أول مرة تحب يا قلبي
الإهداء هذه المرة لكي أنتي وحدكقلت لك انتي كل حاجة ليا
ومش راضية تصدقيني
فشوفي اللي جرالي بسببك
يمكن تصدقي
********************
بتحب
قول ايوه..... يا لأه
ممكن يكون كل واحد فينا مر بتجربة حب
على فترات متعددة من عمره
من ساعة بنت الجيران اللي كنت بتلعب معاها على بسطة السلم
أو في مدخل العمارة
أو في دروب البلد
و براح الغيطان
أو التلميذة أم ضفاير بتاعت ابتدائي
البنت الأمورة
أم شعر ناعم
وكراساتها متجلدة ونضيفة
وبتجيب سندوتشات جبنة وبيض كمان
أو حتى في إعدادي
أو ثانوي
والبت اللي حبيتها
خرطها الخراط
وصبحت
زي السندريلا
في كتب الحواديت
بخدود ناعمة
وشعر طويل
وشفايف زي حبات الكريز
كل ده ممكن
بس الأكيد الأكيد
انك هنكرت شوية في الجامعة
ومشيت مع شوشو شرشر
أو نهى أستك
أو حتى كنت واد بيئة ولا مؤاخذة
عادي يعني يا جماعة
واتلميت على واحدة من بنات دبلون
ورحت قابلتها في المترو
وخدتها لفتين
مرج – جيزة
جيزة – مرج
ويا هئ
يا مئ
يا تربئ
أو كنت عايش في دور عبده الفاهم
والمحاضرة بتاعت انهاردة مكتبتهاش
وكشكولك يا بشمهندسة
أو يا دكتورة
أو يا أستاذة
عشان أنقل المحاضرة
وبعدين تروح طارش على الهامش
قصيدة عصماء
من نوعية الزميل محمد الفيومي
عينيك يا عينيك يا عين العنا
خديك يا خديك يا خد الخدا
وشكوت للقمر المضئ تلهفي
وسكبت من عين المعيد الادمعا.
وقعدت تحلم يومين بأنها هترد عليك
أو تبتسم لك
أو ترد عليك بقصيدة
تقول في مطلعها
دوس بنزين عالاول يا اسطى
لكن للأسف
تطلع البت عمشا
وما بتشوفش غير الكلام اللي على السطور
لكن اللي مش ممكن انك تكون زي حالاتي
أهبل ولا مؤاخذة
وعبيط بعيد عنك
وواخد الدنيا بالأحضان
وساعة ما يجي الحب يجي
على راحته ومزاجه
لغاية ما تطس يا حلو
ويؤتى الحذر من مأمنه
وتلاقي نفسك غرقان في شبر ميه
وبيتلعب بيك كرة شراب
ولا مؤاخذة
ويوم ترد على مكالماتك
وعشرة ولا معبره سعادتك
وتكتشف انك يا حلو اكتسبت صفات جديدة على حضرتك
هقولكم على اللي وصلني منه لغاية دلوقتي
1 – العبط حماكم الله
أكتشفت أني أصبحت عبيط وأهبل
– حماكم الله ورعاكم –
فتلاقيني مثلاً
ماسك صورتها اليتيمة اللي معايا
وعمال أكلمها وأشرحلها حالي
والغريب أنها بترد عليا
وبنقعد نضحك مع بعض
وساعات نبكي
وساعات نسكت
ونبص لبعض
ونرجع نتكلم تاني.
*******************
2- الذكاء والالمعية العالية
تسألك
انتا تعرف أنا طول الليل بعمل ايه؟
فيكون رد سعادتك
أكيد بتفكري فيا يا روحي
تتورد وجنتاها خجلاً
لتسألك لا بجد عرفت إزاي
انتي مش عارفة إني أقدر أقرا أفكارك
مع أنها طول الليل
- والعهدة على بتاع الرز -
نايمة في سريرها بتاكل رز مع الملايكة
***********************
3- البخل
لقيت نفسي وبقدرة قادر مقشف وبلم السحتوت
– وكل ما أفتكر أن جرام الدهب بقي بمية جنيه وأكتر
وأفتكر الشبكة والشقة والعفش والبيت الصغير والحلم والكبير –
أشد الحزام أكتر
مفيش سجاير
مع إني مش بشرب سجاير أصلاً
مفيش عصاير
ولا حاجة ساقعة
مفيش أكل في مطاعم
مفيش أكل لحم وفراخ
الاكتفاء بوجبة واحدة كل يومين
محاولة السنكحة على خلق الله
لو حد عزمك على أكل إعمل حساب أسبوع لقدام في بطنك.
