الخميس، يناير ٢٦، ٢٠٠٦

إحتجاج

هذه المدونة ليست لي ولكن لها هي
صاحبة أجمل إبتسامة وأروع عقل حاورته يوماً ما
كتبتها في لحظة إحتجاج ، لحظة قهر وذلك بعد علقة سخنة من الست ماما

أنا أحبك يا أمي وأعشقق لاكن أنت لما تكوني تضربيني أنت لا يكون لكي حق لأن عبير هي التي تغلس عليا وتخليني أتنرفز غير كده لما أنت تضربيني لا أكون أزعقلها ولا عملتلها حاجة خالص هي التي تزعق فيا ، وهي عارفة أنا لما باجي أدايق حالتي بتبقى عصبية وممكن أعمل أي حاجة بس مش فيكي .
مين الذي يغلس على مين؟
مين الذي يعمل كل حاجة؟
وخصوصاً محمد كل أم أجي أقوله حاجة فهو يزعل وأنا مبحبش كده
طبعاً لازم تكوني عرفتي مين الذي يكون غلطان وأنا طبعاً لازم تكوني عرفتي مين الذي يكون غلطان
وأنا طبعاً مفيش غلط في الكلام الذي يكون مكتبلك في الجواب.
وأنا بقولهالك من دلوقتي لازم لما تكوني هتضربي حد لازم تعرفي مين الذي يكون غلطان
في هذا الغلطة وتضربيه لاكن مش معقول هتنزلي فينا كلنا ضرب
إنت كده تضربيني من غير لا ما أكون عملت حاجه غلط

وشكراً علا

أعشقق تنطقها علا أعشكك وأصلها في اللغة أعشقك
عبير أختها الأكبر ذات العشر سنوات
محمد ،،،،،، دا أنا أكبرها بعشرين عاما كاملة ونشترك في نفس يوم الميلاد 1 أكتوبر
علا في الصف الثاني الابتدائي الأن وقد كتبت الرسالة وتركتها لأمها بجوار السفرة قبل أن تحمل حاجياتها في شنطة كبيرة وتترك المنزل وتهرب إلى المدرسة مبكراً لتلحق بطابور الصباح

التسميات:

12 Comments:

At الأحد, يناير ٢٩, ٢٠٠٦ ٧:٥٩:٠٠ ص, Blogger mindonna said...

:)

 
At الاثنين, يناير ٣٠, ٢٠٠٦ ٢:٥٥:٠٠ ص, Anonymous غير معرف said...

انا ماكنتش قادرة امسك روحى من الرفرفة وهى بتقرا البوست ده
وهى كلمة واحدة اللى طلعت منى
يا ختشى عالسكر

 
At الأربعاء, فبراير ٠١, ٢٠٠٦ ٩:٣٥:٠٠ م, Anonymous غير معرف said...

السلام عليكم
اخبارك يا بطل؟فين اراضيك هذه الايام؟فى مصر ولا البلد؟
وايه عملت فى موضوع
.......التجنيد؟
انا متابع كتاباتك ع الموقع اول باول ..يعطيك الف عافيه
من اول سطر قراته....عرفت ان العريضه كتباها علا وذلك من سطوه عبير
لو موجود فى مصر....ساكن فين؟
انا الحمدلله كويس ومستنى الصيف بفارغ الصبر دعواتك معانا
لو عايز اتصل عليك اتصل ازاى....رقمك الجديد؟؟؟
سلام
مصطفى

 
At الأربعاء, فبراير ٠١, ٢٠٠٦ ٩:٥٢:٠٠ م, Blogger أبوشنب said...

Dalia Fouad

علا بتسلم عليكي يا داليا
وبتشكرك على تضامنك معاها


mindonna

انتي بتبتسمي على ايه يا مندن
مش تحاولي تشوفي حل
او تقولي حاجة لماما

fengan ahwa

شكراً يا ابله
أنا اسمي علا
وبروح المدرسة
وبعد من واحد لعشرة

القضية أكبر من ياختشي عليها

مصطفى
أنا في اقاهرة
0121925091

 
At الأربعاء, فبراير ٠١, ٢٠٠٦ ٩:٥٤:٠٠ م, Blogger أبوشنب said...

الردود السابقة لعلا بعد أن قمت بطابعة البوست وعرضه عليها

 
At الخميس, فبراير ٠٢, ٢٠٠٦ ٤:٠٢:٠٠ م, Blogger S H E B A K said...

