السبت، سبتمبر 22، 2007

يوميات رمضانية

1

بكرة اول يوم رمضان كل سنة وانتم طيبين
عمنا جوزيف
المدير بيتصل بيا
وات از يور ارانجمنت فور رمضان موهامد
بيني وبيني نفسي يخرب بيت امك يا شيخ
يس بوس ال ماي فورمنز ار مسلم سو اي ويل قو افري دي ات سيكس ويز ون فزرمان هوم ويل بي تشانجيد افري داي
كدة يعني لازم اعمل فيها جدع
بطريقة دي انا هفطر المغرب كل يوم في العربية وانا رايح الشغل
وهتسحر في الشغل
يلا
احسن
لو قعدت في البيت لوحدي هقلب المواجع على نفسي
من سته لسته
خير ان شاء الله


2

عبدالكريم
ده مسلم فلبيني حدوتة لوحده
انت هتصلي التراويح
ايوه
طيب نسيب الموقع ونروح نصلي احنا الاتنين
ما ينفعش

انت تروح يوم وانا يوم
خير ان شاء الله
احسن من بلاش
*************

3
الامام لازم يلقي خطبة بين التروايح
ما تخلص يا مولانا
ورانا شغل
والتليفون مش بطال
زوووو
زووووو
عامله سيلنت
المهم
في الوتر
بدأ يدعو
والله اخد اكتر من ربع ساعة
يا سيدي قصر وادعي بجوامع الدعاء
بدل الهرتلة اللي عمال تقولها
ربنا يصبرنا
لا انا من بكرة ما اصليش الوتر معاه
****************

3

القطري يرتدي جلابيته البيضاء المميزة والشماغ الابيض
الهندي اما زيه القومي - حتة قماش حول وسطه
او قميص وبنطلون
السوداني بعمامته البيضاء وجلبابه الواسع
شرق اسيا غالبا قميص وبنطلون
المصري
بعضهم اتى ببيجامة النوم
او تريننج سوت
اوجلابية بيضاء
او قميص وبنطلون
او ملابسه الداخلية - الكالسون
هيه دي مصر ولا بلاش

***********
4

ايوا يا ابوي
انا في جدة دلوقتي
هركب الباص لضبا
هكون هناك على الفجر
وعلى اخر النهار هركب العبارة


مكالمة تانية
ايوا يا ولدي
انا ركبت العبارة
اتحركت ليها ساعة
اوصل الفجر انشاء الله سفاجة


الحمد لله ابويا راجع
كفاية غربة يا حاج
قال لي انه اشترى لي جلابيتين جداد
فرحت قوي
بالرغم اني اقدر اشتري لنفسي كل حاجة
بس بفرح بأي حاجة ابويا يشتريها لي
على رغم عمري الذي يقترب من الثلاثين

مكالمة:
ايوا يا حاج
انا ركبت الباص يا ولدي ومروح على البلد

مكالمة
انت فين يا ابوي
انا في الدير يا ولدي ، كلم خواتك ينتظروني

مكالمة
ايوا يا اختي
ابويا قدامه عشر دقايق ويكون معاكم

مكالمة
ايو يا ابوي
انا وصلت يا ولدي كمل نومك انته
الف حمدالله بالسلامة يا حاج

طول الطريق كنت فرحان ان والدي راجع من الغربة
اخيرا يا حاج
كفاية كدة سفر
اخيرا هشوفك بعد تلات سنين غربة
لما وصل اكتشفت انه انا حاليا اللي متغرب
هو وصل البلد بالسلامة
وانا اللي متغرب

كمان سنة يا حاج واشوفك

هيكونو اربع سنين
نسيت اقولك ان شعري خلاص بيقع
وبقيت اصلع على خفيف
عشان ماتهش عني بعد سنة كمان
*****************
5

لغاية دلوقتي مش عارف اخلص رخصة السواقة
معايا امتحان قريب يا جماعة
ادعو لي
نفسي يبقى معايا رخصة سواقة
كفاية سواقين كرهت شغلي معاهم والله
شمال يمين شمال يمين
توب علينا يا رب
*****************
6

اخر ايام الرحمة
واول ليالي المغفرة

اللهم اغفر وارحم
وتجاوز عما تعلم
انك انت الاعز الاكرم
وصلى اللهم على محمد واله وسلم

التسميات:

8 Comments:

At السبت, سبتمبر 22, 2007 12:30:00 م, Blogger أبوشنب said...

