضلو وجابو لي عربية بسواق
توصلني وتقعد معايا طول ما انا في الشغل
وسيدا يا بيشنو
بنط يا بيشنو
ريورس يا بيشنو
ومن بيشنو لتوماس لأحمد لنيلسون لتولاسي لابو المعاطي لسنتا لسواق يشيلني وسواق ينزلني
وقررت اتعلم السواقة
كانت المدرسة بتاعة السواقة زحمة جدا
تقدم اوراقك
وتنتظر تلات شهور
وبعدها تبتدي الدروس
ولمدة خمسة وعشرين يوم
رايح جاي
والمعلم بتاع السواقة حاجة اعوذ بالله
دايما كنت بفتكر عمي
لما كان يقول لي
انت مخنطل
يحرق المحاريق
(يعني بيشتم سلسفين اهلي اللي همة اهله برضه))
المهم
بعد تلات شهور
دخلت اول امتحان وسقطت
وتاني امتحان وبعدها جبت الرخصة
ومع اول يوم انزل الشارع بالعربية
وانا بركن
يا دوب لمست ساي ياره بتاعة واحد
اتصل بالشرطة
وسين وجيم
يلا
اول فـقـشة للغراب
وابتديت رحلة السواقة في الشارع
والشركة خصصت لي عربية
وطبعا كنت فرحان بيها
لغاية ما اكتشفت الحقيقة المرة
انا الاول كنت شغال مهندس
لكن دلوقتي
انتي اشتغلي ايه؟؟؟؟
اول مشكلة
اني متعود اركب جنب السواق طول عمري
ولتلاتين سنة فاتو
ولغاية دلوقتي يا حضرات
كل ما اروح اطلع بالعربية
اركب جنب السواق
وبعد شوية اكتشف انه ما فيش سواق
فأقوم
والف الناحية التانية
المنظر بيبقى مسخرة لو معايا حد
واقوله تعالى اوصلك
فاقوم راكب جنب السواق
والاقيه قاعد يبص لي
لما اكتشف ان شكلي وحش
افتح التابلوه واعمل نفسي بدور على حاجة
والف اقعد مكان السواق
امبارح العربية كانت بتطلع صهد
بقول لواحد العربية بتسخن جامد
سألني
انت غيرت لها الميه
ميه
هيه العربية بيتحط لها ميه
انا اعرف انها بنزين وزيت بس
لكن ميه!!!!!!!
المهم
اكتشفت اني من شهر كامل ما زودتش العربية نقطة ميه
انهاردة الباص بتاع الشباب اللي شغالين معايا كان عطلان
فاخدتهم معايا
ولفيت اوصلهم واحد واحد
وانتي اشتغلي ايه؟؟؟

كله كوم
والنضافة بتاعة العربية كوم تاني
خاصة الموقع عندي كله تراب وغبار
وانزل انضف اخر الشغل
وانتي اشتغلي ايه؟؟؟؟

كل يوم وانا راجع من الشغل
بترحم على اتوبيس 46
عتبة مساكن حلمية
اللي كنت باخده من قدام الكلية
وانام احلى نومة في حياتي على الكنبة الورانية
لغاية اما يصحيني الكمساري
انزل يا استاذ
احنا وصلنا

مسحوق الشعب

2007-12-14T06:33:00.000+03:30

لسه معاكم بقلب في صفحات الكتاب الموسوعي شخصية مصر للدكتور جمال حمدان

حد بيقولي طب ما الكلام ده كله معروف

ماشي

لكن التوثيق البحثي لكلام زي ده

من حد زي جمال حمدان

اللي ما فيش اتنين في مصر يختلفو على ان كتابه شخصية مصر – دراسة في عبقرية المكان يعتبر عمل موسوعي بيناقش كل تفاصيل مصر جغرافيا وتاريخيا برضه

الجزء الرابع من الكتاب يعتبر لسه حي وفعال معانا

لأن الاجزاء الاولى منه فيها عدد من الاحصائيات كانت وقتها حديثة

لكنها دلوقتي بقت جزء من التاريخ برضه

النسخة اللي اتحصلت عليها معمول لها مراجعة من الكاتب سنة 1984

يعني بيتكلم عن بدايات عصر مبارك

عشان محدش يتخيل ان الكلام ده من التاريخ القديم

والجزء ده بالذات ركز فيه على مصر الحديثة والمستقبل

هنقل سطور من الكتاب

إن قضية إعادة بناء الانسان المصري لا تعدو ببساطة ان تكون إعادة بناء الديموقراطية ، أو بالأصح إعادة إيجاد الديموقراطية التي لم توجد قط في مصر ، وذلك حتى تكفل العزة والكرامة والسيادة للإنسان الفرد المصري الذي لم يشعر بآدميته الحقة طوال التاريخ وحتى اللحظة ، بل كان التاريخ الفردي الشخصي والجمعي هو اهدار تلك الكرامة وسلبها ونفيها

****************************

إن معظم سلبيات وعيوب الشخصية المصرية إنما يعود أساسا وفي الدرجة الالى الى القهر السياسي الذي تعرضت له ببشاعة وشناعة طوال التاريخ

هذه ، ولا سواها

نقطة الابتداء والانتهاء

مثلما هي نقطة الاتفاق والالتقاء

: السلطة الحكم والنظام

: الطغيان الاستبداد والديكتاتورية

: البطش التعذيب والتنكيل

: الارهاب الترويع والتخويف

تلك هي الآفة الأم وأم المأساة ومن هنا يجمع الكل على ان النغمة الاساسية او اللحن الخلفي المستمر وراء الشخصية المصرية في علاقتها بالسلطة ومفتاح هذه العلاقة التعسة هي العداء المتبادل والريبة المتبادلة هي الحب المفقود والبغض الموجود بلا حدود

************************

على انه من الطريف كما هو من المفيد ان ان نحاول حصر اهم الصفات والسمات والخصائص والمقومات التي وردت والحقت والصقت بالشخصية المصرية

فئات متقاربة كما يمكن ان تتناقض او تتضارب ، دعك الأن من كونها مزايا او عيوبا او إيجابيات او سلبيات أو أسباب او غير ذلك

المرح والصفاء وعند ابن خلدون الفرح والخفة والغفلة

روح الفكاهة والنكته واسخرية

الميل للحزن

الانبساطية التي لا تميل الى الفردية

البساطة والتعاون

حب الاسرة والأسلاف

التدين والنزعة الروحية والنزوع الديني

الغيبيات

التواكلية او الاتكالية

الرضا دون دونية القناعة

الطاعة التي لا تدعو الى التمرد والثورة ولكن دون غضاضة

الدعة والوداعة

الصبر

السلبية والاستعداد للسلبية وغلو السلبية وسيادة السلبية دون ذل او استكانة مع ذلك

كثرة الخضوع والشعور بالتبعية

اللامبالاة

القهر وكف العدوان

المحسوبية والمحاباة

النفاق

وعند المقريزي الدعة والجبن وسرعة الخوف والنميمة والسعي الى السلطان

****************

فإذا ما عجز عن تغيير الواقع فإنه في العادة او النهاية يخضع له ويرضخ للأمر الواقع إلا انه حينئذ قد يسخر منه للتعويض او التنفيس

من هنا تأتي شهرته الداوية في السخرية التعويضية

والتعويض بالتعريض بالواقع دون التعرض له

وهو بدوره التناقض الخفيف الذي افضى به في نظر البعض الى الشخصية الفهلوية التي تعوض عن عجزها العملي بالتذاكي المفرط واصطناع اللامبالاة او ادعاء العلم والتخفي وراء العقل والتعقل

والنموذج المثالي في ذلك هو علاقة الفلاح المصري بلاسلطة والحكومة فهو يكرهها ويخشاها منذ قال الجبرتي

والمصري يكره الحكام في كل صورة حتى ادناها

********************

وإذا كان النظام الحاكم يباهي دائما بما يسميه "الاستقرار" في المجتمع المصري لا سيما في مقابل عدم الاستقرار في معظم الدول العربية الشقيقة الا أن الحقيقة والواقع أن ذلك انما هو استقرار الجسد الميت والجثة الهامدة وإذا كان صحيحا أن بعض الدول في المنطقة تعاني فعلا عدم الاستقرار فإن ما تعاني منه مصر حقيقة هو فرط الاستقرار

*******************

السؤال ببساطة هو : هل تغيرت مصر المعاصرة عن مصر الحديثة والحديثة عن القديمة في قضية التركيب الاجتماعي السياسي ونظام الحكم والسلطة والى أي حد؟

التغير الجوهري في الشكل اما الجوهر فلم يكد يتغير

التغير الوحيد هو الشكل

ملكية او جمهورية

وراثية او انتخابية

مدنية او عسكرية ذلك بحسب الظرف او العصر

فقديما كان الفلاحون "عبيد فرعون" ثم " عبيد السلطان" وحديثا فإذا لم نكن صرنا حقا او نوعا "عبيدالرئيس" فنحن يقينا ما زلنا بين فراعنة وفلاحين ورعايا لا مواطنين ومازال الاستقطاب الجوهري هو بين الحاكم والمحكوم وتلك في كلمة واحدة هي " الفرعونية الجديدة"

*************************************

على اية حال فإن الحكومة فوق الامة والحكومة تعتبر نفسها وصيا قيما على الشعب القاصر فاقد الاهلية او الذي لم يبلغ سن الرشد بعد وفي المحصلة المباشرة نجد ان الحكومة جهاز ساحق والمجتمع شعب مسحوق والمواطن مسحوق شعب وفي المحصلة النهائية نعود مرة اخرى واخيرة وبمزيد من الأسف لنجد مصر السياسية او الدستورية او النيابية هي حاكمها او تكاد

****************

فإالى أن تتحقق الديموقراطية الحقيقة في مصر وبدايتها هي الحكم المدني ونهايتها أن تقول للحاكم كلا ، فلن تتغير الشخصية المصرية المطحونة المغلوبة على أمرها ، المسحوقة المنسحقة ، ولن تتخلص وتتطهر من سلبياتها ومثالبها المكتسبة أو الموروثة ، وما يقال عن بناء الانسان المصري إنما يكون ببناء الديموقراطية وليس غير

إعادة بناء الشخصية القومية معناها الوحيد والمرادف هو إعادة الديموقراطية

*******************

لقد افسدت الاستمرارية السياسية ، استمرارية الفرعونية ، ما اصلح انقطاع الحضارة الحديثة

ذلك أن مرض مصر المزمن في الحاضر والموروث من الماضي هو حاكمها ونظامها ، نظام الحكم بإختصار. فلقد تغيرت مصرفي كل شيئ تقريبا إلا شيئا واحدا وهو النظام السياسي ، هو وحدة الذي لم يتغير هو وحدة الذي يقاوم بضراوة ودموية كل تغيير ، يجمد الشخصية ويحنطها فرعونيا

*******************

وفي وجه هذه الحالة المرضية المركبة ، فليس أمام مصر سوى إحدى إثنتين

: إما أن تموت بالتسمم البطئ الذي سرى واستشرى من قبل في جسدها

وإما أن تعيش بفصد الدم الفاسد المسمم

اما انت تنحدر مصر بهدوء وبطء بهوان وهيونى ، الى مالا نهاية وإلى ما دون الحضيض

وإما ان تنفجر على نفسها داخليا وخارجيا في نوبة قوى عظمى تجدد شبابها وتستعيد كرامتها وتحل أزمتها التاريخية

أمام مصر بإختصار خياران لا ثالث لهما

الانحدار التاريخي

او الثورة التاريخية

فإما أن تغير نظامها وحياتها وتثور على نفسها ثورة نفسية وعملية وإما فإن امامها 100 سنة اخرى ( مضى منهم 23سنة يعني باقي 77) على الاقل من الانحدار التاريخي المتسارع تتخبط فيها وتترنح ما بين الانقلاب والانقلاب المضاد

***************

بعد ما خلص كلام الكتاب والمقتطفات دي كلها

احب اقول اني مصري مية بالمية

قلبا وقالبا

نفتخر في الصعيد بإنتمائنا للقبائل العربية

بينما تتشابه تقاسيم وجهي مع رسومات المعابد الفرعونية التي لا تبعد عن قريتي كثيرا

اتربيت على كل الموروث الشعبي للطاعة والامتثال

مين خاف سلم

وإن فاتك الميري اتمرغ في ترابه

والباب اللي يجي منه الريح

واللي مالوش كبير بيشتري

ليس لي علاقة بالحكومة تماما

غالبا ما نطلق على الشرطة كلمة الحكومة

فمثلا اذا تم القبض على احدهم

يبقى الحكومة اخدته

وليس لي علاقة بالحكومة كمؤسسة ايضا

بإستثناء قزازتين الزيت واربعة كيلو السكر اللي بنصرفهم من عند الريس بتاع التموين

الريس ده مالوش علاقة بالسياسة ولكن ده اللقب بتاع عم رفعت بتاع التموين

واللي كنت ببقى فرحان قوي لما اقوله انا اللي هوقع باسمي اني استلمت التموين بتاعنا لما كنت في الابتدائي

اتعلمت في مدرسة تم بناءها بالجهود الذاتيه حتى الانتهاء من التعليم الابتدائي

ثم مدرسة معونة امريكية في الاعدادية

ومدرسة جهود ذاتيه في الثانوية

وتعاملت مع الوحدة الصحية المبنيه برضه بالجهود الذاتية

محدش من اهلي كان موظف في الحكومة

ولغاية دلوقتي

ليس من بين اخواتي ولا اخواتي موظف بالحكومة

بس برضه من خاف سلم

وابعد عن الشر وغني له

لسه في البيت في البلد

عندي ملصق ضخم للرئيس مبارك على حيطة المندرة

وهو بيشاور بايديه لجموع الشعب

بعد محاولة اغتياله في اديس اباب

بصراحة ما عنديش أي مشكلة معاه ولا مع حد من حكومته

انا متجاهلهم تماما

وبصراحة همه برضه

يعني صباح الخير يا حاكم انت في حالك وانا في حالي

أقصى علاقة ليا بالشرطة لما طلعت البطاقة

وبعد كدة وانا مسافر في قطر الصعيد خاصة ايام الحوادث الارهابية

انهم كانو بيسألوني عن بطاقتي الشخصية

غالبا واكتر من مرة

مكنش بيبص فيها

وبيرجعها لي تاني

فاكر في مرة واحد مسكها بالمقلوب

وبعد كدة سألني اسمك ايه؟؟؟

المهم كانو ناس ذوق دايما معايا

سنة 2004

وتقريبا كان في نفس توقيت معرض الكتاب

كانت فيه مظاهرات في البلد

لما نزلت التحرير

كان مكتوب على الاسفلت بخط كبييييييييير

لا للتمديد لا للتوريث

ومنها ظهرت دعاوى كتيييير

وحركات

وغيرو الدستور

وانتخبو الرئيس

ودلوقتي فيه تاس بتقول لا للتمديد برضه

المهم

العالم اللي عمالين يعملو مظاهرات ويتنططو في الشوارع

مش عارف همة عايزين ايه

الريس

ربنا يديله طولة العمر ويبارك لنا في صحته

بيحكمنا من ستة وعشرين سنة

وعمره تمانين سنة

وكل قوانين الطبيعة بتقول انه اكيد اكيد

عمره ما هيستمر في الحكم كمان قد اللي فات

يعني اكيد هيكون فيه رئيس جديد للبلاد

ممكن على اقصى تقدير خلال عشر سنين جايين

ممكن يكون ابنه جمال

ممكن يكون حد غيره

بعد ما خلصت كتاب جمال حمدان

وقعدت مع نفسي شوية

سألت نفسي سؤال

همه عايزين ايه من الرئيس اللي جاي

طب همه هيبطلو ينافقوه

طب هنودي النفاق بتاع البلد فين

طب هنودي تمام يا فندم

وكله بفضل معاليك اللي متشونه جوه مخازن الوطن فين

طب هو فيه حد يقدر يقول للأعور انت اعور في عينك

ولا للعريان فين توبك

ولا بس متشطرين على الراجل دلوقتي عشان حاسين انه خلاص

كلها كام سنة وهيلم العدة ويشيل الفرشة بتاعته

فبيجاملو المعلم الجديد من دلوقتي

يلا

كل ريس وانتم طيبين

الحثالة الحاكمة

2007-12-11T02:47:00.000+03:30

الصفحتين دول من كتاب شخصية مصر للدكتور جمال حمدان

الجزء ده من الكتاب فيه كلام لازم كل واحد مننا يقراه الايام دي

عشان نعرف احنا رايحين على فين

**************************
إضافة

الكتاب صدر حوالي سنة 1985
عشان الناس ما تتخيلش انه بيتكلم عن العصور القديمة
لا ده بيتكلم هنا عن العصر الجمهوري
شكرا

