الأربعاء، يوليو 11، 2007

يسلم فمك يا ابو الغيط

وقال‏:‏ إن مشروع القانون بالشكل الذي أقره مجلس النواب يطالب مصر بالوفاء بثلاثة شروط‏:‏

أولها‏:‏ إغلاق الأنفاق المزعومة لتهريب الأسلحة بين رفح وغزة‏.‏والشرط الثاني‏:‏ إعادة تأهيل وتدريب الشرطة المصرية للتعامل مع مسائل حقوق الإنسان‏,‏

والشرط الثالث‏:‏ الفصل بين ميزانية وزارة العدل وميزانية القضاء في مصر‏.‏وقال أبوالغيط‏:‏ أن مصر رفضت بشكل واضح هذه الشروط‏,‏ وإن رسالة مصر التي نقلها إلي الإدارة الأمريكية أنه يجب عدم وضع شروط علي العلاقات المصرية ـ الأمريكية‏,‏ وأنه يتعين الاستمرار في تعزيز هذه العلاقة‏,‏ وإن هذا شأن داخلي خاص بالمصريين‏,‏ ولا يحق لأي طرف أن يتدخل فيه بالتوجيه حتي ولو كان ثمنه‏200‏ ألف مليون دولار‏,‏ وليس مجرد‏200‏ مليون دولار‏.‏ ( الاهرام 11 يوليو 2007 – العدد 44046 السنة 131 )

مش عارف الجماعة الامريكان دول عايزين ايه مننا بالظبط بصراحة
عالم غريبة يا اخي
حاشرة نفسها في كل حاجة
قالو لنا نتصالح اتصالحنا
قالو لنا نتمقرط اتمقرطنا
قالو فرجونا على عجين الفلاحة
اتنططنا
طلبو مننا لبن العصفور
حلبناه
شالو الضو
وجابو شاهين
قلنا برضو معاكو لاعبين
لكن كل كووم
وإعادة تأهيل الشرطة بتاعة بلدنا عشان حقوق الانسان
لا بجد
والف لأ
وعلى جثة اخر فرد من افراد الشعب المصري
قولو آميين
ازاي يعني
ده حتى ما يرضيش ابدا
إعادة
إعادة يا كفرة
إعادة يلي ما بتعرفوش ربنا
****
وكله كوم وموضوع الميزانية بتاعة الوزارة دي كوم
ازاي يعني
هو حد اشتكى لكم من حاجة
ما طول عمرنا زيتنا في دقيقنا
وميزانيتنا وطنيتنا حماها الله
الله الله
وبعدين هو انتو في بلدكم بتقولو يا ما السجن مظاليم
احنا عندنا بنقول يا ما في السجن مظاليم
طب لما نفصل الميزانية
المثل ده نوديه فين
نبله ونشرب ميته مثلا
استغفر الله
استغفر الله
عالم ما تعرفش ربنا بصحيح
*******
خاتمة القول
مصر هيا امي
نيلها هو دمي
شمسها ف سماري
شكلها في ملامحي
حتى لوني قمحي
فضلة خيرك يا مصر

التسميات:

5 Comments:

At الخميس, يوليو 12, 2007 2:30:00 ص, Blogger Bella said...

من حقهم وبفلوسهم

مش احنا شغالين شحاتين عندهم وبنمد ايدينا للمعونة

نشرب بقى

حتى لما بيهددوا بتخفيض المعونة بنطلع نعيط زي العيال

اشمعنى دلوقتي طلع لنا لسان وبنتناقش معاهم
لا وبنملي شروطنا كمان

هههههههههه

والله عال

 
At الخميس, يوليو 12, 2007 2:51:00 ص, Blogger Geronimo said...

هما الامريكان بيحطوا لنا العقدة في المنشار

ناقص يقولوا لنا نظموا المرور

ولا مثلا ناموا بدري واصحوا بدري

ولا حافظوا على مواعيدكوا

اما طلبات غريبة صحيح

هما ميعرفوش ان الله لا يغير ما بقوم حتى يغيروا ما بأنفسهم

وميعرفوش اننا مستحيل نتغير

لاننا راضيين

وصابرين

وقانعين

ولا مباليين

وخدنا ع الفقر

جت يعنى على المعونة ولا هي يعنى هتروح للمصريين

يارب يمنعوها عشان اللى بيسرقوها يتغاظوا ويمكن دمهم يتحرق ويتفرسوا ويا سلام لو ضغطهم يعلى

وهذا اضعف الايمان

ههههههههههه

بوست لذيذ

 
At الخميس, يوليو 12, 2007 11:51:00 ص, Blogger شجره الدر said...

مصر هى امى
واجدع سلام للضوء الشارد وذئاب الجبل والمطاريد
وسلملى على جوزك ياسماعيل بيه
والله الناس دى لسه عنها امل
مالنار مسكت فى الجرن والغيطان غرقت من زمان
شنوبى
صباح الخير
او مساها
وحشتنا ياراجل
ببعتلك السلام ياترى بيوصل ولا الناس بتاكله فى زحمه الدنيا

 
At الأحد, يوليو 22, 2007 4:12:00 م, Anonymous يحيى الشناوي said...

دا احنا صحيح معندناش دم
بنشحت وكمان بنتأمر
وعجبي

 
At الجمعة, مايو 01, 2009 1:57:00 م, Anonymous غير معرف said...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

 

إرسال تعليق

Links to this post:

إنشاء رابط

<< Home

اسمع