حمدالله بالسلامة يا حاج
واشوفك على خير ان شاء الله
ادعي لي يا بوي

ولدك

 
At السبت, سبتمبر 22, 2007 10:03:00 م, Blogger labido said...

كل سنة وانت طيب يابو شنب انت وكل العيله
وعقبال كل المتغربين يرجعوا بالسلامة
هاتفطر معايا امتي
ما نا في طريقك وانت رايح الشغل

 
At الأحد, سبتمبر 23, 2007 2:16:00 ص, Blogger Ahmed Shokeir said...

نقلة جامدة أوي نقلتهالنا من رمضان في بلدنا ورمضان في الغربة
حياة تانية وطريقة تانية وناس تانية ووجوه مختلفة وجنسيات غريبة

عجبني ملابس المصلين بملابسهم المتلفة .. ضحكتني كتير بصراحة على المصري بتاع كله

كل فقرة لوحدها تستاهل بوست

كل سنة وانت طيب

 
At الأحد, سبتمبر 23, 2007 5:14:00 ص, Blogger Geronimo said...

فى كل بيت
في اوضة للمسافرين ..
الضيوف ..
اللى جايين على مسافرين تانيين
ضيوف زيهم




مبروك الجلابيتين
بس يارب لما ترجع بعد سنة
متلاقيش اخوك الصغير لابس واحدة
وجوز اختك لبس التانية
ساعتها هتبتسم برضا شديد
وتقول كل شئ نصيب
ماهو انت هاتبقى جايب معاك جلاليب تانية
مفيهومش ولا واحدة مقاسك



سامحنى يا صاحبي

زعلانة على الغربة اللى من غير تمن

واحنا بنفلسفها ونحط لها معاني جميلة

بادعي ربنا يقويك عليها
وينجيك من طاحونتها
ويحافظ لك على ما تبقى من شعر راسك عشان يقدروا يعرفوك لما
ترجع بالسلامة ان شاء الله
وحمد لله على سلامة الوالد




:(

 
At الجمعة, سبتمبر 28, 2007 2:29:00 ص, Blogger bondok said...

معرفش ليه دلوقتى افتكرت يوم فطرنا فيه مع بعض على السطوح
افتكرت يومها لما صلينا الجمعة
واشتريت الجرجير وكام لميمونة
وجرنال الجمعة
والفول والطعمية من عند ابو عبدالله
وكام كيلو منجة

كنت ساعتها طالعة عينك في الشغل
وكله مشاكل ولا جايب همة
بس متهيلى كنت مبسوط
كنت حاسس انك عايش
كنت ببصلك من تحت كنت اطول منى بكتير

كنت بمشي معاك في شوارع القاهرة
زي اي عيل صغير ماشي مع ابوة
في صباح عيد
وكانت كل كلمة منك عيدية
وكل مشوار رحلة
وكل نصيحة قران

كل رمضان وانت طيب يابوي
وربنا يرجعك بالسلامة

 
At الجمعة, أكتوبر 05, 2007 2:05:00 م, Blogger حازم شلبى said...

كل سنة و انت طيب يا زميل الغربة .. ايه يا ريس رمضان قرب على النهاية و انت صايم عننا ليه فين بوستاتك اللى بتقلب علينا المواجع عل المانع خير .. تحياتى من الكويت الى الدوحة الى صديقى صاحب الشنب و الشعر الذى شارف على الاختفاء مثلى

 
At الثلاثاء, نوفمبر 20, 2007 3:00:00 م, Anonymous عجلاتي ابن الحته said...

انا عايز اعرف انت جبت ابو شنب دي منين انا اسمس شنب اصلا اه والله


kanoregal.blogspot.com

 
At الجمعة, مايو 01, 2009 1:59:00 م, Anonymous غير معرف said...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

 

إرسال تعليق

Links to this post:

إنشاء رابط

<< Home

اسمع