يعقوبيان - شيكاجو روايات الوجوه المربدة

2007-11-29T03:37:00.001+03:30

من فترة وانا بقاوم نفسي اني اكتب عن روايات الاسواني
اخيرا انتهيت من شيكاجو وقبلها يعقوبيان
وبصراحة حتى الان لا اعلم سر هذا الدوي لكلا الروايتين
هبتدي اسرد الملاحظات بتاعتي
في كلا الروايتين هنلاحظ تعدد الشخصيات
وانه مفيش بطل حقيقي للرواية
حتى لو حبينا نوزن كل شخصية من حيث الاحداث
هنلاقي انهم تقريبا متساويين
مع فروق طفيفة
يعني البطولة الجماعية للرواية
وجعل البطل هو المبنى في يعقوبيان
والمدينة في شيكاجو
عشان كدة ما قدرتش اتوحد مع اي بطل من ابطال الرواية
وكانو كلهم بدءا من زكي الدسوقي – يعقوبيان
وصولا لطارق حسسيب – شيكاجو
بعاد عني بمسافة جعلتني لا اتعاطف مع اي منهم
ووقفت منهم وقف المتفرج فحسب
******
البطل الحقيقي للروايتين تقريبا كان الريس
ايوه
تقريبا الكلام عنه كان في الروايتين بشكل مكثف
والمشاهد بتاعته كانت محور في الرواية
وتقريبا كانت هيه نقطة التنوير
مع الحاج في يعقوبيان
ومع صلاح في شيكاجو
*********
اللغة في الروايتين ليست بالقوة اللي تجعل اي قارئ للرواية العربية
يقول ان ايا منهم قيمة حقيقة في الادب العربي
في كلا الروايتين مثلا
اربدت جميع الوجوه
اربد وجهه
اربد وجهها
واربد من الغضب
والشهوة
والسعادة
وكان نفسي حد يقولي ايه اربد دي مش لاقي
وكل ما اسئل واحد من اللي قرو الرواية ومعجبين بيها
اكتشف انه لا عارف معنى اربد
ولا لاحظ تكرارها في الروايتين
ده غير الفاظ زي
المربربتين والمكلبظتين
وكأننا تجار فراخ بيضة
*************
الروايتين كانو اقرب للسيناريو منهم للرواية
يعني هنلاحظ تكثيف الوصف الحركي للابطال
ولم ينقصهم عن السيناريو غير ترقيم المشاهد
وليل خارجي
ونهار داخلي
****************
على الرغم من كدة فيه مشاهد كانت واقعة بشدة
يعني تاخد صفر من عشرة
افتكر من شيكاجو دلوقتي
مشهد شيماء محمدي وهيا واقفة قدام مبنى الطلبة بعد الحريقة
وطارق بيسألها انت مصرية
بتقوله ايوه
يرد عليها يقولها انت هنا في شيكاجو مش في طنطا
مع انها ما قالتش انها من طنطا
ولا كانت شايلة في ايدها حمص وحلاوة
دي يا دوب بتقوله انها مصرية
********
تاني مشهد من شيكاجو
وده بصراحة اللي حسيته كوميدي
وقعدت اضحك عليه
مصور الرئيس لما بيطلب منه يتحرك يمين شوية
عشان بره الكادر
وبعدين الريس بص للسقف
علامة انه متضايق
(افتكرت الراجل التخين في فيلم المنسي لما كرم مطاوع كان بيقول انه لو بص في السقف يبقى متضايق)
طب بالعقل يا جماعة
لو هنتصور مع الرئيس
او المدير
او الوزير
او اي حد مهم
معقول هنخليه واقف على جنب يعني
اكيد هيقف في النص
واحنا حواليه
طب ازاي هيكون بره الكادر
حد يفهمني طيب
عموما واضح ان العلاقات الجميلة
والود الصافي بين الاسواني وسيادة الريس
هيا اللي وقعت له المشهد ده
*************
حد هيقولي بس الرواية نجحت نجاح مبهر
انا في رأئيي ان الرواية نجحت بسبب حالة الانحدار العام في المستوى اللي في البلد
يعني لو جرنان طلع يشتم في الريس والحكومة
الناس كلها بتقول ادي الكلام
ادي الصحافة
ادي الجرأة
دون النظر لحقيقة الكلام الوارد
نفس الحال بالنسبة للرواية
اللي اكتسبت نجاحها من حالة الاحتقان اللي في البلد بحالها
****************
تاني نقطة في نجاح الرواية
هو قراء الرواية في حد ذاتهم
يعني غالبية قراء الرواية
هما الجيل اللي اتربى على رجل المستحيل
والشياطين ال13
والعميل رقم صفر
والمغامرون الخمسه
الحدوته الشيقة جدا
واللي تخليك تمسك الواحدة منهم وما تقومش غير لما تخلصها
نفس الجيل ده كبر شوية
والحاج نبيل فاروق ربنا يدي له الصحة
الجيل ده بقى هو نفسه اللي لقى في الروايتين نفس طعم رجل المستحيل
بس على مقاس رجالي
*************
اراهن اي حد بيقرا الكلام ده
يقول لي انه قرا الرواية على اكتر من مره
يعني كان يقرا فصل فصل
غالبا كل اللي عرفتهم اجمعو على انهم خلصو الرواية في قعدة واحدة
واراهن اي حد تاني يقول لي انه قرا الرواية مرتين على بعض
عشان حس فيها بمعنى او قيمة حب يأكد عليها
واللي يكسب الرهان له عندي جايزة سمينة
**************
المشاهد الجنسية اللي في الروايتين كانو فوق العادة
مفيش واحدة مثلا في شيكاجو دخلت من باب الرواية
الا وطلعت وهيا متظبطة بصراحة
انا هنا مش بعترض ان الادب يتعرض للجنس
عادي ده محرك قوي لحياة الانسان
والقرآن الكريم جاءت فيه سورة يوسف
وكان الجنس موجود بقوة في احداث القصص الكريم
ولكن انا بتكلم عن التفصيل الدقيق لكثير من المشاهد
ده باولو كوهيليو كان ارحم في احداشر دقيقة
وكان الجنس عنده هو اساس الرواية
وحتى مشاهد المتعة كانت لها فلسفة قوية جدا
اما هنا
فالليلة ضلمة بصراحة
**********
في النهاية
ده بعض من كل
واحب احيي الدكتور علاء الاسواني على الروايتين
ومنتظر الرواية اللي جاية
وادينا بتنسلى
********
اعلم ان البعض اربدت وجوههم اثناء القراءة
لذا لا بأس بقليل من المسقعة الاسكندراني من يد الدكتورة شيماء
حتى تتوهج فيهم نار الشهوة
وانزل باعلان بلدنا بتتقدم بينا يا عباس

تالتة/اول

2007-11-27T06:31:00.000+03:30

من سنتين بالتمام والكمال
كنت قاعد عاطل بعيد عنكم في البيت
مفيش لا شغلة ولا مشغلة
محبط بشكل ما اتعرضتش له قبل كدة
وانا بقلب في النت لقيت قصة او موضوع
مفهمتش ولا استوعبتش الشكل من اول لحظة
كان في مدونة مع نفسي
ومنها
ابتديت ادخل في مدونة
اطلع من مدونة
كان ايامها الواحد يقدر يقرا المدونات كلها في وقت قصير
قبل ما الدنيا تتزحم
وشوية شوية
عرفت اعمل مدونة خاصة بيا
في لحظات الاحباط دي
كان اول كلمة قدرت اكتبها
وحسيت بيها اول ما بقى لي مدونة
أخيراُ أقدر أعلى صوتي وأصرخ (أنا حــــــــــــــــــــــــــــــــــررررررر)
ومنها ابتديت ادون اودون
لغاية اللحظة دي
58 بوست
حوالي 450تعليق
400 بس لو شلنا منهم ردودي والتعليقات الدعائية
عدد لا بئس به من الاصدقاء من خلال المدونة
احمد شقير
احمد شلبي
البراء اشرف
وقدر واسع من الحرية
التدوينة الاشهر كانت
المحطة الاخيرة لعم حسن
وده عشان عم حسن
مش عشاني
كان بيقولي
زمان الناس كانت تقول فلان بيعرف يقرا ويكتب
على اللي بيفك الخط
دلوقتي
اللي بيكتب هو الكاتب اللي بيعمل كتاب
او يكتب في جرنان
والغريبة ان البوست بتاعه
اختارته جريدة الدستور
عشان ينزل في احد اعدادها
اللي انا ما شفتوش عشان كنت بره مصر
ساعات كتير كنت بكسل اكتب حاجة
بس عمري ما فكرت انزل بوست اقول فيه اني هقفل المدونة
قال يعني هيكل
التدوين عندي ابسط
دي حالة مزاجية
نوع من المتعة
اللي ما عدناش نلاقيها في حاجات كتير حوالينا
رقص مع الروح
في ساحة من الخيال
اكتب
حتى استنزفني لأخر حرف
وبعدها
استقبل الدنيا
***************
اليوم
هو تالته اول بالنسبة لي
اول يوم في السنة التالتة تدوين
بدأت الكتابة
ب
أخيراُ أقدر أعلى صوتي وأصرخ (أنا حــــــــــــــــــــــــــــــــــررررررر)0
ومازلت

الشارع والشباك

2007-11-25T04:09:00.000+03:30

كنت في مصر بتابع القنوات الاخبارية زيي زي غيري
الجزيرة ومن بعدها العربية وغيرها
طبعا الاعلام عندنا كان كل شوية والتانية بيقود حملة على القنوات دي خصوصا الجزيرة اللي كانت بتناقش قضايا مصر الداخلية بشكل مفصل بيوصل لدرجة خناقات الجيران على لعب العيال في الشارع
لغاية اما كتب لي القدر ان اشتغل في قطر وعلى بعد امتار من مقر الجزيرة
في الاول
اول ما جيت كنت محمل بالفكرة المسبقة عن النبي العربي المكون من تلات حروف ولو شلت منه نقطه يبقى اسم دولة عربية وكل الدعاية دي
لكن بعد شوية اكتشفت حاجات جديدة
انا ما بفهمش في السياسة قوي بصراحة ومبحبهاش

انا بتكلم عن البشر
اكتشفت ان الناس هنا مؤدبين بشكل عمري ما كنت اتخيله
لدرجة ان الواحد بيتكسف يتعامل معاهم
لانهم بصراحة احيانا بيحسسوك انك انت صاحب البلد وهمة ضيوف
ده اول اكتشاف
تاني حاجة كانت متابعتي لقناة الجزيرة والتلفزيون القطري والاختلاف الفظيع بينهم ده غير الهجوم اللي بيكون كل فترة والتانية في بعض الصحف على الجزيرة
واخيرا كان اكتشافي لنظرية الشارع والشباك
النظرية بمنتهى البساطة
دايما الناس في بيوتها بتتفرج على احداث الشارع من خلال الشباك
خناقة في الشارع
فرح في الشارع
تحرش جنسي في الشارع
معاكسة
مظاهرة
كل احداث الشارع
هنا ونتيجة الحر الشديد اغلب اوقات السنة
محدش بيفتح الشباك خالص
وغالبا برضه محدش من اهالي البلد بتلاقيه في الشارع
الشارع غالبيته مغتربين فلبيني هندي سيري لانكي
تشكيله من اجناس الارض
اهل لبلد غالبا ممكن بينزلو الشارع
او يفتحو الشباك عشان يتفرجو على الشارع لما بيكونو في اجازة في مصر
لانهم هنا حتى لو فتحو الشباك مفيش احداث تذكر بتحصل فيه
الشارع هنا بيمارس وظيفته الاوليه وهي انك تتحرك فيه من مكان لمكان
وغالبا جوه عربيتك المكيفه اللي برضه نادرا ما بتفتح شباكها الا لو وقفت قدام مطعم او محل عشان يجي العامل الهندي يوصلك طلباتك

وعشان كدة في خيالهم وعقيدتهم ان الشارع موجود في مصر
بمعنى اصح الشارع اللي ممكن يكون حيوي وحي وممكن تفتح الشباك وتتفرج منه على الاحداث موجود في مصر
علم المنطق بيقول
المصري عربي
السعودي عربي
القطري عربي
المصريين موجودين في الشارع في مصر
والسعوديين موجودين في الشارع في مصر
والقطريين موجودين في الشارع في مصر
العرب موجودين في الشارع في مصر
لو حصلت اي حادثة في الشارع في مصر معناها ان في عربي عمل حادثة ممكن يكون سعودي سوداني مصري وبكدة الاعلام العربي بيهتم
لو حصلت حادثة في السعودية او قطر او الكويت
مش شرط يكون فيه عربي عمل حادثة
بس اكيد فيه سيريلانكي او هندي او نيبالي عمل حادثة
وبكدة غالبا الاعلام العربي مش بيهتم بالحادثة لانها ولو جغرافيا حصلت في شارع عربي لكن حقيقة مش كدة
ده بالاضافة لحاجة تانية
اغلب المجتمعات هنا بتعتمد على القبلية والاتصال المباشر او التداول المباشر للخبر
يعني حاجة كدة زي لما حضرتك تكون في البيت وتحصل خناقة في الشارع
تقوم فاتح الشباك وتبتدي توصف الخناقة للناس جوه البيت
وغالبا بتلاقي كل الجيران فاتحين الشباك وبينقولو للي جوه البيت
لكن لو حصلت خناقة جوه البيت فمحدش بيطلع الشباك يبلغ الناس اللي في الشارع
وبتكتفي بأن اللي في البيت كلهم عرفو بطريقة مباشرة
وما بتفكرش ان الاشكال اللي حصل جوه البيت يهم حد في الشارع اصلا

هضرب مثال بسيط
حصلت حريقة في برجين من الابراج الضخمة هنا
ارتفاع البرج حوالي 50 دور في اقل تقدير وارتفعت السنة اللهب من اسفل البرجين وارتفعت لعنان السما
كنت ساعتها شغال تحت الابراج دي
البرجين دول كان كل الناس على اطراف العاصمة شايفاهم
وبكدة تحقق الاعلام المباشر بالروئية
والناس ابتدت تصور الحريق بالموبيلات وينقلوها لباقي معارفهم في المدن التانية
وبكدة تحقق الاعلام المباشر بالاخبار
لما رجع البيت فتحت قناة الجزيرة انا وكل زمايلي عشان نتفرج على نشرة الاخبار ونشوفهم هيقولو ايه عن الحريق
مكنش فيه اي اخبار عن الحريق بتاع الابراج الخمسين دور

ولكن كان فيه خبر تاني خالص

افتكر انه بالنسبه لنا
وبالنسبه لهم بالضرورة طالما انهم اذاعوه
هو الاهم
الخبر كان بيقول

