السبت، ديسمبر 16، 2006

صفحات من التاريخ غير الرسمي

الصورة من



http://egyptianeye.blogspot.com


الميلاد

سنة 1978
بس مش عارف قي شهر كام بالظبط
امي بتقول كان القمح محصود
والدريس شغال
سألتها
مش فاكرة اي حاجة حصلت ساعتها:
مش فاكرة يا مي:
ده كان يوم ميلادي
ابويا سجلني في دفاتر المواليد بتاريخ اول اكتوبر
قالي عشان لما تدخل المدرسة
يكون عمرك ست سنين بالظبط

***************


طبل بغوازي


مفش فاكر التاريخ
لكن كان حفلة طهور عماد ابو بكر
كانو جايبين طبل بغوازي
(مزمار بلدي وبنات مازن)
كان التخت (المسرح )جاهز من العصر
كنا بنجهز النبال علشان نلسوع الغوازي بيها وهما بيرقصو
كل واحد من العيال بيظبط الاستك بتاع النبلة
كنت واقف على حافة التخت ( المسرح)
وفجأة
آآآآآآآآآآه
طراخ
مفقتش غير أخر الليل
كنت نايم على حجرابويا
الطبل خلص
والغوازي كانو لابسين هدومهم
والنبلة كانت لسة في جيبي
***************




البينة
انا مش رايح المدرسة تاني
الاستاذ احمد اب عبداللطيف قالنا اللي مش هيحفظ السورة
هيتعبط
ابويا قالي تعالى احفظها لك
طول الليل يحفظ فيا وانا مش عارف أحفظ حاجة
(أبويا فقد الأمل في ابنه انه هينفع في التعليم)
الصبح ابويا خدني من ايدي ورحنا على بيت الاستاذ أحمد
اتفق معاه انه ميضربنيش
لغاية ما أحفظ السورة
لغاية دلوقتي مش بعرف أحفظ أي حاجة
ولسة محفظتش سورة البينة
سنة 2005 وبعد عشرين سنة
علا دخلت عليا يوم
محمد انا انهاردة حفظت سورة البينة في المدرسة:
هسمعها لك:
بعد ما خلصت
انت حافظها يا محمد:
يلا يا علا انا مش فاضي دلوقتي:
والله شكلك مش حافظها:
يلا يا بت:
أدي اخرة اللي يلعب مع العيال:
قال مش حافظها قال
:
********************

سلاعة
سلاعة النخل هيا شوكة جريدة النخل
ويمكن مش بتسميها سلاعة الا لو كانت شوكة بجد
أعتقد انها السلاية في المثل المشهور
(في الوش مراية وفي القفا سلاية)
كنت راجع من الحرجة
حجري كان مليان نجيل ودفرا
وقدام بيت سعدية شورة
كانت بداية المأساة
سلاعة نخل استقرت في رجلي
( بحاول افتكر الشمال ولا اليمين مش فاكر)
صرخت بكل عزمي
شالتني سعدية شورى لبيتنا
انا بصرخ من الألم
وفريق من نساء الشارع بيتشاورو على الطريقة التي سيتم بها اخراج السلاعة من رجلي
اتكون فريق بقيادة سعدية شورى
استخدمو كل ما طالته أيديهم
لفتح رجلي
ابر خياطة
ملقط
سكين
دون النظر للصراخ الصادر مني
أغمى علي من شدة الألم
ثلاث ساعات متواصلة حتى جاء والدي لينقذني من بين ايديهم
خدني للوحدة الصحية في الخطارة
(بلدنا مكنش فيها وحدة صحية ساعتها)
الدكتور سألني عن أسمي
وقلي تعرف تعد من واحد لعشرة
واحد
تنين
تلاتة
اررررب
……..
كان طولها حولي اتنين سم

التسميات:

5 Comments:

At السبت, ديسمبر 16, 2006 10:18:00 م, Blogger Geronimo said...

يااااااااااااه
أخيرا كتبت عن الحاجات اللى كان نفسي اسمعها منك
عارفة انه لسه في تفاصيل وتفاصيل
ياريت تحكيها بجد
والنبي متنساش ترجمة للحاجات الصعبة
يعنى ايه ؟
الحرجة
نجبل ودفرا

بجد لازم تكتب عن الحاجات دي وتفكرني بريحة بلدنا وخضارها

مستنية

 
At الأحد, ديسمبر 17, 2006 3:15:00 م, Blogger labido said...

ايوه يامحمد سمعني ريحة بلدنا
دي حكاوي البرد والمطر والسقعة الجامدة
احنا محتاجين شوية دفا
وياريت متنساش حبتين درة مشوية علي كوالح في وسط الغيط
..
.. دا انت طلعت من قعر الريف ياوله
سمعني واشجيني
..
عبد الفتاح

 
At الثلاثاء, ديسمبر 19, 2006 4:34:00 م, Blogger أبوشنب said...

Geronimo
ترجمة المفردات الصعبة

الحرجة كلمة عربية فصيحة تعني الاشجار المتشابكة وفي بلدنا نطلقها على الغيطان

النجيل هو نبات عشبي ينبت على الدرابيس ونقوم بحشة لتغذية الامعز والارانب

الدفرا شرحة نبات عشبي ايضا وله نفس الخواص

labido

انت القميص والبنطلون غروك يا باشا

لا يا مونشييير

احنا من اصعيد الجواني قوي

وسمعني احلى سلام على طول السلام

لكل اللي لابسين العمة البيضا

 
At الجمعة, يناير 12, 2007 4:52:00 ص, Blogger ابوعباس said...

انت محظوظ جدا يا صديقى ابو شنب لانك صادفت سلاعه نخله
لكن الادهى والامر لو انك اصبت بسلاعه السنط
وتعالى قابلنى لو لقيت دكتور يعرف يطلعها
اخوك د سعد ابو عباس

 
At الجمعة, مايو 01, 2009 1:55:00 م, Anonymous غير معرف said...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

 

إرسال تعليق

Links to this post:

إنشاء رابط

<< Home

اسمع