امممممم

بدرى يعنى
;-P

 
At الأحد, فبراير ٠٥, ٢٠٠٦ ٨:١١:٠٠ ص, Blogger Unknown said...

يا علا اصله ساعات برضه هى مبتبقاش عارفة هى عايزة تضرب ليه ؟ تضرب مين ؟ تضربه ازاى يعنى ؟ وامتى ؟
بتبقة عصبية وزعلانة من حاجات كتير
وحاجات مضايقاها باينة ف عنيها ورعشة ايديها ونرفزتها
ساعتها بتكون المساواة ف الظلم عدل
وبتضطر تحط كله على بعضه وتدور الضرب
والصح ف الوقت ده يا علا اننا نستحمل
عشان هي ماما
بس برضه منسكتش
زي ما انتى عملتى بالظبط انتى كتبتي الجواب ومسكتيش ع الظلم
وبكرة لما تكون ماما رايقة وعنيها بتضحك اقعدي على حجرها وقولى لها ليه ضربتينى ... وفهميها انك مكنتيش غلطانة ... بس لازم عنيها تكون بتضحك وخدها الناعم لامس شفايفك تقوليلها .. ومتخافيش طالما بتقولى الحق ... وان شاء الله ماما مش هتزعلك تانى يا قمر
ابو شنب
بعد اذنك خدت رقمك
بس مش عارفة لو كلمتك اقول مين معايا
اقول استاذ ابو شنب معايا

 
At الأحد, فبراير ٠٥, ٢٠٠٦ ١١:٠٦:٠٠ م, Blogger أبوشنب said...

Emad
واحدة بواحدة يعني


Geronimo



مش هقدر أرد عليكي

هأطبع الرد وأعرضه على علا وأشوف ردها

بالنسبة للتليفون

أنا هأبعت ليكي على الميل بتاعك التفاصيل

 
At الاثنين, فبراير ٠٦, ٢٠٠٦ ١:٤٨:٠٠ ص, Blogger ruby said...

بصراحة علا دى زى العسل مضربش ابدا حتى لو غلطت
تحياتى يا ابو شنب
بوست دمة خفيف
وبلغ تحياتى لعلا وام علا

 
At الاثنين, فبراير ٠٦, ٢٠٠٦ ١٢:١٢:٠٠ م, Blogger sonia said...

يروحى عليها ......انتا شرير خاليص ..أنا لو عندى اخت بالجمال دا مكنتش خليت حد يقربلها ولا حتى ماما وبابا...ألى العزيزه علا انا متضامنه معاكى ياعلا عشان انا كمان مامتى بتظلمنى وبتعاقبنى وانا بكون مظلومه ..لما مامتك تظلمك تانى اعملى موقف احتجاج وسيبيها تعمل اللى هيا عايزاه من غير متتكلمى او حتى تدافعى عن نفسك قليلها ربنا يسامحك واقفلى اوضتك عليكى ومتطلعيش منها ولا حتى تاكلى ولا اى حاجه وبعد مينامو املى اوضتك بالزخيره عشان تفضلى كدا يومين كمان ......وابقى ادعى لسونيا لما مامتك هيا اللى تيجى تصالحك

 
At الثلاثاء, فبراير ٠٧, ٢٠٠٦ ٢:٤٥:٠٠ م, Blogger sydalany-وش مكرمش said...

بما إن الشيكولاتة لسة جزء من حياتي
فبكل ما فيا من طفولة

حسيت كل كلمة إنت قلتها

هايل

 
At الثلاثاء, فبراير ٠٧, ٢٠٠٦ ٨:٠٥:٠٠ م, Blogger Ahmed Shokeir said...

شوف بأه ياأبو شنب
أولا إكتشافك للخطاب وملاحظتك إنه ينفع بوست ده في حد ذاته حس ادبي

ثانيا وبدون فذلكة الخطاب بنفس لغته كده ينفع يكون ملخص شديد جدا لعالمنا الثالث أو المتخلف والمظلوم فى النظام العالمي
يعني علا دي تنفع تكون فلسطين أو سوريا او أفغانستان وطبعا ماما هي أمريكا والباقي بما فيهم إنت بقية العالم ولغة الخطاب الرقيقة والركيكية ممكن تعبر كمان أد إيه الإحساس بالظلم بس مش قادرين نعبر
وأخيرا

مين الذي يغلس على مين؟
مين الذي يعمل كل حاجة؟
مين الذي يكون غلطان؟

 

إرسال تعليق

<< Home

اسمع