انهيار منزل مكون من خمس طوابق بالاسكندرية شمال مصر

يا انا يا علي جمعة

2007-11-11T08:07:00.000+03:30

مسايرة للموضة اللي ماشية في البلد اليومين دول

بصراحة جاي اتكلم شوية عن المفتي بتاع الحكومة

اصل يا جماعة المفتي ده طلع بتاع الحكومة بس

ما هو اصله بياخد مرتبه من الحكومة

يبقى بتاع الحكومة

وكله كوم والفتوى بتاعة الشباب الغرقانه كوم وحده

يقولك الغرقانين دول مش شهدا

استغفر الله في سرك يا راجل ومتقلش لحد

انا خايف والله كمان تقول انه اللي ما يعجبوش حال البلد اليومين دول

ويقوم رامي نفسه في النيل

ولا يدلدل من رقبته بحبل في سقف الاوضة

ولا يشد نفس بانجو يكتم على نفسه يروح فيها

كل دول ما يبقوش شهدا

استغفر الله

امال يعني نعمل ايه فضيلتك بالظبط

افتنا
افتنا
افتنا

*********
الكلام اللي فات ده عينه من كلام كتيير قريته وسمعته

الكل بيلوم على الدكتور علي جمعة

اغلب اللي بيتكلمو عالم لاسعة

وشاربه الهوا في كوز مخروم

يعني الدكتور علي جمعة يا يقول كلام على مزاجهم

يايبقى مفتي الحكومة

يعني مثلا

كل واحد يقول رأيه في فتوى من فتاوى الراجل المحترم ده

ويعلق مشاكل البلد كلها في رقبته

يا جماعة

الراجل ده فقيه

عالم فقه

زي عالم فيزيا

او عالم رياضيات

وكل علم له قواعد واصول ونظريات

بيتم على اساسها استنباط النتائج

الفتوى عبارة عن مسألة رياضية

او معادلة كيميائية

معطيات

ونتائج

وظروف محيطة

بصراحة لو الدكتور علي جمعة افتى بأنهم شهدا

كنت هتلاقي نص شباب البلد واخدينها عوم لايطاليا

وان غرقت في السكة فأنا شهيد

الدكتور علي جمعة مش بعيد عن الشارع في مصر

ولو كان جرح متين اسرة مصرية بفتواه

فهو بيحمي عشرين مليون اسره من التهور

والدفع بأبنائهم في سكة اللي يروح ما يرجعش

احيانا العلاج بيكون طعمه مر

لكن لازم نتحمله

اللي يغرق وهو خارج بطرق غير شرعية

في مركب عارف تماما انها غير صالحة للملاحة

هتشيله من على بعد عشرين كيلو من السواحل المصرية

وهترميه على مسافة من السواحل الايطالية

ويكملها عوم

من مبدأ

"يا نعيش عيشة فل يا نموت احنا الكل

اكيد مش شهيد

وحرام نساويه بشهدائنا اللي ضحو عشان الدين والوطن

وبلاش العواطف تاخدنا

وكراهيتنا لظروف البلد تخلينا زي الشريك المخالف

تحية حب واعزاز وتقدير

للدكتور علي جمعة

الرجل العصري

والشيخ المجدد

*****************

اخيرا

من يجد في نفسه حاجة من طهارة بول وعرق وشعر النبي

فليراجع نفسه

حتى نقول له الان يا عمر

أستاذ جمعة

2007-11-04T06:59:00.000+03:30

في صيف سنة 1989 ميلادية

اتجمع عدد من شباب البلد عندنا

واتفقو انهم يستغلو فترة الصيف في شيئ مفيد ليهم ولبلدهم

تم افتتاح فصول تقوية لطلبة المرحلة الاعدادية

ساعتها كنت مخلص خامسة ابتدائي وطالع اولى اعدادي

كان الشباب دول او المدرسين بتوعنا همه شباب البلد اللي سبقونا في مراحل التعليم

انا لما وصلت مرحلة الجامعة اشتركت في التدريس برضه

الشباب اللي درسونا وقتها

وعلى الرغم من ان سننا متقارب حاليا

لكن اتعودت اني اناديهم بأستاذ فلان

وصعب قوي اناديهم باسمهم حاف كدة

استاذ رمضان حمدالله واستاذ حمدي عبجليل واستاذ جمعة اسعد

استاذ جمعة يمكن له الفضل اني اكون مهندس بعد ربنا سبحانه وتعالى

كان بيدرس لنا رياضة اولى اعدادي

كنت كويس في الحساب في الابتدائي

لكن هو كان بيقولي لو اي حاجة مش فاهمها اروح له البيت

او كنت اروح له الحرجة - الارض- وكنا نقعد تحت النخلة بتاعتهم

من بعد العصر لغاية ادان المغرب

لغاية دلوقتي فاكر اشكال فن

والمجموعات

والاعداد الطبيعية

لما دخلت اولى اعدادي كنت مخلص منهج الرياضة كله

وايه

كما انزل

فاكر في مرة مدرس المدرسة كان تعبان خلاني اشرح للفصل بدل منه

بعدها اتعودت اني اكون اشطر واحد في الرياضة في الفصل

لغاية ثانوية عامة اللي ما اخدتش فيها اي دروس بتاتا

ونقصت نص درجة بس على النهائية في الرياضة

طول ما كنت اشوف استاذ جمعة لازم كنت اروح اسلم عليه

ازيك يا استاذ جمعة

هو ما يعرفش اكيد اني متذكر فضله علاي من اولى اعدادي

ممكن يكون هو نسي

بس انا عمري ما نسيت

انه من اصحاب الفضل علي

وانا شغال في القاهرة

عرفت ان الاستاذ جمعة جه من البلد

كان تعبان ورايح للدكاترة في مصر

خلصت شغلي وطلعت على امبابه

سلمت عليه

والف سلامة عليك

قال لي انه رايح بكرة للدكتور ومسافر بعدها

ملحقتش احكي معاه

كان الوقت متأخر وعايز يقوم ينام

لما رجعت البلد بعدها قابلته مرة واحدة عند دكان حريز

ازيك يا استاذ جمعة

صحتك اخبارها ايه

كان شكله تعبان قوي ساعتها

السنة اللي فاتت

كنت بكلم البيت على النت

اخبار البلد ايه

قالو لي الاستاذ جمعة مات

انا لله وانا اليه راجعون

مات في المستشفى في اسيوط

انهاردة افتكرته

وقريت له الفاتحة

يا ريت تقرو له الفاتحة معايا

وعايزكم تعرفو

انه من اصحاب الفضل علي

ليه لأ - جمال مبارك

2007-10-24T03:35:00.000+03:30

انا مش هقول ليه نعم

انا عايز اللي عنده اعتراض يقول لي ليه لأ

من غير حنجورية ولا شعارات

عايز اللي عنده اعتراض على جمال مبارك يقول ليه

بلاش نتأثر بحركات همبكية زي كفاية وغيرها

ولا للتوريث ولا مش عارف ايه

اذا كان الاعتراض لمجرد الاعتراض فاشرب من البحر

اذا كان عندكم اسباب نناقشها

للاسف البلد فيها مشاكل كتيير

والشباب اكتر حد بيتأثر بالمشاكل

وعمالين نطلع في مظاهرات عند سلم النقابة

وقدام النقابة

وجوه النقابة

وكل اللي واقف بيقول لا

او رافعة لوحة كاتب عليها لا

طيب

انا اعرف ان اي حد بيقول لا على شيئ

معناه انه عايز يقول نعم لحاجة تانيه

عمري ما شفت حد رافع لوحة بتقول نعم لاي حاجة

كل حياتنا بقت لا لأي حاجة

وكل ما اشوف حد في الشارع الاقيه يقول لأ

او كفاية

والاخرس الاقيه ماشي يهز دماغه يمين وشمال

وعلى رأي الاستاذ يوسف بن عن عباس الضو في المال والبنون

حضارة سبع تلاف سنة بتقول لأ

عم عباس الضو بيقول لأ

فريال فراويلة قالت لأ

وخلص الجزء الاول من المسلسل عليه وهو عمال يزعق ويقول لأ

طب محدش قال لأ ليه

عايزين اسباب وجيهة من غير شتيمة ولا قلة ادب

عايز اللي يرد يقول وجهة نظرة هو

مش وجهة نظر الاخوان المسلمين

او حركة كفاية

او ابراهيم عيسى

او عم عباس الضو

ايه وجه اعتراضك

نعم لجمال مبارك

2007-10-17T02:47:00.000+03:30

دي دعوة مني لكل الشباب العاقلة

واللي بتدور على مصلحة البلد دي

نعلنها صريحة ومن دلوقتي

نعم لجمال مبارك

رئيسا لجمهورية مصر العربية

يوميات رمضانية

2007-09-22T11:47:00.000+03:30

1

بكرة اول يوم رمضان كل سنة وانتم طيبين
عمنا جوزيف
المدير بيتصل بيا
وات از يور ارانجمنت فور رمضان موهامد
بيني وبيني نفسي يخرب بيت امك يا شيخ
يس بوس ال ماي فورمنز ار مسلم سو اي ويل قو افري دي ات سيكس ويز ون فزرمان هوم ويل بي تشانجيد افري داي
كدة يعني لازم اعمل فيها جدع
بطريقة دي انا هفطر المغرب كل يوم في العربية وانا رايح الشغل
وهتسحر في الشغل
يلا
احسن
لو قعدت في البيت لوحدي هقلب المواجع على نفسي
من سته لسته
خير ان شاء الله

2

عبدالكريم
ده مسلم فلبيني حدوتة لوحده
انت هتصلي التراويح
ايوه
طيب نسيب الموقع ونروح نصلي احنا الاتنين
ما ينفعش
انت تروح يوم وانا يوم
خير ان شاء الله
احسن من بلاش
*************

3
الامام لازم يلقي خطبة بين التروايح
ما تخلص يا مولانا
ورانا شغل
والتليفون مش بطال
زوووو
زووووو
عامله سيلنت
المهم
في الوتر
بدأ يدعو
والله اخد اكتر من ربع ساعة
يا سيدي قصر وادعي بجوامع الدعاء
بدل الهرتلة اللي عمال تقولها
ربنا يصبرنا
لا انا من بكرة ما اصليش الوتر معاه
****************

3

القطري يرتدي جلابيته البيضاء المميزة والشماغ الابيض
الهندي اما زيه القومي - حتة قماش حول وسطه
او قميص وبنطلون
السوداني بعمامته البيضاء وجلبابه الواسع
شرق اسيا غالبا قميص وبنطلون
المصري
بعضهم اتى ببيجامة النوم
او تريننج سوت
اوجلابية بيضاء
او قميص وبنطلون
او ملابسه الداخلية - الكالسون
هيه دي مصر ولا بلاش

***********
4

ايوا يا ابوي
انا في جدة دلوقتي
هركب الباص لضبا
هكون هناك على الفجر
وعلى اخر النهار هركب العبارة

مكالمة تانية
ايوا يا ولدي
انا ركبت العبارة
اتحركت ليها ساعة
اوصل الفجر انشاء الله سفاجة

الحمد لله ابويا راجع
كفاية غربة يا حاج
قال لي انه اشترى لي جلابيتين جداد
فرحت قوي
بالرغم اني اقدر اشتري لنفسي كل حاجة
بس بفرح بأي حاجة ابويا يشتريها لي
على رغم عمري الذي يقترب من الثلاثين

مكالمة:
ايوا يا حاج
انا ركبت الباص يا ولدي ومروح على البلد

مكالمة
انت فين يا ابوي
انا في الدير يا ولدي ، كلم خواتك ينتظروني

مكالمة
ايوا يا اختي
ابويا قدامه عشر دقايق ويكون معاكم

مكالمة
ايو يا ابوي
انا وصلت يا ولدي كمل نومك انته
الف حمدالله بالسلامة يا حاج

طول الطريق كنت فرحان ان والدي راجع من الغربة
اخيرا يا حاج
كفاية كدة سفر
اخيرا هشوفك بعد تلات سنين غربة
لما وصل اكتشفت انه انا حاليا اللي متغرب
هو وصل البلد بالسلامة
وانا اللي متغرب

كمان سنة يا حاج واشوفك

هيكونو اربع سنين
نسيت اقولك ان شعري خلاص بيقع
وبقيت اصلع على خفيف
عشان ماتهش عني بعد سنة كمان
*****************
5

لغاية دلوقتي مش عارف اخلص رخصة السواقة
معايا امتحان قريب يا جماعة
ادعو لي
نفسي يبقى معايا رخصة سواقة
كفاية سواقين كرهت شغلي معاهم والله
شمال يمين شمال يمين
توب علينا يا رب
*****************
6

اخر ايام الرحمة
واول ليالي المغفرة

اللهم اغفر وارحم
وتجاوز عما تعلم
انك انت الاعز الاكرم
وصلى اللهم على محمد واله وسلم

صايم لوحدي

2007-09-12T05:52:00.000+03:30

رمضان الاربع ولا الخميس؟
مش عارف بس اكيد مصر الخميس
هنا في قطر غالبا بيتبعو السعودية
في الراديو كانت اذاعة امارات اف ام بتقول ان الخميس اول رمضان
يا شباب يا شباب
الخميس اول رمضان في الامارات
يبقى السعودية وقطر الخميس ان شاء الله
الحمد لله اجتمعنا على بداية الشهر الكريم
الشباب:الحمد لله
بس اكيد ليبيا الاربع:
هههههههههههههههههه
رجعت البيت
بفتح مواقع الاخبار
ليبيا تعلن الاربعاء اول ايام رمضان
ههههههههههههههه
************************

اول يوم صوم في حياتي
مش فاكر عمري كان قد ايه
تقريبا كنت مخلص اولى ابتدائي
بس اللي فاكره انه كان الجو حر جدا
واصريت اني اكمل اليوم كله
وساعة الافطار
فتحت بقي
وقعدت افضي اي سوائل تنولها ايديه
واشرب
اشرب
لغاية ما خلاص
ما قدرتش اتنفس فعلا
وبطني كانت عاملة زي الكورة المنفوخة
اتلمو حواليا في البيت
نيموني على ضهري طول الليل
وانا تقريبا غايب عن الوعي
*************************
لشهر رمضان ريحة مميزة
والوان في السما
بتنتهي دايما
وبتروح
مع اخر ادان مغرب منه
مش عارف لوحدي بحس بكدة
ولا حد تاني بيحس معايا
*************************
من كام سنة
اول يوم افطار في رمضان
بكون لوحدي
بفتكر كل حبايبي المتجمعين على الطبالي وفارشين الارض وترابيزات السفر
وبتنزل دمعة من عين
وانا بقول
ذهب الظمأ وابتلت العروق وثبت الاجر ان شاء الله
************************
مع كل رمضان لوحدي
بسأل نفسي سؤال
هل يجوز الصيام
لمن لم يأكل ولو لمرة واحدة
مكرونة بالباشميل
عند علا
وعبدالرحمن بيعيط لانه عايز ياكل من الطبق بتاعي دونا عن كل الاطباق على السفرة
**************************
وحشني- الصايم - يا عيال بلدنا
الصايم في البلد عندنا
هيا الاحتفالية الطفولية المهرجانية
لكل اطفال البلد
عند الجامع الكبير
من بعد ادان العصر
لعب
بيع
شرا
وقبل ما ينطق المؤذن اول حروف الادان
يكون كل العيال متنتورين على شوارع البلد
"افطر يا صايم بالكحك العايم"
*************************
مكنتش اعرف ايه سحور يعني
لكن كنت بصحى احيانا على دوشتهم
اكل واشرب
واسألهم
ليه صاحيين دلوقتي
يقولو رمضان جه
اممم
مش فاهم
بس لما رمضان يجي بكرة صحوني اكل معاكم
*******************
كنت بصحى كل ليلة
واسألهم انا عايز اشوف رمضان
يقولو لي لسه ماشي من شويه
اتخيله راجل
طويل
عليه مهابة لكنه جمييل
دايما بيمشي في كل مرة
من غير ما اشوفه كويس
واتملى منه
*************************
كل سنة وانتم طيبين
كل اصحابي
كل احبابي
كل المدونيين
كل الناس اللي حبيتهم واحترمتهم
كل سنة وانت طيب
لجيرينيمو واحمد شقير والبراء اشرف وبندق وابوامل وحازم شلبي وايمز ولابيدو واحمدشلبي سمراء النيل ودعاء كروان وشجرة الدر وفنجان قهوة ومكسوفة وكل المدونين
واتنسوش كلكم
كلنا نفتكر ناس غابو عن دنيتنا
من اهلنا واحبابنا
نترحم عليهم
ونقرا لهم الفاتحة
يا ريت كلنا نقرا الفاتحة وياسين لشيكو اول يوم رمضان
ربنا يتقبل مننا
ويعينا على طاعته في الشهر الكريم
وكل سنة وانتم بالف خير

انا مش قليل حيلة

2007-09-05T09:12:00.000+03:30

مش عارف ليه حبيت عبدالسلام النابلسي

اكتر من عبدالحليم

اللي دايما كنت بحسه اناني

وقليل حيلة

ودايما

النابلسي

هو اللي بيتحايل على الدنيا عشان يعيش
وصاحبه يعيش معاه

كنت بحس انه الاكثر صدقا مع نفسه

ومع الحياه من حوله

ولما كانت البت النعسانة تظهر في الصورة

كانو الاتنين بيحبوها

لكن هيا دايما كانت بتروح

للي بيقدر يتنحنح اكتر

ويتسهوك اكتر

والنابلسي

كان عارف انه قادر دايما

انه يتحايل على الحياة

ويوفر متطلباته

ومش بيقف عند البت النعسانة

اللي دايما بيسيبها لصاحبه

الاناني

قليل الحيلة

وكان كل مرة

الفيلم بيخلص

والمسهوك بيبوس النعسانة

من غير ما حد يحكي بعد كدة

هيتحايلو على الحياة ازاي

ومين اللي هيجيب لهم بيض الفراخ من على السطوح

عشان تستمر الحياة

لزق ولا لصق

2007-08-28T05:43:00.000+03:30

بدور عليه

2007-08-13T13:12:00.000+03:30

لما تلاقي نفسك غريب في ارض الوطن
تدور على شبر واحد
تقف عليه برجليك
وما تعرفش
وطن بيوته طرشاك للخلا الواسع
وشوارعة ضاقت
ضاقت عن مقاس جزمتك
بنمرة او نمرتين
قولي يا صاحبي اعمل ايه

