الأربعاء، نوفمبر 29، 2006

إستقالة


بعد عدة مشاكل في الشغل اللي انا فيه
امبارح قدمت استقالتي
مش عارف هرجع مصر اعمل ايه
الوضع هناك غير مريح ليا بالمرة
الغربة بتلهيني عن مشاكل كتير لو رجعت هتزرع جواها
أصحابي كلهم مسافرين
سامح ليبيا
مصطفى الكويت
عبدالناصر السعودية
وائل الكويت
يعني لو رجعت البلد هحس بغربة اكبر من اللي انا فيها
بالاضافة للمشاكل الاخرى
يمكن ابسطها البحث عن شغل جديد
بفكر استمر هنا حتى لو هشتغل ببلاش
ومهما كانت الظروف اللي هنا
فأكيد هتكون أرحم من مصر
كفاية هنا اني بمشي في الشارع من غير ما حد يقولي بطاقتك يا استاذ
ثم انه كفاية استقالات
دي هتكون رابع استقالة في خلال 4 سنين
لازم اقلل من الحساسية والثورية الزيادة اللي عندي
واكبر الجمجمة وأعيش زي الناس ما هي عايشة
يمكن ساعتها اقدر احوش واعمل بيت زي البني ادمين
ولو حد قالي يا حمار
ابص له واضضحك
من غير ما ارد عليه واقوله شكرا يا فندم
نفسي اقدم استقالة من عقلي وتفكيري
واعيش مبسوط باقي الايام الجاية من عمري
من غير ما افتكر اي حاجة
ولا اشيل همكم يا جماعة
متزعليش مني يا أمي
رزقي ورزقكم على الله

18 Comments:

At الأربعاء, نوفمبر 29, 2006 1:45:00 م, Anonymous غير معرف said...

والله انت كنت وحشنا جدا بس اول ماتيجى تزعلنا كده ..ربنا معاك

 
At الأربعاء, نوفمبر 29, 2006 2:17:00 م, Blogger radwa osama said...

مش عارفه ارد اقول ايه ..بس كلامك وجعني قوي ..بكره اكيد احلي

 
At الأربعاء, نوفمبر 29, 2006 5:19:00 م, Blogger ME said...

مريت بنفس الموقف ده .. كنت حاسة إنى هموت لو ماسبتش الشغل .. و كنت عمالة أفكر إنى ورايا مسئوليات .. مكن تكون هبلة بس اهى مسئوليات .. بس إستقلت و قلت لأمى نفس الكلمة "رزقى ورزقك على الله" ... وربنا رزقنى بشغل بعدها بأسبوعين بمرتب أعلى .. طول ما ربنا معاك ما تخافش

 
At الأربعاء, نوفمبر 29, 2006 7:12:00 م, Blogger Geronimo said...

كله بيعدي
اومال فين المقاوحة والعناد يا باشمهندس

 
At الأربعاء, نوفمبر 29, 2006 8:03:00 م, Blogger Dananeer said...

قدرالله و ما شاء فعل
ربنا يعينك و تلاقى شغل تانى
مبيبقاش سهل على الواحد ياقلم نفسه على الغربه و يرجع
الغربه وسط الناس بتكون وحشه اوى

انا لسه كنت بافكر زيك
عايزه ابعد بعييد عن كل حاجه
حتى لو التمن بعد و غربه

بس ساعات كتير باحس ان هنا فيه حاجات كتير تستاهل

 
At الخميس, نوفمبر 30, 2006 1:11:00 ص, Blogger كراكيب نـهـى مـحمود said...

بكرة أكيد احلى متقلقش
سيب اديك للفضا الوهمي وطير

 
At الخميس, نوفمبر 30, 2006 4:30:00 ص, Blogger hesterua said...

ولا يهمك يا ابن عمى
انشاء الله هتعدى وتفتكر وتضحك
ربنا هيكرمك انشاء الله

 
At الخميس, نوفمبر 30, 2006 6:12:00 ص, Blogger Ahmed Shokeir said...

عند اول محطة كده استقالة

العمل بالخارج محتاج جلد وصبر وحنكة ، الانفعالات الثورية لن تحل الامور

اسعدني تذكرك للاحوال في مصر فسوف تكون بالتاكيد عامل مساعد لكي تتخطى الازمة

 
At الخميس, نوفمبر 30, 2006 8:38:00 ص, Blogger أبوشنب said...