العرض مستمر

2007-07-23T10:55:00.000+03:30

كان الجميع يجلسون في صمت ينتظرون العرض الشهير
هو نفس العرض من سنوات طويلة
لكن الجمهور
يأتي كل ليلة
وكل شهر
وكل سنة
تتغير بعض الوجوه
او يتغير توزيع الأماكن
لكنها نفس الوجوه
***
كا ن بعضهم يصطحب اطفاله الصغار
يصدرون جلبة
وحركة وصياحا
بعضهم يرتدي حللا افرنجية
والاخر يرتدي من منتوجات عمر افندي
في الصفوف الخلفية
كانت العمائم والعباءات تختلط مع الملابس الاخرى
يعلم الجميع انه العرض اليومي على نفس المسرح
لكنه عرض مشوق يمتد لساعات وساعات
على المدى السنوات الفائته
تغير جل ابطال العرض
بدءا بالبطل الرئيس للعرض
حتى اخر كومبارس يظهر على خشبة المسرح
(يحكى ان البطل السابق لنفس العرض مات اثر حادث اليم)
(الذي يسبقه لا احد يعلم سبب وفاته حتى الأن)
(بطل اخر ارتحل نحو عواصم الغرب بحثا عن دور يناسبه كما فعل عمر الشريف دون جدوى فمات)
بينما النظارة يتصايحون داخل قاعة العرض
جاءت دقات الافتتاح المثالية المعتادة
.....دوم.......دوم..........دوم
سكت الجميع
وبدأت الستارة المخملية الحمراء
في الانشطار الى نصفين
يتباعد كل منهما عن الاخر
ليظهر بعض الكومبارس على خشبة المسرح
كانو يهرولون
يفتشون في كل ارجاء المسرح بحثا عن شئ ما
جاءو بكرسي ضخم
اضخم من أي كرسي اخر
في أي بيت من بيوت النظارة
ومن أي كرسي في مقار عملهم
ومن أي كرسي تخيلو ولو للحظات ان يجلسو على مثله
كرسي ضخم
مبطن بالقطيفة الحمراء
وجوانبه ذهبية اللون محلاة بالفصوص والاحجار اللامعة
سكت الجميع
بينما تسمرت عيونهم على الكرسي
انه الكرسي ذاته
الذي اعتادو ان يرو بطل العرض السابق يجلس عليه
طوال العرض
يتحدث احيانا
يضحك احيانا
يزمجر احيانا
لكنه لا يتحرك من كرسيه ابدا
(يحكى ان بقاع الكرسي
فتحة سرية
سحرية
تستخدم لقضاء الحاجة
حتى لا يتحرك البطل من على الكرسي طوال العرض)
بدأت موسيقى الافتتاح
مارشا عسكريا صاخبا
دخل كل الممثلون على خشبة المسرح
جلسو في اماكنهم المهيأة
دارت بينهم احاديث غير مسموعة للنظارة
سكت الجميع فجأة
حين دخل اشخاص طويلو القامة
يرتدون الاسود في كل جنبات المسرح
بعدها
دخل بطل العرض الرئيس
دوت القاعة بالتصفيق
ممثلون
كومبارس
نظارة
بدأ بطل العرض يلقي ابتسامته المعهودة
التي لا تحمل أي معنى
او مغزى
لا تعلم ان كانت تعبر عن فرح
حزن
دهشة
لا احد يعلم
جلس على المقعد المعد له
وبدأ يتكلم
كان الجمهور يستمع وهويتكلم
يتثاءب بعض الممثلون على خشة المسرح وهو يتكلم
ينسحب بعض الكومبارس لقضاء الحاجة بعيدا عن خشبة المسرح وهو يتكلم
بدأ الجمهور يمل الكلام وهو يتكلم
حاول بعضهم الخروج من المسرح
لكنهم منعو
لا يسمح بالخروج قبل انتهاء العرض
مرت دقائق وهو يتكلم
ساعات وهو يتكلم
شهور وهو يتكلم
كان الممثلون يذهبون خلف الستار للحظات
يحضر بعضهم ثانية
او يرسل بأحد ابناءه الذين يشبهونه
وهو يتكلم
فيالاجزاء المظلمة من قاعة المسرح
بدأ الجمهور يألف بعضه بعضا
شاب اسمر اقترب من فتاه ممتلئة وهو يتكلم
غابا عن الانظار للحظات وعادو
كانت بطن الفتاه ممتلئة اكثر وهو يتكلم
مات احدهم وهو يتكلم
صرخت الفتاة
التف حولها نسوة بالخلف وعادو بها
تحمل طفلا اشقر وهو يتكلم
دفنو ميتهم تحت ارضية القاعة وهو يتكلم
تزوج شابان اخران
مات اخرون
ما زال الحرس يمنعهم من الخروج
لم ينتبهو لكلامه ثانية
فهو دوما يتكلم
بدأ الممثلون والكومبارس
في تبادل المنفعة
مارسو التجارة
الدعارة
كانو يحضرون الطعام من الخارج
ويبيعونه للنظارة بأضعاف اثمانه
تبادل بعضهم الادوار
صعد بعض النظارة على خشبة المسرح
نزل بعض الممثلين من فوق اى وسط القاعة
وهو يتكلم
تضاعفت اعداد النظارة
ارتفعت اسعار الاطعمة المهربة من الخارج
نام عامل الستارة
(يقال انه مات وذاك ابنه البكر اتى نيابة عنه في غفلة من الجميع)
تقاتل النظارة على كراسي العرض
جلس بعضهم على الارض
مات بعضهم
كمدا
وغيظا
وسحلا
وتحت اقدام البعض
او تسمما من سوء الطعام المهرب من الخارج وهو يتكلم
لا احد يستبين كلامه
لكنه يتكلم
يقترب منه بعض الممثلون
ثم يبعدهم بإشارة منه
اقتطع بعض النظارة اجزاء من القاعة
صنعو منه بيوتا
ودورا للعبادة
وملاجئ للأطفال مجهولي النسب
...............
...............
.............
خارج المسرح
كانت الشمس مشرقة تملأ السماء
بينما يهرول الجميع بسرعة لإنجاز أعمالهم

والعنب

2007-07-16T07:34:00.000+03:30

اليوم هو السابق لوقفة عرفات مباشرة غدا الوقفة وبعدها سيكون العيد الكبير
راجعت نان الخياط عدة مرات خلال اليوم
للتأكد من أن الجلابية الجديدة ستكون جاهزة للاحتفال بالعيد
كانت قطعة قماش أهداها لي احد أعمامي القادمين من الكويت
بها خطوط زرقاء وأخرى بيضاء
لا تختلف عن باقي قطع الأقمشة سوى في تخانة الخطوط
خلصت الجلابية يا خواجة:
نظر لي بعينيه الضيقتين
ثم استكمل الضغط برجله على ماكينة الخياطة
ويداه تشدان قطعة القماش من أسفل إبرة المكنة في الاتجاه الأخر عن جسده النحيل
لسه.......تعالى بعد المغرب:
برضه لسه كل شوية لسه لسه:
لم يعرني اهتماما
كدت أشيط من الغيظ
ترددت في أن أبكي
ولكن اعلم أنه لن يعيرني اهتماما أيضا
ولن يفيد بكائي
لكني كنت في منتهى الضيق
اكره – حتى الآن- تلك الأشياء التي لا تأتي في موعدها الذي انتظره
رددت بيني وبين نفسي
العيد الجاي مش هجيب جلابيتي هنا
هقول لأبويا يوديها لأسعد الخياط
ولا احسن لخياطين نقادة
ارتددت للخلف
كان ماضي يجلس ممازحا أبو الحسن أب عطية
مرتديا جلابيته الصوف السوداء
وتحتها جلابية بيضاء
بينما يحمل على كتفه جلابية أخرى
بدا الشراب الجديد بلونه البني
كقطعة ارض بور وسط حقول البرسيم
يضحك ممسكا بسيجارة من نوع الكيلوباترا
وقد ركب في نهايتها فلتر
وبدا من علية القوم
أكيد انهاردة فيه كتب كتاب بنت من بنات البلد
تخصص ماضي في إحضار المأذون عند كتب الكتاب لأي زيجة تتم داخل القرية
كان هو المختص بالتعامل مع المأذون
وإحضار قسيمة الزواج بعد ذلك
- بعد هذا اليوم بإحدى وعشرون عاما ذهبت إليه لكي يذهب معنا للمأذون
عند زواج أولى أخواتي ولكن مرضه منعه من الحركة فطلب من ابنه الأكبر الذهاب معنا-
تحركت في طريق السوق
ذاك الطريق الذي يمتد بطول القرية من الشمال للجنوب
رابطا بين القرية التي تسبقنا
والأخرى التي تلينا
كانت بقايا المصلين تتمدد من ناحية المسجد
بعد الانتهاء من صلاة العصر
كان الجو خريفيا
الشمس تميل نحو الغروب
صارت أشعتها أكثر ألفة عنها ساعة الظهيرة
بينما اردد اللعنات على نان
تحلق عدد من أطفال القرية
من هم في سني
أو اكبر قليلا
حول عجل ضخم مربوط في عمود الكهرباء
ذاك الذي يلاصق بيت توفيق أب حيا(1)
ويبدو وكأنه وسط الشارع للقادم من ناحية المشروع(2) الشرقي
كان سعيد أب الحاج احمد يقف في وسط الدائرة
يروض العجل
ويحكم الصريمة(3) التي التفت حول رأسه
وأذنيه وقرنيه
دار حوله دورة شبه كاملة
ممسكا خرزانته
أشار إلينا أن نبتعد
قبل أن يبدأ في فك الطرف الأخر من الصريمة من حول عمود النور
امسك بالطرف الأخر من الصريمة
وشد العجل
حتى أصبح في وسط الوسعة تماما
وقف لحظات يعاجل العجل بضربات من الخرزانة
حتى هدأ العجل عن الحركة
حينها بدأ يجذبه خلفه
مرددا بصوت جهوري
والعنب:
كنا نرد خلفه في صوت واحد
رمانه طاب:
استاهل:
استاهل:
بدأ يمرق في شوارع القرية الضيقة
شارعا بعد أخر
بينما عدد الأطفال يتزايد مع كل شارع يقطعه
جاء بعضهم ممسكا ببعض علب الصفيح الفارغة
التي كانت تحدث أصواتا متداخلة مع هتافنا
رمانه طاب:
يقف سعيد اب الحاج احمد عند كل وسعة
او ملقة(4)
أو ناصية درب مغلق
لدقائق
يستمر بعدها في المسير
والعنب:
تنقلنا من شارع إلى شارع
ومن درب إلى درب
حتى انحسرت أشعة الشمس خلف الجبل الغربي
وبدأ الأطفال في التسلل عبر الدروب الجانبية
عودا للمنازل
خوفا من الدبيب(5)
حيث لا ينتعل أيا منا شيئا
يحمي قدميه من لسعات العقارب
تسللت نحو منزلنا
كانت أمي تقف على عتبة الدار
كنت فين يا واد:
كنا لافين ورا العجل:
والجلابية؟:
لم ارد عليها
أسرعت نحو فرشتي الممددة على ارض الغرفة
لكي أنام من شدة التعب
غير مبال بكل هذه الأوساخ التي قد تعلقت بقدمي
***************************************
(1) توفيق يحيى واعتاد اهل البلد بنطقه توفيق ابا حيا للتخفيف
(2) ترعة من الناحية الشرقية للبلد نسميها المشروع الشرقي
(3) حبل يصنع من ليف النخيل ويجهز لتربط به الماشية
(4) أي براح داخل القرية اعتقد ان اصله ملتقى وحرفت
(5) ما يدبي على الارض من حيات وعقارب وزواحف

يسلم فمك يا ابو الغيط

2007-07-11T15:11:00.000+03:30

وقال‏:‏ إن مشروع القانون بالشكل الذي أقره مجلس النواب يطالب مصر بالوفاء بثلاثة شروط‏:‏

أولها‏:‏ إغلاق الأنفاق المزعومة لتهريب الأسلحة بين رفح وغزة‏.‏والشرط الثاني‏:‏ إعادة تأهيل وتدريب الشرطة المصرية للتعامل مع مسائل حقوق الإنسان‏,‏

والشرط الثالث‏:‏ الفصل بين ميزانية وزارة العدل وميزانية القضاء في مصر‏.‏وقال أبوالغيط‏:‏ أن مصر رفضت بشكل واضح هذه الشروط‏,‏ وإن رسالة مصر التي نقلها إلي الإدارة الأمريكية أنه يجب عدم وضع شروط علي العلاقات المصرية ـ الأمريكية‏,‏ وأنه يتعين الاستمرار في تعزيز هذه العلاقة‏,‏ وإن هذا شأن داخلي خاص بالمصريين‏,‏ ولا يحق لأي طرف أن يتدخل فيه بالتوجيه حتي ولو كان ثمنه‏200‏ ألف مليون دولار‏,‏ وليس مجرد‏200‏ مليون دولار‏.‏ ( الاهرام 11 يوليو 2007 – العدد 44046 السنة 131 )

مش عارف الجماعة الامريكان دول عايزين ايه مننا بالظبط بصراحة
عالم غريبة يا اخي
حاشرة نفسها في كل حاجة
قالو لنا نتصالح اتصالحنا
قالو لنا نتمقرط اتمقرطنا
قالو فرجونا على عجين الفلاحة
اتنططنا
طلبو مننا لبن العصفور
حلبناه
شالو الضو
وجابو شاهين
قلنا برضو معاكو لاعبين
لكن كل كووم
وإعادة تأهيل الشرطة بتاعة بلدنا عشان حقوق الانسان
لا بجد
والف لأ
وعلى جثة اخر فرد من افراد الشعب المصري
قولو آميين
ازاي يعني
ده حتى ما يرضيش ابدا
إعادة
إعادة يا كفرة
إعادة يلي ما بتعرفوش ربنا
****
وكله كوم وموضوع الميزانية بتاعة الوزارة دي كوم
ازاي يعني
هو حد اشتكى لكم من حاجة
ما طول عمرنا زيتنا في دقيقنا
وميزانيتنا وطنيتنا حماها الله
الله الله
وبعدين هو انتو في بلدكم بتقولو يا ما السجن مظاليم
احنا عندنا بنقول يا ما في السجن مظاليم
طب لما نفصل الميزانية
المثل ده نوديه فين
نبله ونشرب ميته مثلا
استغفر الله
استغفر الله
عالم ما تعرفش ربنا بصحيح
*******
خاتمة القول
مصر هيا امي
نيلها هو دمي
شمسها ف سماري
شكلها في ملامحي
حتى لوني قمحي
فضلة خيرك يا مصر

رأيت رام الله

2007-06-22T22:49:00.000+03:30

من كتاب رأيت رام الله
مريد البرغوثي
********
هل أضيق بفكرة التغني بالفكرة؟
هل هذا هو السبب في أنني أتعامل مع القصيدة بصفتها بناء لا غناء؟
حتى الصديقة
لا أستطيع أن أخاطبها بالرومانسية الشائعة والمتوقعة
والمرأة التي لا تتخذ الخطوات الأولى نحوي لا أهتم بمصادقتها
وكذلك الحال مع أصدقائي من الرجال أيضا
من السهل علي أن أدير ظهري وأغادر العلاقة إذا رأيت فيها ما يرهق
الصديق المرهق كثير المعاتبة
كثير اللوم
يريد تفسيرا لما لا يفسر
يريد أن "يفهم" كل شيء
إذا سامحك على خطأ فهو يشعرك انه سامحك على خطأ
*****
علمتني الحياة أن علينا أن نحب الناس بالطريقة التي يحبون أن نحبهم بها
****
مطار القاهرة عموما من المطارات الصعبة للمسافر الملهوف
كل شيء يتم بتلكؤ لا يراه مسببوه تلكؤا
بل ربما حسبوه اتقانا لعملهم
*******
أماكننا المشتهاة ليست إلا أوقاتا
وهي ذلك الاحتكاك الفجائي (البرئ؟) بثدي ابنة الجيران أثناء اللعب
والذي بمجرد إحساسك به
لا تعود إلى البراءة
ولا تعود البراءة إليك
لقد عرفت الآن
ولو في هوجة اللهو
ملمس ثدي الأنثى
وما العارف ببرئ!!
******
يبدي لها الجندي الإسرائيلي دهشته فعندما ترى النساء شابا مقبوضا عليه
من قبل جنود الاحتلال
يهاجمن الجندي
وتصيح أكثر من واحدة منهن
- ابني ابني اتركوا ابني
صرخ الجندي في وجهها
- روخي كذابة، كم أم لولد واحد؟! مئة أم لولد واحد؟! امشي من هون يلا.
صرخت في وجهه
- أيوه. إحنا هيك . الولد عندنا له مئة أم مش مثل أولادكم كل ولد له مئة أب!!!
*****
الغربة دائما لا تكون واحدة, إنها دائما غربات
******
وحتى في التخاطب اليومي مع رضوى
يغلب الطابع الذي يواري
والذي لا يُفصح بالمفردات اللغوية عن العاطفة
"إنها مزيج من الجمالات"
أقول ذلك للأصدقاء والصديقات
ولا أظنني قلته لها مباشرة ذات يوم
في الخطاب اليومي معها
أكثر من المزاح والمداعبات والإجابات غير المتوقعة التي تصل لحد المناكفة
والاستفزاز اللطيف
لكنه استفزاز

فرح للكل

2007-04-21T02:46:00.000+03:30

من وانا صغير
وانا بدور على اني اكون سعيد
وانا عندي خمس سنين
كان سعادتي في اني اجيب كيس كاراتيه من الحجم الكبير لوحدي
وعيطت
لغاية ما امي ادتني عشر قروش
كان ساعتها مبلغ كبير
قبضت عليه بكل عزمي
ورحت عند دكان عم عيسى
وقلت له اديني كيس من الكبير
قالي مشاور ناسك
وكأني رايح اشتري قراط ارض
قلت له ايوه امي اللي مدياني العشر قروش
واخدت الكيس
وجري على البيت
كنت خايف عليه كأني شايل حلم بين يديا
ولما رحت البيت
لمست جوانب الكيس بيديا
وابتديت افتحه سنة بسنة
واخيرا
حبات الكراتية قدامي اخيرا
دار بخيالي كل الاعلانات بتاعة التليفزيون
ومع اول واحدة دابت في بقي
اكتشفت اني مش بحب طعم الكاراتيه
كان بطعم الجبنة الرومي المعفنة
كلت واحدتين تانيين
ومليش نفس اكمل
طلعت في الشارع
وفرقته للعيال
كانو مبسوطين بيه قوي
وبياكلوه بسعادة غريبة
على الرغم اني مكلتش منه حاجة خالص
الا اني كنت حاسس ان طعمه حلو
وكل واحد فيهم مادد يده بيقولي
اديني شوية تاني ياخي
مش انا صاحبك
فرقت الكيس كله
ومن ستر ربنا امي ما شافتنيش
والا كنت خدت علقة عشان الخساير اللي سببتها
***************

لما كبرت شوية

اتحرك معيار السعادة
من طعم العنب الاحمر عند عم اب الصاوي
الى طعم دولسيكا استيك من عند فتحي اب داوود
لقميص مشجر وبنطلون كروهات
كان موضه ساعتها
كان الواحد بيبقى فيه زي البلياتشو
لجزمة جلد
للبحث عن العدد الجديد من مجلة العربي الكويتيه
وقرايتها من الجلدة للجلدة
للفرجة على شوارع قنا بالليل
او الفرجة على الحريم العريانة في المجلات
للرغبة في السفر لمصر
والفرجة على شوارعها
وركوب المترو
اول مرة دخلت فيها سينما كانت سينما اوديون
(لغاية دلوقتي هيا المفضلة لدي كنوع من الحنين للذكريات الأولى)
اول مرة اشوف عرض مسرحي
كان في المسرح القومي
اول زيارة لسيدنا الحسين
كأي صعيدي بيعتبر ان زيارة القاهرة لا تكتمل الابه
وستنا السيدة زينب
ونفيسة العلم
واللي كانت زيارتها حدوتة لوحدها
اخويا وابن عمي كانو جايين لي من البلد
ليلة الخميس قالو لي
عايزين نصلي في السيدة نفيسة
قلت لهم من عنيا الاتنين
انا كنت بزحلقهم الصراحة
كنت تعبان جدا
المهم صحيت الجمعة الصبح
اشتريت اهرام الجمعة
وتالت صفحة
كانت صورة مسجد السيدة نفيسة واخدة نص الصفحة
قلت صلوات الله وبركاته عليكم آل البيت
دي علامة يعني
دعوة من ستنا عشان نزورها
قمت صحيتهم
لبسنا ونزلنا
استنينا الاتوبيس
مفيش اتوبيس بيروح السيدة نفيسة
ركبنا اول اتوبيس وقلنا نغير
الكمساري قلنا ممكن تركبه الاتوبيس ده
لغاية شارع بورسعيد
عند مديرية امن القاهرة
وبعدين ممكن نغير
او نتمشى نص ساعة
مش مشكلة
مفيش تلت ساعة
ولقيته بينادي علينا
الاستاذ اللي بيسأل عن السيدة نفيسة
ايوة يا اسطى
ادي الجامع ده اللي قدامك
انت مش قلت انه مش بيعدي من عند الجامع
ايوه يا استاذ
بس الاتوبيس فيه مشكلة في الفرامل
والسواق لف من هنا بسرعة عشان يرجع الورشة
دي مش طريقنا
اول مرة الاتوبيس يجي من هنا

كنت سعيد قوي

علشان همة كانو حاسين اني حققت لهم امنية
**************
اتغيرت اسباب السعادة
من نجاح بحققه في شغلي
لخطوة صح في حياتي
مكافأة او ترقية
او عقد جديد
وبعد كل حاجة بحققها
كنت بحس ان برضه مش السعادة
فيه حاجة اكبر
*********************
كانت متشعلقة بإيديا
كنت رايح معاها نشتري حاجات الفرح
ابتسامتها كانت ماليه وشها
وانا هطير من الفرحة
الفرح الاسبوع الجاي ان شاء الله
كنت سعيد بجد
بحق وحقيقي
أحلى حاجة انك تقدر تهدي الفرح للناس
يا رب
يارب
إهدي الفرح للكل
*****************

*الصورة بعدسة الفنان الاسباني - ستانلي بوكلا -عيون مصرية

راجع

2007-04-12T17:39:00.000+03:30

راجعين يا هوى راجعين

من الدوحة رأسا 1

2007-01-25T13:56:00.000+03:30

من الدوحة رأسا

2007-01-25T13:35:00.000+03:30

ونقول كمان

صفحات 2

2006-12-21T20:13:00.000+03:30

كلا ب عيون
مش فاكر مين هيا عيون بالظبط
لكن مقدرش أنسى كلابها
كانت أسود مش كلاب في الواقع
دايما واحنا رايحيين غرب السيالة
كنا حريصين اننا منعديش ناحية عيون ولا كلابها
لغاية دلوقتي مش بعدي في الطريق بتاعة عيون
على الرغم من غياب عيون وكلابها عن المشهد
في يوم كنت راجع من غرب السيالة
وطمعا في اختصار المسافة الطويلة
عديت ناحية الكلاب
قطعت المسافة الموازية لشجر الليمون في ارض عيون
دون أن يحدث شي
وما ان استدرت شمالا على أول طريق رضوان
حتى بدأت المأساة
جيش من الكلاب ولاد الكلاب
يجري نحوي
بسرعة بدأت أجري
للأسف الارض كلها كانت محروثة
مما يجعل من المستحيل معها الجري
بدأت أصرخ وأبكي
وأجري
والكلاب ورايا
أول ما حسيت انه خلاص
مش عارف ليه ساعتها
قعدت بدل ما أصرخ
أهوهو
الكلاب تهوهو
وأنا أهوهو من شدة الفزع
مش قادر أجري
وقفت
وأنا لسة بهوهو
بصيت ورايا كانو تلاتة كلاب
استعوضت ربنا فيا
لكن
بمجرد ما وقفت
وقفو هما كمان
بصو لي وأنا بهوهو
وهزو ديولهم
وتراجعو للخلف
***************

عيل تايه
المسافة من بيتنا لبيت جدي
متعتبرش طويلة
لكن بالنسبة لعيل صغير
كانت تعتبر سفر
طلعت من البيت
من الشارع بتاعنا
شمال ناحية الترعة
مفيش ترعة حاليا اتردمت وبني مكانها
شمال تاني وأمشي موازي للترعة
فيه عيال كتيير بتعوم في الترعة
لكن أمي قالت لي معومش في الترعة
فيه واد ظغير جرحته قزازة وهو بيعوم في الترعة
ومات
وصلت جميزتنا
فيه جميزة كانت واقعة
طعمها كان حلو قوي
بصيت لفوق كانت الجميزة مشنكتة
لما أكبر هتعلم أركبها
ديوان حكيمة
لسة المسافة طويلة
أنا فاكر الطريق كويس
بروح على طول مع أمي
لكن دي يمكن أول مرة أروح لوحدي
أنا لو مشيت على طووووول
هوصل للمجموعة اللي بناخدو فيها الحقن
لا بس أنا رايح بيت جدي
وصلت ديوان الحرابوة
همشي في شارع الحرابوة الطويل لغاية الأخر
الشارع فاضي
وصلت كرم عدس
فيه عيال كبار بيلعبو
وقفت اتفرج شوية
هنا أمي كانت بتمشي على طول
فيه شارع صغير وطويل همشي فيه
الشارع فيه بيوت من ناحية واحدة
الناحية التانية كان ظرب جالوس عالي
جواه نخل كتييير
تلاقيه مليان كلاب من جوه
سرعت من المشي
لما افتكرت الكلاب
وصلت أخر الشارع
كان فيه عمود نور في نص الشارع
عند أخره
وقفت شوية
مش فاكر ابحر ولا اقبل
أمي كانت أحيانا بتروح من هنا
ومرات كانت تروح من هناك
خدت الناحية اليمين
مشيت شوية
لا لا
أمي كانت بتروح بيت جدي من الناحية التانية
رجعت مسافة
مشيت لغاية بعد العمود
مش فاكر
وقفت خايف
يمين ولا شمال
قعدت تحت العمود
وبدأت أبكي
بعد شوية
عجوزة طلعت من البيت اللي قدام العمود
مالك يا ولدي
كنت لسة ببكي وأشنق
عايز أروح بيت جدي ومخبرش الطريق
اتجمع ناس تانيين معاها
وسمعتهم بيقولو
عيل تايه

**************************************
خابرين

خابرين اللي ياكل العيش المحروق
يتعلم العوم
لا يا خوي دا اللي يا كل العيش المعشب هو اللي يتعلم العوم
كانت قعدة من عيال الشارع كلهم
كان كل واحد بيقول حكاية من حكاياته
سعيد كان بيحكي لنا عن الصنانة اللي في ترعة نعمان
لقيو خلقات واحد مقتول
الترعة دي مليانة صنانة
التصقنا ببعضنا أكتر
احمد أب حسن حكى لنا عن الراجل اللي بيخطف العيال الظغيرة
قابله مرة على السيالة
كان راكب حصان
اضاف
ديه بياخد العيال ويدبحهم عشان اللقية تفتح
هاني أكد المعلومة
الرسن بتاع اللقية لازم يدبحوله عيل ظغير عشان ياخدو اللقيه
عارفين الراجل ديه بيجي ساعة القيالة ويقعد يلف بحصانه
محدش هيطلع فينا ساعة القيالة
اكدنا لبعض
ياسر دايما كانت معاه حكايات مختلفة
حكى لنا عن فارس بتاع العرب
لما حارب الحكومة
كل عياله معاهم بنادق آلي
ورشاشات
ومدافع
العربية بتاعت المركز لما راحت لهم مقدرتش عليهم
ده حتى الحريم والبنتة بتاعتهم معاهم بنادق
كانت الحكاوي شيقة
بدأت عندها استجمع ما لدي
انتو عارفين زمان انا وابويا رحنا حاربنا الاسرائيلين
كان معانا بنادق كتيير
وموتناهم كلهم
لاحظت لمعة غريبة في عيونهم
لم يرد ايا منهم بأي كلمة
سألني أحدهم موتوهم كلهم لوحدكم
لا ياد كانت ناس كتيير بتحاربهم
عساكر وبنادق ودبابات وكنابل
اصلي انا وابويا وأمي كنا في الديش
وكان معانا بنادق
وموتناهم كلهم
نظرو لبعضهم البعض
ثم لي
كيف امك كانت معاكم
قوم بلاش كدب
يا كداب
يا كداب

صفحات من التاريخ غير الرسمي

2006-12-16T14:30:00.000+03:30

الصورة من

http://egyptianeye.blogspot.com

الميلاد

سنة 1978
بس مش عارف قي شهر كام بالظبط
امي بتقول كان القمح محصود
والدريس شغال
سألتها
مش فاكرة اي حاجة حصلت ساعتها:
مش فاكرة يا مي:
ده كان يوم ميلادي
ابويا سجلني في دفاتر المواليد بتاريخ اول اكتوبر
قالي عشان لما تدخل المدرسة
يكون عمرك ست سنين بالظبط

***************

طبل بغوازي

مفش فاكر التاريخ
لكن كان حفلة طهور عماد ابو بكر
كانو جايبين طبل بغوازي
(مزمار بلدي وبنات مازن)
كان التخت (المسرح )جاهز من العصر
كنا بنجهز النبال علشان نلسوع الغوازي بيها وهما بيرقصو
كل واحد من العيال بيظبط الاستك بتاع النبلة
كنت واقف على حافة التخت ( المسرح)
وفجأة
آآآآآآآآآآه
طراخ
مفقتش غير أخر الليل
كنت نايم على حجرابويا
الطبل خلص
والغوازي كانو لابسين هدومهم
والنبلة كانت لسة في جيبي
***************

البينة
انا مش رايح المدرسة تاني
الاستاذ احمد اب عبداللطيف قالنا اللي مش هيحفظ السورة
هيتعبط
ابويا قالي تعالى احفظها لك
طول الليل يحفظ فيا وانا مش عارف أحفظ حاجة
(أبويا فقد الأمل في ابنه انه هينفع في التعليم)
الصبح ابويا خدني من ايدي ورحنا على بيت الاستاذ أحمد
اتفق معاه انه ميضربنيش
لغاية ما أحفظ السورة
لغاية دلوقتي مش بعرف أحفظ أي حاجة
ولسة محفظتش سورة البينة
سنة 2005 وبعد عشرين سنة
علا دخلت عليا يوم
محمد انا انهاردة حفظت سورة البينة في المدرسة:
هسمعها لك:
بعد ما خلصت
انت حافظها يا محمد:
يلا يا علا انا مش فاضي دلوقتي:
والله شكلك مش حافظها:
يلا يا بت:
أدي اخرة اللي يلعب مع العيال:
قال مش حافظها قال:
********************

سلاعة
سلاعة النخل هيا شوكة جريدة النخل
ويمكن مش بتسميها سلاعة الا لو كانت شوكة بجد
أعتقد انها السلاية في المثل المشهور
(في الوش مراية وفي القفا سلاية)
كنت راجع من الحرجة
حجري كان مليان نجيل ودفرا
وقدام بيت سعدية شورة
كانت بداية المأساة
سلاعة نخل استقرت في رجلي
( بحاول افتكر الشمال ولا اليمين مش فاكر)
صرخت بكل عزمي
شالتني سعدية شورى لبيتنا
انا بصرخ من الألم
وفريق من نساء الشارع بيتشاورو على الطريقة التي سيتم بها اخراج السلاعة من رجلي
اتكون فريق بقيادة سعدية شورى
استخدمو كل ما طالته أيديهم
لفتح رجلي
ابر خياطة
ملقط
سكين
دون النظر للصراخ الصادر مني
أغمى علي من شدة الألم
ثلاث ساعات متواصلة حتى جاء والدي لينقذني من بين ايديهم
خدني للوحدة الصحية في الخطارة
(بلدنا مكنش فيها وحدة صحية ساعتها)
الدكتور سألني عن أسمي
وقلي تعرف تعد من واحد لعشرة
واحد
تنين
تلاتة
اررررب
……..
كان طولها حولي اتنين سم