Anonymous

طيب لما وحشتكم

عرفونا انتم مين

عشان نعرف نرد


radwa osama

سلامتك من الوجع يا رضوى

وبكرة أكيد أحلى


ME

دايما بأطالب بمساوتنا مع المرأة

خاصة في مثل هذه اللحظة

بيكون سهل عليها انها تسيب اي حاجة

ولا بيهمها

أحيانا المسئولية بتكون أكبر من ان كلمتي تكون من راسي

لأن فيه ناس تانية هتتأثر بأي قرار ليا

رزقي ورزقك على الله


Geronimo

راحو كلهم يا جيرو

أول ما قالت لي

"بحبه يا بابا"

Dananeer

متفكريش تاني زيي

عشان اللي بيفكر زيي بيتعب يا دانا

ارجعي يا مجنونة

لسه فيه حاجات كتير تستاهل

كفاية عربيات الفول اللي مالية البلد

فينك يا عبدة دولار


كراكيب

حلوة قوي قوي يا كراك

سيب اديك للفضا الوهمي وطير

وجدتها وجدتها

هيه دي


hesterua

ربك كريم يا ابن عمي

الا انت اخبارك ايه

عايزين نقابلك مرة يا اخي


Ahmed Shokeir

ما هو كله بسببك

اتبعت نصائحك عن الموظف المثالي

وجرالي اللي جرالي

 
At الأحد, ديسمبر 03, 2006 2:24:00 م, Blogger أبو أمل said...

يا باشمهندس
ده انت حالتك متشحورة خالص
طب ما تفضفض
احسن يجرالك حاجة
الحمد لله ان شهر سبعة عدى
طبعاً عارف سبعة وحكايته
مع الضبعيون

اهتم بنفسك انفعالياص
واستحمل
وإلا الدرباس
فى انتظارك
بالتوفيق
وربنا معاك
سلالالالالام

 
At الاثنين, ديسمبر 04, 2006 4:23:00 ص, Blogger voice of love said...

أنا غايبة بقى لى فترة نظرا لظروف صحية وأول ما رجعت وحبيت أطمن عليك لقيتك بتبلغنا بالخبر ده
عموما قدر الله وما شاء فعل
ربنا يقدر لك الخير
وان شاء الله هتلاقى أحسن من اللى فات
واذا كان أصدقاءك مسافرين فاحنا كلنا جنبك ومعاك
أمنياتى بالتوفيق

 
At الاثنين, ديسمبر 04, 2006 1:48:00 م, Blogger labido said...

كل شيء بقدر الله يامحمد
زي ما تكلمنا واتقابلنا
الامور كلها مفدرة
والسعي مطلوب وكمان زي اخونا الكبير احمد شقير ماقال لازم تصبر
وبعدين تعالي عندي اقرا قصيدة ليس الغريب


عبدالفتاح

 
At الأربعاء, ديسمبر 06, 2006 6:01:00 م, Blogger change destiny said...

يا سيدس ربك بيسهلها

و بعدين بذمتك موحشكش زحمة مصر و طوابيرها


welcome back

 
At الخميس, ديسمبر 07, 2006 2:27:00 ص, Blogger شجره الدر said...

شنوبى وحشتنىىى
اوعى تكون نسيت مين اللى كان بيقولك شنوبى
على العموم كلامى مش هايزيد عن كلام جيرو كتير
فين روح المقاومه هو عند اول ملف هانروح نعيط ونجرى
الله
هو ايه النظام لازم تبقى اقوى من كدا صحيح الرزق على الله
لكن الواحد برضه لازم يستحمل
الصبر اخره خير ياشنوبى ولا ايه؟

 
At الخميس, ديسمبر 07, 2006 7:07:00 ص, Blogger أبوشنب said...

أبو أمل
والله ما في حاجة مصبراني على الغلب

غير قعدة الدرباس

ووشاشكم ساعة المغربية والبؤس ماليها

انت وعبدالرضى وشحات وجحمار وكل شباب الدرباس


voice of love
الف سلامة عليكي
وتكون أخر العمليات ان شاء الله
وشكرا ليكي على الدعم المعنوي يا فندم


labido
ونعم بالله يا باش مهندس
توكلنا على الله


change destiny

من جهة وحشتني

وحشتني قوي ببصراحة يعني

روح يا شيخ ربنا يسامحك

أقول افيك ايه

كفاية اللي بيحصلك في طابور المترو



شيكولاتايه
الله
بتفاءل بيكي أول ما بحس بيكي حواليا يا شيكولاتاية
ربنا يخليكي لينا يا أحلى شيكو

 
At الخميس, ديسمبر 07, 2006 8:46:00 م, Blogger smraa alnil said...

اياك ان تستسلم لرياح الهزيمة
قول الحمد لله وريحبالك ومش تفكر وسيب اجرك علي الله
وطالما حسبتها ان رزقك علي الله
فان شاء الله ربنا هيزيدك ويرزقك ويعوضك باحس من اللي كنت فيه
بس انت قول يارب

 
At الأحد, يوليو 22, 2007 3:30:00 م, Anonymous يحيى الشناوي said...

الحمد لله اهو ربنا وفقك ورجعك تاني وبعدك عن المشاكل بس صدقنى مصر حلوه مش زي منتا فاكر حتى بمشكلها
الثوره مش عيب
والقرار كان سليم ومش محتاج والهدي مينفعشي تبكي عليها

يحيى على

 
At الجمعة, مايو 01, 2009 1:54:00 م, Anonymous غير معرف said...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

 

إرسال تعليق

Links to this post:

إنشاء رابط

<< Home

اسمع