هنا ولدت

2006-12-09T09:25:00.000+03:30

سلام على كوم الضبع في العالمين

ــــــــــــــــــــــــــــــــــــــــــــــــــــــــ

ولقيت نفسي يا فاطنه
طيره مهاجره
والطيره جناحها
محتار
ولقيت نفسي على
بوابة جبلاية الفار
..باخد الأحباب
بالحضن
كانس كل دروب الجبلايه بديل توبي
طاوي كفوفي
وباخبط بيهم على صدر الدار
(الأبنودي)

إستقالة

2006-11-29T08:38:00.000+03:30

بعد عدة مشاكل في الشغل اللي انا فيه

امبارح قدمت استقالتي

مش عارف هرجع مصر اعمل ايه

الوضع هناك غير مريح ليا بالمرة

الغربة بتلهيني عن مشاكل كتير لو رجعت هتزرع جواها

أصحابي كلهم مسافرين

سامح ليبيا

مصطفى الكويت

عبدالناصر السعودية

وائل الكويت

يعني لو رجعت البلد هحس بغربة اكبر من اللي انا فيها

بالاضافة للمشاكل الاخرى

يمكن ابسطها البحث عن شغل جديد

بفكر استمر هنا حتى لو هشتغل ببلاش

ومهما كانت الظروف اللي هنا

فأكيد هتكون أرحم من مصر

كفاية هنا اني بمشي في الشارع من غير ما حد يقولي بطاقتك يا استاذ

ثم انه كفاية استقالات

دي هتكون رابع استقالة في خلال 4 سنين

لازم اقلل من الحساسية والثورية الزيادة اللي عندي

واكبر الجمجمة وأعيش زي الناس ما هي عايشة

يمكن ساعتها اقدر احوش واعمل بيت زي البني ادمين

ولو حد قالي يا حمار

ابص له واضضحك

من غير ما ارد عليه واقوله شكرا يا فندم

نفسي اقدم استقالة من عقلي وتفكيري

واعيش مبسوط باقي الايام الجاية من عمري

من غير ما افتكر اي حاجة

ولا اشيل همكم يا جماعة

متزعليش مني يا أمي

رزقي ورزقكم على الله

فريد

2006-11-10T14:25:00.000+03:30

معرفش أسمه بالكامل ايه
لكنه من اجمل الناس اللي شفتهم هنا في الدوحة
اشتغلت معاه فترة قصيرة
كانو يدوب شهرين
يمكن كنت بأحترم فيه أنه ما بيرفعش صوته
ولا بيزعقش كتيير في الموقع
على الرغم من هدوءه الشديد كان ابن نكته
مهندس سمير كان بيحكي عنه مواقف تفطس من الضحك
بعد ما سبت الشغل كلمته مرتين تلاته على الموبايل
من أسبوعين عرفت انه تعبان شوية
دخل المستشفى
امبارح رجعت الاستراحة
مكنش فيه ولا واحد من المهندسين
كلمت هيثم
انتم فين
قال لي مهندس فريد تعيش انت
واحنا رحنا صلينا عليه ودفناه هنا في الدوحة
يااااه يا فريد
عرفت ان سمير برضه معرفش بموته ولا حضرش الدفنه بتاعته
كان نفسي أبكي،
لكن البكا والحزن رفاهية منقدرش عليها في الغربة
شغلت قناة مزيكا زوووم
وعليت الصوت على الأخر
وحبست البكا في قلبي

In-Box 2

2006-10-01T00:20:00.000+03:30

في الغربة

ومع أول يوم من سنة جديدة من عمري

مفيش غير رسايل أحبابنا

نصبربيها نفسنا

الى أن نلتقي

كل سنة وأنت طيب يا بو شنب

ويا رب تكون سنة سعيدة عليك

كل سنة وانت طيبة يا علا

وأشوف ابتسامتك مالية الدنيا دايما

**********

(1)
مسحراتي
منقراتي
بقول يا ناسي
يا رفاق حياتي
يا رب خلي
رمضان يحلي
روحكو وعينيكو
ييوهبنا رحمة
يجمعني بيكو
رمضان كريم
**********
(2)
صباح النور
والورد والياسمين
ع عيونك
صباحك بطعم العسل
خد فرح عالريق
***********
(3)
والله أبدا
بس مش معايا رصيد
انت واحشني جدا
خليني أشوفك عالنت واحكيلك
*******************
(4)
كنت في حفلة في الساقية مليانة مدونين
كانت نقصاك بجد
ربنا يرجعك بالسلامة
***********
(5)
There is always a difference
Between
A golden box
And
A box full of gold
First is empty
But
The second
Is full of what’s valuable
Exactly like u
***********
(6)
صباح الورد والفل والياسمين
ع عيونك الحلوين
وإن شاء الله يكون يوم جميل
**************
(7)
وحشتني
نفسي في تواصل معاك
سؤال وجواب
أخد وعطا
إنشالله خناق
واحشني كلامك
**********
(8)
غريبة يا ترى ايه مسهرك وسارق النوم
مش عوايدك
عندي شغل للصبح
ادعي لي
********
(9)
معلش رصيدي بقه ميرنش دولي
بس
انت وحشتني قوي
وعلى طول في بالي
بجد
بجد
****
(10)
مبسوطة إني سمعت صوتك
واللي وصلني من كلامك
شئ أكبر من معناه المجرد
وحشتني
*******
(11)
مش عارفة
من يومين
وأنا نفسي تطبطب عليا
كأب
وتسمعني كصديق
فخطرفت في ايميل
*************
(12)
الليلة أحلم لو أرقص حافية
فوق رمال شديدة النعومة
والنيران
فقط
تضئ وجهك
********
(13)
القمر بدر
أرتدي الأزهى
وأستعد لطقوس الفرح
فرحتي لن تكتمل إلا برسالتك
******************
(14)
باين حبل التواصل داب
طب قولي فين
أنشر مناديلي
تسمح لي أنشرهم في بلكونتك
******************
(15)
صباح الفل
تحب نتقابل امتى؟
يا ريت لو تسمح
يكون بدري
بمجرد ما تخلص شغل
*************
(16)
صباح النور
امبارح رحت في غيبوبة
ومقدرتش أكلمك
أنا بخير
وفي الطريق للبحر
***********
(17)
أنا تعبانة
وفي البيت من يوم الاتنين
منزلتش
متقلقش
بس خليك معايا بالرنات
***************
(18)
صباح الفل
اميلك كان مش طبيعي
بسيط
عميق
بصراحة معرفتش أرد
بجد
قلبي معاك
****
(19)
علمونا أن نصون الحب بالكره
وأن نكسو ندى الورد غبار
علمونا أن نغني
ونداري
حبنا الوحشي
كي لا يصبح الترنيم بالحب
مملا
محمود درويش
أفهمني
*****
(20)
حاضر حاضر
هقوم أصلي
وأسبح
وأدعي لنا
*******
(21)
أنا عالنت
في انتظارك
كون موجود
مستنيه وهفضل مستنية
***************
(22)
صباح الورد
والفل
والياسمين
لعيونك الحلوين
البوست بصراحة يجنن
وحشتني
******
(23)
أنا بخير
قريت اميلك
ورديت عليه
لسه في أجازة
وحشتني
خلي بالك على نفسك
*************
(24)
أنا واخدة أجازة من يوم الخميس
ما خرجتش من البيت
سامحني الرد هيتأخر حبة
****************
(25)
بقرا رواية عابر سرير لأحلام المستغانمي
وانت ايه مسهرك يا بابا
***************
(26)
كلمت ......... يجي ساعة
عارف
في صوتها حسيت بيك
يمكن عشان اتكلمت كتير
وحشتني
******
(27)
متقلقش
أنا كويسة
كان بس نفسي نتكلم
خلينا للسبت
انت تعبان
******
(28)
يا ترى انت فين وبتعمل ايه؟
واحشنا قلبك الأخضر
وكلامك الدافي
طمنا عليك
*******
(29)
When nights are long
And
Friends are few
I site by my window
And think of u
A silent whisper
A silent tear
With all my heart
I wish you were here
“I miss u”
*********

28

2006-09-30T07:01:00.000+03:30

ماذا تمثل لي الحياه حتى الان

مقطوعة رتيبة من العزف

تذكرني بتلك التي تصاحب السيارات

"إحترس من فضلك السيارة ترجع الى الخلف"
"إحترس من فضلك السيارة ترجع الى الخلف"
"إحترس من فضلك السيارة ترجع الى الخلف"

السيارة لا تتقدم الا نادرا

لا

بل هي لا تتقدم تماما

وان لم تظل ثابتة في مكانها

فهي ترجع الى الخلف

لا اكتب هذا الكلام اعتراضا على ارادة المولى عز وجل

ولكن اعتراضا على محمد ابو شنب

ذاك الشخص الذي صاحبني لمدة ثمانية وعشرون عاما حتى الأن

وكان يتدخل في كل قراراتي وافعالي

والتي لم تكن جميعها تعود علي بالنفع

بل غالبا ما تدفع بالسيارة نحو الخلف

يعتقد هو في نفسه بعض الذكاء

ولكنه ذكاء استاتيكي

لا يتوافق مع الذكاء الديناميكي للسيارات المحيطة

(الذكاء الاستاتيكي هو الذكاء الذي يرتبط بالقيم والثوابت ومبادئ الفرد والذي غالبا ما يكلفه الكثيرولا يصلح لمجاراة عصر سادت فيه ثقافة رنة الموبايل وأصبحت شخصيتك برنتك وتغلبت فيه ديناميكية اهتزازات الفيديو كليب على كل انواع السكينة والمودة)

ثمانية وعشرون عاما لا أتذكر خلالها الأن نجاح ما حققه

أو شيئا يفوق العادة

كل نجاحاته كانت في حل واجب الحساب بالمدرسة

وكل انتصاراته كانت في معارك وهمية

انتصر فيها على طواحين الهواء

وعاد يحمل اكاليل الغار

ليتقوقع داخل ذاته

كما انه لم يخسر ولو مرة واحدة

لأنه

لم يمتلك يوما شيئا ليخسره

لم يعشق شيئا ما

يتذكر بكاءه صغيرا على بعض حبات العنب

ولكن ضيق ذات اليد

جعله لا يستسيغ طعب العنب حتى هذه اللحظة

لا يكره شيئا ما

فهو يتعامل مع ما يعرض عليه

دون القدرة على الاعتراض لمرة ثانية

على أكل السبانخ

بعد علقة ساخنة

حين تبرم في المرة الأولى

يحاول أن يخلق عالمه الخاص

يبحر فيه بأشرعته

لكنها أشرعة من وهم

لا تتحمل رياح الحقيقة

لا يتذكره أحد

ولا يهتم هو أن يتذكر أحد

فشخصيته

تصور له أنه مركز الكون

لذا فلا داعي أن تشغل بالك بالأخرين

ثمانية وعشرون عاما

عاشها حتى الأن

دون أن يكون له لونا يميزه

ولا أكله يفضلها

ولا أغنية يحب سماعها

والأدهى

أنه ليست له رنة موبايل خاصة

ثمانية وعشرون عاما

جاء ليعلن بعدها
أنه

أحا يا دنيا

وكمان أحا

رسالة لسمر

2006-09-19T21:04:00.000+03:30

سمر جات للدنيا ويمكن ما تعرفنيش ساعة ما تشوفني ويقولو له ده خالو تبص لي وتجري على حضن امها

تلات اربع ساعات فاتح صفحة النت

اكتب رسايل

وبسمع لنصير شمة

ومستني

وهفضل مستني

وبيوحشني وش صديق

ملحقتش اتملى منه

وريحة دفاتري القديمة

بتهل مع كل سبتمبر

والبت

اللي مره اسمها عبير

ومره فاطمة

ومره دعاء

ومروة

وأماني

وانتي مش فاضيه

وساعة القرب

بترجعي لورا الف خطوة

وتسيبيني تايه

عشان

فيه واحده صاحبتك فرحها انهاردة

وفرحي انا

ملهوش ميعاد

ليه تسيبيني

وريشة عود نصير

بتنخر في قلبي

ومش قادر امد ايدي

تلمسك

ولا حتى

عنية

ليها السماح

والرضا

بنظرة منكم

وريحة الشتا

الطالل علينا

بعد جهنم الصيف الطويل

بتفكرني بحضن

كنت فاكره يوم ليا وحدي

لكنه بالضنى جاد

وسابني

وحيد

أشم ريحة الشتا اللي جاي

مع عزف العود

ويوم أخر في الغربة

2006-09-02T12:13:00.000+03:30

الساعة 3 الدقيقة 40
موعد الإستيقاظ
الساعة 3 الدقيقة 40
موعد الإستيقاظ
الساعة 3 الدقيقة 40
موعد الإستيقاظ
ده صوت المنبه عشان أصحى من النوم على فكره حاطط حواليا تلات منبهات عشان أصحى.
**************
الساعة 4.40
تولاسي سواق الباص على التليفون
مهندس أنا ما فيه ييجي باص خراب انتا فيه ترتيب سوا سوا كريشنا (سواق تاني)
***************
الساعة 6 صباحا
واصل متأخر ساعة عن موعد الموقع
بينوس السكرتير
U R LUKY Eng Mohamed
U late one Hour
But Generator is not working so Time Record Machine Stopped
الحمد لله
مفيش كهرباء
يعني انهارده مفيش شغل
**************
الساعة 9 صباحا
واحد من المديرين الكتار بتوع الشركة
مهندس محمد
انتا من انهاردة هتنزل معايا الموقع في شغل الانفاق
سيبك من الكمبيوتر والكلام الفاضي ده

بعد جدال

ماشي
لكن أنا عايز عربية بسواق
وتليفون مفتوح

ماشي بكرة

طيب أنا بكره برضه
************
الساعة 11 صباحا
نفس المدير
طيب دلوقت هتنزل مع مهندس .... تشوف الوضع لغاية ما تيجي العربية

أول ما نزلنا من العربية
مهندس ......
أنا هسيبك دلوقتي هنا علشان معايا اجتماع مهم
طيب أنا اتحرك ازاي

اتصرف يا باشمهندس
**********
الساعة 11.30

مهندس ....... يدخل المكتب يلاقيني موجود مكاني
الله انتا رجعت ازاي
اتصرفت
هههههههههه
**********
الساعة 3 عصراً
العربية والسواق وصلو يا باش مهندس

الموبايل بكرة
العربية كانت نص نقل
ما علينا
المهم نتحرك

على فكرة يا باش مهندس
معاك صب خرسانة انهاردة
*************
الساعة 9 مساءا
بوم بوم

الشدة الخشب ضربت
والخرسانة كلها على الأرض

ههههههههههههههههه

يا حمودة فين العشا

هو وقت عشا يا باشمهندس

امال نموت من الجوع يعني

**************
الساعة 11 مساءا
الاستراحة
زميل شكله تعبان

مالك يا باش مهندس

لا ولا حاجة
ليا 17 شهر
رحت أخد أجازة
قامو مكنسليني
ومش راضيين يصرفو فلوسي
ونازل مصر بكره نهائي
كفارة يا راجل
************
الساعة 12 مساءا
أما أظبط المنبه على الساعة 3.40 صباحا
تصبح على خير يا أنا

فينك

2006-08-27T19:47:00.000+03:30

حاولت الكتابة مراراً في هذه الظروف دون جدوى، كنت كمن يستقيئ لا أكثر، فالكتابة عندي فعل لا إرادي حين أبدأ الكتابة في موضوع ما أو قصة لا أدري هل أنا الذي أتحكم في حروف الكتابة أم هي التي تقودني نحو النهاية المحتومة للقصة أو المقال.
أتذكرها جيداً
كان اليوم عيد
وملابسها الزاهية تضفي عليها مزيدا من البهاء
وقفت أمام المرآة دقائق عدة
بعدها أعلنت أنها مستعدة للخروج
أدهش كثيرا عندما أراها تصحو من النوم
ولا تخرج من حجرتها حتى تنتهي من تصفيف شعرها
كان لها في كل يوم تسريحة مختلفة
أحب أن أسميها العايقة من أجل ذلك.
وقفت أمامي كي أراها في شكلها المتألق، سألتني
ايه رأيك ؟
زي العسل
تعرفي إنك أحلى حاجة في الدنيا
كل سنة وانت طيبة.
قبلت جبينها ونهضت كي تلتف أيدينا سوياً
قبل أن نخرج أسرعت كي تستأذن أمها في الخروج
انتو برضه مش هتقولو انتو رايحين فين
عموماً خد لبالك منها يا محمد
كان صوت أمها كما أعتدت في كل مرة نخرج فيها سويا يوصيني
نزلنا الشارع وكان سؤالها لي
احنا رايحين فين يا محمد
دلوقتي هتعرفي
بس اللي متأكد منه انك هتكوني مبسوطة
استوقفت أول تاكسي مر من أمامي
سيتي ستارز يا اسطى.
فين ده يا استاذ
اطلع على مدينة نصر وأنا هوصف لك الطريق
كان سيتي ستارز لسه فاتح قريب والتاكسيات مأخدتش عليه
أخذت أوصف الطريق للسائق
شمال
يمين
لف من الدوران اللي جاي
بينما عيناها تتعلق بواجهات المحلات في الخارج.
كده خلاص وصلنا يمينك يا اسطى
كانت الطريق زحمة جدا
نزلت بعيدا وأخذنا نمشي في المسافة من طريق النصر حتى سيتي ستارز.
الجو كان شديد البرودة لذلك التصقت بي طوال الطريق حتى وصلنا.
قضينا وقتاً طويلا أمام المحلات
وداخل أحد المطاعم
وفي الملاهي التي أصرت أن تدخلها رغم إرتفاع أسعارها
بعد أن أنتهت الليلة كان كل ما معي من نقود قد نفذ تقريباً
لذلك استلفت منها فلوس تاكسي العودة
رجعنا نفس المسافة حتى طريق النصر مشياً على الأقدام
بينما هي في قمة النشاط والسعادة تجري أمامي كي تسبقني
كنت في غاية التعب والاجهاد من كثرة الحركة.
بمجرد صعودنا للتاكسي مالت برأسها على وراحت في نوم عميق
عند وصولنا للبيت حملتها على كتفي حتى مكان نومها.
بينما أطبع على جبينها قبلة أخرى
فتحت عيناها ببطئ
وابتسامتها الرائعة علت وجهها
أنا بحبك قوي يا محمد، انت طيب قوي
.....
.....
.....
......
وحشتيني يا علا

حنين

2006-08-23T21:49:00.000+03:30

ماذا أفعل

عندما تحتل علا وحدها

كل هذا الجزء من الذاكرة

وحشتيني يا علا

رحيل

2006-08-10T20:29:00.000+03:30

لا تكتشف مدى عمق الجذور

الا عندما تحاول اقتلاع الشجرة

قالت سعاد

2006-07-14T20:48:00.000+03:30

سعاد: بص يا حسن
سعاد: احنا اتقابلنا مرتين
سعاد: اتكلمنا شوية
هو: وبعدين
سعاد: عرفنا بعض من خلال كتابتنا
سعاد: اللى هي اصدق ما فينا
سعاد: او انا بتخيل كده
هو: تمام
هو: وانا اكتر منك مؤمن بكده
سعاد: يعنى حكاياتك عن بلدك وعم حسن
سعاد: عن امك وجدتك وقصة حبك الاولانية لبنت خالك
سعاد: كل دي انا افترضتها كحقايق
سعاد: وتقبلتها
سعاد: رغم ان فيها حاجات انا مكنتش اتمنى انها تكون في فارس احلامي
هو: زي ايه
سعاد: بس زي ما انت كنت بتحكي
سعاد: استنى
هو: ماشي
هو: كملي بسمع لك
سعاد: أعلم تماماً أن عصر الجيد البيض قد ولى.
أحلم به
رجلاً من لحم ودم
نتقاسم سوياً قطع الشيكولاته
وأغاني منير
وأهرام الجمعة للبحث عن فرصة عمل
وشقة للإيجار
سيكون وجهه مألوفاً
بل عادياً
لا يشبه توم كروز أو جورج كلوني
لكن لا بد أن يكون له قلباً لا يسكنه غيري
سعاد: وزي كلامك كده بالظبط
سعاد: انا كنت بحلم
سعاد: المهم
سعاد: انا معرفش يا حسن نصيبي فين
هو: ولا حد يعرف
سعاد: بس انا مرتحالك
سعاد: انت من الناس اللى قربوا منى جدا
سعاد: وف وقت قصير
سعاد: حسيت بيك
سعاد: وبحتياجك ليا زي ما انا محتاجة لك
سعاد: انت لمست حاجة جوايا
سعاد: وتر معزفش عليه حد قبلك
سعاد: ودى اكتر حاجة شدتني ليك
سعاد: فاكر لما كنت بتعزمني على الخروج
سعاد: كنت قايل
سعاد: لو مجتيش هتبقة اخر فرصة لاننا نتقابل ضاعت
سعاد: ومش هينفع نتقابل الا بعد سين
سعاد: وانا عارفة انه ممكن نتقابل بعد سنين فعلا
هو: وبعدين
سعاد: معرفش ساعتها حياتي هتبقة عاملة ازاى
سعاد: لان الدنيا بتتحرك بسرعة عجيبة
سعاد: بس اللى متأكدة منه
سعاد: واللى اضمنهولك
سعاد: انى عمرى ما هلعب بيك
سعاد: ولا هخدعك
سعاد: ولا هقولك كلمة انا فعلا مش حساها
سعاد: عشان انا فعلا مش كده
هو: معاكي
هو: كملي
سعاد: جايز مببعتش رسايل كتييييييير
سعاد: قليل لما بكتب لك اميلات
سعاد: مش حاسس انى ملهوفة زي البنت لما قلبها يدق
سعاد: ده كله بيخليك تفكر
سعاد: بس انا كمان بفكر
سعاد: بفكر في حاجات كتير
سعاد: في احتمالات الفشل قبل احتمالات النجاح
سعاد: بفكر في شغلي
سعاد: وفي التزامى ناحية كل اللى حواليا
سعاد: عارف
سعاد: امبارح لما كلمتني
سعاد: كانت ماما قاعدة قدامي
سعاد: كنت بتكلم معاها كأصدقاء
سعاد: كنت عاوزة اكلمك حلو
سعاد: كنت عاوزة اقولك وحشتني
سعاد: بس مكنتش عارفة
سعاد: مش عارفة انت فاهم ولا لاء
سعاد: بس كل اللي هقوله
سعاد: متستعجلش في اصدار اي احكام
سعاد: ومتتهمنيش ابدا بالتلاعب
سعاد: لان صدقنى مش انا
سعاد: اللى تعمل كده
سعاد: ولو عندك شك في ده
سعاد: يبقة كل حاجة بينا ملهاش اي قيمة
سعاد: انا خلصت كلامي
سعاد: دورك
هو: ب ح ب ك

أول مرة تحب يا قلبي

2006-06-21T14:09:00.000+03:30

الإهداء هذه المرة لكي أنتي وحدك
قلت لك انتي كل حاجة ليا
ومش راضية تصدقيني
فشوفي اللي جرالي بسببك
يمكن تصدقي

********************
بتحب
قول ايوه..... يا لأه

ممكن يكون كل واحد فينا مر بتجربة حب
على فترات متعددة من عمره
من ساعة بنت الجيران اللي كنت بتلعب معاها على بسطة السلم
أو في مدخل العمارة
أو في دروب البلد
و براح الغيطان
أو التلميذة أم ضفاير بتاعت ابتدائي
البنت الأمورة
أم شعر ناعم
وكراساتها متجلدة ونضيفة
وبتجيب سندوتشات جبنة وبيض كمان
أو حتى في إعدادي
أو ثانوي
والبت اللي حبيتها
خرطها الخراط
وصبحت
زي السندريلا
في كتب الحواديت
بخدود ناعمة
وشعر طويل
وشفايف زي حبات الكريز
كل ده ممكن
بس الأكيد الأكيد
انك هنكرت شوية في الجامعة
ومشيت مع شوشو شرشر
أو نهى أستك
أو حتى كنت واد بيئة ولا مؤاخذة
عادي يعني يا جماعة
واتلميت على واحدة من بنات دبلون
ورحت قابلتها في المترو
وخدتها لفتين
مرج – جيزة
جيزة – مرج
ويا هئ
يا مئ
يا تربئ
أو كنت عايش في دور عبده الفاهم
والمحاضرة بتاعت انهاردة مكتبتهاش
وكشكولك يا بشمهندسة
أو يا دكتورة
أو يا أستاذة
عشان أنقل المحاضرة
وبعدين تروح طارش على الهامش
قصيدة عصماء
من نوعية الزميل محمد الفيومي

عينيك يا عينيك يا عين العنا
خديك يا خديك يا خد الخدا
وشكوت للقمر المضئ تلهفي
وسكبت من عين المعيد الادمعا.

وقعدت تحلم يومين بأنها هترد عليك
أو تبتسم لك
أو ترد عليك بقصيدة
تقول في مطلعها

دوس بنزين عالاول يا اسطى

لكن للأسف
تطلع البت عمشا
وما بتشوفش غير الكلام اللي على السطور

لكن اللي مش ممكن انك تكون زي حالاتي
أهبل ولا مؤاخذة
وعبيط بعيد عنك
وواخد الدنيا بالأحضان
وساعة ما يجي الحب يجي
على راحته ومزاجه
لغاية ما تطس يا حلو
ويؤتى الحذر من مأمنه
وتلاقي نفسك غرقان في شبر ميه
وبيتلعب بيك كرة شراب
ولا مؤاخذة
ويوم ترد على مكالماتك
وعشرة ولا معبره سعادتك
وتكتشف انك يا حلو اكتسبت صفات جديدة على حضرتك
هقولكم على اللي وصلني منه لغاية دلوقتي

1 – العبط حماكم الله
أكتشفت أني أصبحت عبيط وأهبل
– حماكم الله ورعاكم –
فتلاقيني مثلاً
ماسك صورتها اليتيمة اللي معايا
وعمال أكلمها وأشرحلها حالي
والغريب أنها بترد عليا
وبنقعد نضحك مع بعض
وساعات نبكي
وساعات نسكت
ونبص لبعض
ونرجع نتكلم تاني.
*******************
2- الذكاء والالمعية العالية

تسألك
انتا تعرف أنا طول الليل بعمل ايه؟
فيكون رد سعادتك
أكيد بتفكري فيا يا روحي
تتورد وجنتاها خجلاً
لتسألك لا بجد عرفت إزاي
انتي مش عارفة إني أقدر أقرا أفكارك
مع أنها طول الليل
- والعهدة على بتاع الرز -
نايمة في سريرها بتاكل رز مع الملايكة
***********************
3- البخل

لقيت نفسي وبقدرة قادر مقشف وبلم السحتوت
– وكل ما أفتكر أن جرام الدهب بقي بمية جنيه وأكتر
وأفتكر الشبكة والشقة والعفش والبيت الصغير والحلم والكبير –
أشد الحزام أكتر
مفيش سجاير
مع إني مش بشرب سجاير أصلاً
مفيش عصاير
ولا حاجة ساقعة
مفيش أكل في مطاعم
مفيش أكل لحم وفراخ
الاكتفاء بوجبة واحدة كل يومين
محاولة السنكحة على خلق الله
لو حد عزمك على أكل إعمل حساب أسبوع لقدام في بطنك.
**************************************
4 –البذخ الشديد

أيوه الله متستغربوش فتلاقيني كل ما أنزل سوق من الأسواق أو مول من المولات تحملني قدمي إلى قسم السيدات
– وقصدي شريف والله –
وأبتدي أشوف الهدوم
ياااه البنطلون ده شكله يهبل
هيكون حلو قوي عليها
– عارف أنها بتحب البنطلونات مع أن أمي لو عرفت هتطين عيشتي -
لا لا....... ولا الالطقم ده
على بعضه ملهوش حل
أكيد هتكون زي القمر فيه
بس تمنه غالي قوي
ميغلاش عليها
أنا بحب العطور
عشان كده تلاقيني واخد قسم العطور من أوله لأخرة
أجرب كل العينات المجانية
عشان أدور على أحلى حاجة ليها
صحيح وأنا خارج بيكون شكلي مش كويس أبداً
لأني بتكون طالعة مني كمية روايح حريمي ملهاش حل.
************************************
5 – مش عيب يا أستاذ

بسبب السطرين اللي فوق
بتعرض لمواقف سخيفة جداً
خصوصاً لما توصل لقسم الملابس الداخلية
أو لما تلاقي روحك قدام مكان البروفة بتاع الهدوم
أستحمل يا حلو البقين اللي هتاخدهم
ولا لا مؤاخذه
لما حد يفتكرك ولا مؤاخذه لا مؤاخذه
لا مؤاخذه يا جماعة يعني
*******************
6 – الجبن الشديد

المدير بتاعك يشتمك ويمرمط بكرامتك الارض
وتلاقي نفسك مبسوط
وساكت
وعمال تبتسم له
وده لسببين
الأول يا حضرات
عشان لو اتكلمت هيطير لك تلات ايام خصم زي ما حصل قبل كده وانت دلوقتي مش حملهم
خاصة أنها عايزة تشحن الموبايل قريب
وثانيا
وده الأهم بتعمل تدريبات على معاملة حماتك لو كانت منهم
لا قدر الله.
****************************************
7 – الشجاعة الشديدة

وانت معاها
تحس أنك أشجع راجل في الدنيا
دا أنا لوحدي أحارب أمريكا
وايه يعني لما أموت فدا عنين حبيبتي
تقولك خايفة يا حبيبي
فيكون رد السيادة
طول ما أنا معاكي مش عايز أسمع الكلمة دي منك
مع إنك في نفس اللحظة برضه خايف برضه من الحساب أخر القعدة الحلوة.
************************

تم النشر بعد أن أعلنت تمردي
وقمت بزيارة خاطفة
لأحد المطاعم الشهيرة
تناولت فيها وجبة غداء فاخرة
وحدي
والقدر
ورغيف العيش

syssssss

2006-06-13T21:18:00.000+03:30

لماذا يكره المصريون النظام؟
سؤال وجهته لنفسي أولاً
يمكن بعد ما اتعاملت مع مجموعة من الجنسيات المختلفة حسيت بالموضوع ده أكتر
تعالو نبص على حالنا

في الشارع
لو الاشارة حمرا بنعدي
لو صفرا بنعدي
لو خضرا برضه بنعدي
طيب حد يقولي الاشارة معموله ليه؟
عشان نعرف الفرق بين الالوان.

في طابور المترو
نتكوم بسرعة كلنا مع بعض على شباك التذاكر
الموظف ميعرفش يدي تذكرة لمين بالظبط
العدد يزيد أكتر
بعد شوية يدخل واحد محترم
بدلة
وكرافته
وأخر منجهه
يا جماعة عيب علينا كده
مش عارفين نعمل طابور
العالم كله شغال بالطوابير واحنا مش عارفين
نتكسف على دمنا ونبدأ نعمل الطابور
فجأة نلاقيه دخل مع أول الطابور
مع إنه جاي أخر واحد فينا

في طابونة العيش
تقف في الطابور
وتحترم نفسك
ده عيش يا جماعة
تدخل خالتك أم أحمد
(افتكر سكيننة وبلع ريقك)
يا واد يا سيد
هات التموين يا وله
ويبتدي الواد سيد يلم كل العيش الطالع من الطابونة لخالتك أم أحمد
عقبال أملتك جارته من زمان
وصاحبة أمه الروح بالروح

تفتح التلفزيون
تلاقي المذيعة الأمورة
مع إن صوتها أخنف
ومتفرقش بين العشرين حرف اللي بتنطقهم
( نسيت أقول إن أخرها عشرين حرف)
سيئاتي انساتي ساستي
مع الفم الأيبي
يساسة في أكبب
وتنتظر بعدها إعلانات لمدة تلات أربع ساعات

تحول على قناة فضائية
تلاقي برنامج ساخن
بيتكلمو عن السياسة
والمظاهرات في مصر
مناظرة
اتنين لواءات شرطة سابقين
عمالين يزعقو
ويهتفو
إحنا مصر
إحنا الحرية
إحنا النظام
إحنا بتوع الديمقراطية
واللي يقول غير كده نسحله
واللي يعمل مظاهرات نسحله
واللي يصورها في الجرايد والتلفزيون نسحله
واللي يتفرج عليها نسحله
واللي نسحله نرجع نسحله تاني

وفي الناحية التانية
أمورة ظغنونة
تعرف ملامح وشها كويس
لأنك بتشوفها كل يوم
في الاتوبيسات
وفي المترو
وفي مدرج الجامعة
وانت خارج من بيتكم
وانت داخل
وانت في الشارع
وانت في البيت
وانت صاحي
وانت نايم في أحلامك

من الأخر
ملامح بنوته مصرية
عماله تحاول توصل صوتها
أنا اتسحلت
واتبهدلت كرامتي
علشان ايه مش عارفة
دي مش بلدي برضه

بعد حوار طويل
عن القانون
والنظام
والبلاد
والعباد

تأثر اللواءات العظام
وردو في صوت جهوري
الظابط اللي عمل كده لو ثبت عليه هذا الكلام
هنسحلهولك يا بنتي
انتي اثبتي عليه انه سحلك
واحنا نسحله

ههههههههههههههههههه.

من الأخر تقريباً كل مناحي (حلوة مناحي دي) حياتنا
ماشية بنظام "طول ما قلبك أبيض ودعا الوالدين"
فوت في الحديد
مع إن الحديد برضه
الطن وصل لاربعة الاف جنيه
بدون أي نظام.

الغريبة
إن اللي يحاول يتبع النظام
بيتبهدل برضه
أبسط حاجه
بيتقال عليه انه هندي
مع إن الهنود
عندهم انتخابات في منتهى الديمقراطية
وكل عشرة ليهم دين
واله
وعقيدة
ومسمعناش عن فتنة طائفية في الهند
وعندهم أسلحة نوية
وبيصدرو تكنولوجيا أكتر من عالمنا العربي كله
وبيغنو حلو
وبيرقصو أحلى
وفوق ده كله
عندهم لغة
وبيتكلمو هندي
هههههههههههههه

صباح النظام

السستمة

2006-06-08T16:14:00.000+03:30

لماذا يكره المصريون النظام

نرجو الاجابة

وبإستفاضه

Inbox

2006-05-19T00:31:00.000+03:30

إلقالك حد إن ضاقت بيك مدلك يد
ساعة ما بكون مخنوق من الواقع بفتح رسايل الأحباب
أهم فايدة إكتشفتها للموبايل حتى الأن

1

غريبة إنك صاحي .
قريت أخر بوست حالاً.
حسيت إنك بتهديه ليا وفرحني قوي.

2

May be ur out of my reach.
But not out of my mind.
May be u r out of my sight.
But not out of my heart.
May be I didn’t tell u
“I MISS U”
But from inside I do

3

الواقع بيقول إنك هناك واحنا هنا
لكن الحقيقة إنك معانا هنا
لا البعد ولا المسافات لهم قيمة
ما دمنا أسرة مع بعضينا.

4
وكم للـــه من لطف خفــي يدق خفــاه عن فهم الذكـــي
وكم يســـر أتى من بعد عسر وفرج كربة القلــب الشجـــي
وكم أمــر تساء به صبــاحاً فتأتيـك المسـرة بالعشــــي
إذا ضاقت بك الأحــوال يومـاً فثق بالواحـد الـفرد العلـــي
توسل بالنبـــــي فكل خطب يهـون إذا توسـل بالنبــــي

5
اليوم جمعة
الصالات زحمة
صبرك شوية
نص ساعة ونكون معاك

6
ازيك يا محمد
أخبارك ايه
أنا حبيت بس أطمن عليك
صوتك كان متغير لما كلمتنا.

7
أجمل إحساس في الكون
إني أحس إنك قريب قوي
حتى وانت بعيد

8
ماشي يا عم المطحون
بس خليها بالليل عالساعة 8

9
من السهل أن يشتاق الإنسان لمن يحب
لكن من الصعب أن يجده كلما اشتاق اليه.

10
Dear hony
F u know how much I miss u
U wuld come back very soon
Wish u r doing wel n ur work
Find a hot check 2 write a blog about
Ur last blog z wonderful

11

آسفة
أنا كنت برن على محل الورد
لكني غلطت
ورنيت عالورد ذات نفسه

12

واحد شفوه بيشرب سيجارتين
سألوه ليه
قال بشرب ليا ولصاحبي اللي في السجن
بعد اسبوع
شفوه بيشرب سيجاره واحده
قالو له أكيد صاحبك طلع من السجن
قالهم لأ أنا اللي بطلت سجاير

***************
دايماً أحباب

قلب فاضي

2006-05-10T12:57:00.000+03:30

الإهداء الى من أهدتني حروف الحكاية
لكي تحياتي

****************************
لم تكن المرة الاولى التي يتحاورا فيها
تواعدا مرات عدة قبل الأن
كان يحلم طويلاً بلقاءها
يعشق هو الموسيقى الهادئة وأغاني منير وفيروز
لا تسمع هي سواهم.
تعشق هي الشيكولاتة بأنواعها
يفضلها هو لو كانت سويسرية.
يتعاملا مع العالم من نفس نقاط البدء
يختلفا سوياً على أبسط الاشياء
ويعودا سريعاً ليتفقا على مجمل الحياه.
قالت عنه أنه حاد الطباع في البداية
عادت فقالت أنه " عبيط "
يضحك كثيراً كلما تذكر أنه "عبيط"
قال عنها أنها طفلة سريعة الحكم على الأشياء.
ثم تكشف له كم هي رائعة حين تطلق أراءها المجنونة في كل اتجاه.
مرات عدة ذكر لها كم هي جميلة ورائعة وكم تمنى يتقرب منها أكثر.
في هذه المرة كانت تنوي أن تضع حداً لعلاقتهما المتواصلة منذ فترة
كان سؤالها واضحا ومحدداً
لماذا كل هذا الاهتمام؟
تلعثم كثيراً قبل أن ينطق ببنت شفه
دارت بخياله أفكار كثيرة
سأل نفسه السؤال بشكل أخر عدة مرات.
ماذا تعني هي بالنسبة لك حقاً؟
أنا لم أرها مطلقاً
أستمتع بحوارها
انتظر لقاءها بلهفة طفل صغير
أتعامل معها كحلم جميل
أتمنى تحقيقه
لكنه في النهاية حلم
وأخيرا استجمع كل قواه العقلية واستشق كمية من الهواء تسمح له بأن يجيب بدون خجل
أنا بحبك وبموت فيكي!
أحمرت وجنتاها خجلاً بينما دار بعقلها كيف له أن يتعلق بي وبهذه السرعة
هل هذا مجنون
يبدو أني حين وصفته بالعبط كنت صادقة
ولكن لما لا
وما المانع أن يقع في غرامي شاب مثله
فأنا جميلة
كم من مره رأيت نظرات الإعجاب في عيون من حولي
ولا تنقصني ثقافة يدعي أنه يبحث عنها عند من يهواها قلبه
باعدت عنها خجلها والقت بردها سريعاً
ولكن انت عارف إن قلبي مشغول.
:ولا يهمني سأظل أحاور هذا القلب حتى يكون لي وحدي إن كان هذا هو ما يمنعك من حبي
قال لها لكن هذه إجابة خاطئة هناك إجابة أخرى.
دار بخيالها هل يعلم إدعاءها لقصة حبيبها الغائب التي قصتها له مرات عدة حتى تحمي نفسها من غزله وتودده.
زاد تلعثمها وتوترها.
هل أتعامل مع شخص عبيط كما ادعيت أم حاد الذكاء للدرجة التي يتمكن من معرفة أكاذيبي وإدعاءاتي.
تذكرت تلك الرسالة التي بعث بها اليها
كم تملكها الخوف عليه إن كان تعلقه بها لهذه الدرجة حين قرأتها.
قال في رسالته أنه يعشقها
وتباهى بنفسه كذكر الطاووس حين يبدي أمارات الهوى
وانتظر ردها طويلاً بلا مجيب.
تذكرت كلماته
( قمري انتي فلا تمنعيني نور القمر
شمسي أنتي أستدفء بك من برودة الأيام).
مالت بمقعدها للوراء قليلاً
وفتحت نافذة للخيال.
ولم لا ؟!!.
إنه يحبني كل هذا الحب
يفعل كل هذه الأشياء الطفولية من أجل إرضائي
وحين نكون معاً
يتفتح قلبي للنور أكثر وأكثر
كم حلمت بحبيب أعشقه
أعلم تماماً أنه لن يأتي ممتطياً جواده الأبيض
أعلم تماماً أن عصر الجيد البيض قد ولى.
أحلم به
رجلاً من لحم ودم
نتقاسم سوياً قطع الشيكولاته
وأغاني منير
وأهرام الجمعة للبحث عن فرصة عمل
وشقة للإيجار
سيكون وجهه مألوفاً
بل عادياً
لا يشبه توم كروز أو جورج كلوني
لكن لا بد أن يكون له قلباً لا يسكنه غيري
بدأ قلبها ينبض بقوة أخذت يداها المرتعشة تلقي ردها الأخير القاطع
( وبحبك أنا كمان )
كتبتها على لوحة المفاتيح أمامها
وبينما تضغط على مفتاح الارسال ظهرت لها الرسالة التالية
System fatal error!
Cannot find server or DNS ErrorInternet Explorer
Windows will restart now please safe all your files

المحطة الأخيرة لحسن

2006-04-09T19:18:00.000+03:30

كان يرقد على دكته الخشبية في مدخل الدرب يستقبل القادمين من الحقول والسفر ومدارس القرية والعائدين من الخليج بحقائب السفر وأيام العمل وأجهزة الموبايل الحديثة والمارين بالقرية بحثاً عن الخبز أو إعلاناً لوفاة شخص مهم أو داعين لليالي الذكر.
يقضي يومه يستوقف المارين يسألهم عن أحوالهم وأولادهم وأعمالهم ودرجة الحرارة والساعة الأن وأسعار ما يجلبونه بين أيديهم من حاجيات وأخر أخبار تعويضات حرب الخليج.
تزهد فيه إذا ما رأيته بجلبابه الفضفاض وهيئته الضخمة يحسبه الجاهل درويشاً هائماً على وجهه لكن سريعاً ما يتبدل رأيك إذا تحدث .
كان يحدثنا عن أقمار السماء وفجاج الأرض وإطارات السيارات وموجات الضوء والكائنات الدقيقة وحروف الهجاء وما تبقى له من رحلات السفر.
في ذلك اليوم وقد مضى على سفري نحو الشمال شهور عدة قفلت بعدها عائداً نحو الجنوب فكان هو مستقبلي الأول على أول الدرب، كان مستلقياً يلتصق ظهرة بظهر دكته الخشبية العارية من أي فرش أو طنافس، يفترش خشبها الصلب المقطوع من شجرة أثل قديمة كنا نمتلكها يوماً وقد استحال لونها الأبيض المشرب بصفرة إلى اللون الأسود القاتم من غبار السنين، ارتفعت جفرته عن جانب الدكة الخشبية بينما صدره يرتفع ببطئ معلناً عن إستيلائه على بعض من حيز الهواء المحيط به وبنفس البطء يعود أيضاً في حركة رتيبة تعلن أنه ما زال على قيد الحياة.
أقتربت من للمسافة التي سمحت له برؤيتي، رمقني بنظرة زابلة بينما تحركت شفتاه: مين؟... محمد.
: أيوه يا عمي.
انتظرت أي رد فعل مرحباً بقدومي لكنه لم يفعل، شعرت حينها كم هو متعب، فما زلت أذكر أنه في المرات السابقة كان يصحبني عند قدومي من السفر حتى بيتنا في منتصف الدرب ويجلس معي وقتاً يطمئن خلاله عن أحوالي في الشمال وعن دراستي وعن أمور عدة أخرى، لكنه هذه المرة يبدو متعباً وقد فعلت السنين أفاعيلها مع هذا الجسد الضخم.
: انت جاي من فين يا محمد.
: من مصر يا عمي.
صمت بعدها للحظات بدأ خلالها يجمع الهواء المحيط به ويدفعه بصعوبة داخل جسده الضخم.
يعلم هو تماماً أنني أعمل بالقاهرة منذ سنوات ولكن بدا لي أنه بدأ يعاني من أعراض الشيخوخة التي غالباً ما تلازم كبار السن ولكن هذه الظاهرة لم ألحظها بأحد أجدادي الراحلين ما زلت أذكر "الحاج شاذلي" قبل وفاته بأيام وقد خطى أيامه الأولى من المائة الثانية من العمر وقد جلس يحكي عن تفاصيل دقيقة مرت به منذ عقود من الزمان لم يتذكرها أحد من أبنائه المحيطين به ساعتها ولكنها كانت تفاصيل لأحداث حقيقية قام بسردها بحذافيرها ثم مات بعدها بأيام.
: إيه أخبار المنيا.
قطع بها حسن الصمت الذي جلت خلاله بأيام مضت لا أدري عددها الأن.
: أنا مرحتش المنيا يا عمي.
بدأت أرفع صوتي كي يسمعني: أنا جاي من مصر
بدأ كلامه بهمهمة أعرف معناها جيداً من سابق حواري معه.
: هو القطر ما بيعديش على المنيا؟!.
: أيوه بيعدي بس أنا مرحتش المنيا.
: يعني القطر موقفش هناك خالص!.
: لا وقف شوية بس أنا منزلتش قعدت في الكرسي بتاعي.
بدأ حينها يعتدل في جلسته مستنداً إلى حافة الدكة الخشبية أستغرق وقتاً لا أدري لماذا لم أحاول مساعدته على الاعتدال حينها ربما لثقل حقيبة السفر التي أحملها على ظهري.
: طيب مشفتش أسيوط.
قالها بصوت مرتفع قليلاً وهو يرفع بقية جسده الذي بدا لي للوهلة الاولى ملتصقاً بالدكة
: لا برضه منزلتش دا أنا من ساعة ما ركبت القطر وأنا منتظر أوصل قنا وعايز انزل أزق القطر عشان يمشي أسرع.
بينما أكمل جملتي الاخيرة كان قد أعتدل ظهره تماماً ممدداً ساقيه بطول الدكة
: يعني عديت على بني سويف والمنيا وأسيوط وسوهاج ونجع حمادي ومشفتش ولا حاجة منهم ولا ما شفتش ناسهم.
لم أستوعب الكلام حتى أرد على جملته الأخيرة
كانت الشمس قد استدارت وبدأ شعاعها الحر يقسم الجسد الضخم إلى نصفين، أحدهما كسته الشمس بشعاعها الوهاج بينما ظل النصف الأخر في الظل ، وقبل أن يلتهم شعاع الشمس باقي كتلة الجسد وتلفه برداءها الذهبي بدأ يستدير رويداً رويداً حتى لامست قدماه الارض وأصبح الجسد محاطاً بشعاع الشمس.
لم ينظر لي وكان مطرقا برأسه نحو الأرض : شوف يا محمد وانت راكب القطر متبقاش تستعجل الوصول.
استعدل ظهره ووضع راحتيه على ظهر الدكة وأستكمل : طول ما انت راكب القطر أعتبر كل محطة جايه هي محطة وصولك، في المنيا أنزل المنيا واتفرج على محطة المنيا، وف أسيوط إنزل شوف ناس أسيوط وأول ما القطر يصفر أتشعبط تاني فيه، لغاية ما توصل لمحطتك الأخيرة.
ببلاهة شديدة علمتها الأن كان ردي : وعلى ايه التعب، ما تخليني في الكرسي بتاعي لغاية ما أوصل ولا أنزل ولا أطلع.
بدأ يرمقني بنظرة بدأها من أسفل قدمي وأرتفع بعينيه حتى تلاقت عينيه بعيني، حينها فهمت مقصده من الكلام ولكن لساني الأرعن كان قد ألقى برده السخيف : وعلى ايه التعب.
هز رأسه المحاط بعمامته المفككة وقال في صوت بدا وكأنه صوت أخر لم أعتده ولم أسمعه قبل الأن : محطتك الأخيرة دكة زي الدكة دي، متستعجلش توصلها ، و من هنا ورايح انزل اتفرج على المحطات يا محمد.

مضى على هذا الحديث شهور سبعة علمت بعدها كم كان حسن مخطئاً في تقديره!
ففي صباح أحد أيام الشتاء بينما الشمس توقظ أشعتها النائمة كي تبدأ العرض الجديد لأحد الأيام، بدأت كل الأشعة في التمدد سريعاً منشرة في الفضاء الواسع للكون.
لم تصل لأرض قريتي حصتها من نور الشمس كاملة ، فقد نقص شعاع كان حسن يتدثر به يوماُ على دكته الخشبية.
مات حسن عند الفجر على دكة خشبية أخرى غير التي كان يحدثني من عليها.
هل كان يعرف أنها ستكون محطته الأخيرة؟. تمت