**************************************
4 –البذخ الشديد
أيوه الله متستغربوش فتلاقيني كل ما أنزل سوق من الأسواق أو مول من المولات تحملني قدمي إلى قسم السيدات
– وقصدي شريف والله –
وأبتدي أشوف الهدوم
ياااه البنطلون ده شكله يهبل
هيكون حلو قوي عليها
– عارف أنها بتحب البنطلونات مع أن أمي لو عرفت هتطين عيشتي -
لا لا....... ولا الالطقم ده
على بعضه ملهوش حل
أكيد هتكون زي القمر فيه
بس تمنه غالي قوي
ميغلاش عليها
أنا بحب العطور
عشان كده تلاقيني واخد قسم العطور من أوله لأخرة
أجرب كل العينات المجانية
عشان أدور على أحلى حاجة ليها
صحيح وأنا خارج بيكون شكلي مش كويس أبداً
لأني بتكون طالعة مني كمية روايح حريمي ملهاش حل.
************************************
5 – مش عيب يا أستاذ
بسبب السطرين اللي فوق
بتعرض لمواقف سخيفة جداً
خصوصاً لما توصل لقسم الملابس الداخلية
أو لما تلاقي روحك قدام مكان البروفة بتاع الهدوم
أستحمل يا حلو البقين اللي هتاخدهم
ولا لا مؤاخذه
لما حد يفتكرك ولا مؤاخذه لا مؤاخذه
لا مؤاخذه يا جماعة يعني
*******************
6 – الجبن الشديد
المدير بتاعك يشتمك ويمرمط بكرامتك الارض
وتلاقي نفسك مبسوط
وساكت
وعمال تبتسم له
وده لسببين
الأول يا حضرات
عشان لو اتكلمت هيطير لك تلات ايام خصم زي ما حصل قبل كده وانت دلوقتي مش حملهم
خاصة أنها عايزة تشحن الموبايل قريب
وثانيا
وده الأهم بتعمل تدريبات على معاملة حماتك لو كانت منهم
لا قدر الله.
****************************************
7 – الشجاعة الشديدة
وانت معاها
تحس أنك أشجع راجل في الدنيا
دا أنا لوحدي أحارب أمريكا
وايه يعني لما أموت فدا عنين حبيبتي
تقولك خايفة يا حبيبي
فيكون رد السيادة
طول ما أنا معاكي مش عايز أسمع الكلمة دي منك
مع إنك في نفس اللحظة برضه خايف برضه من الحساب أخر القعدة الحلوة.
************************
تم النشر بعد أن أعلنت تمردي
وقمت بزيارة خاطفة
لأحد المطاعم الشهيرة
تناولت فيها وجبة غداء فاخرة
وحدي
والقدر
ورغيف العيش
دونها أبوشنب @ ٢:٠٩ م
18 Comments:
والله انت راجل دمك زي العسل
بس انت شكلك فعلا غرقان حالص
لا اجمد كده وخليك برنس
صحيح...انت مصري وقاعد في قطر؟؟؟
لا مؤاخذة...بعد ما كلفت نفسي وبصيت ع المدونة اكتشفت غباء سؤالي الاخير( هو انت مصري وقاعد في قطر؟) هههههه لا بجد سؤال غبي فعلا
أصلي اول مرة أدخل المدونة دي
فرصة سعيدة يا باشا
ايه يابوشنب الجمال ده
عجبني جدا بساطة اسلوبك في الجزء الاول بمراحل الحب المختلفة منذ سنوات العمر الأولى والتي اعتقد أنها مراحل إعداد للحب الحقيقي الذي لا يأتي إلا مرة واحدة يبدو انك تعيشه الآن ولا انكرك أن الغربة تزيد من إشتعاله ولهيبه
اولا : يا بختها ... صاحبة الاهداء
وبنرجوها ونتوسل اليها صدقيه ... والنبي صدقيه ده الراجل اتشحور عشانك
ثانيا : موضوع حلو قوى ... ادب ساخر من الدرجة الاولى ... فعلا شر البلية ما يضحك .... عموما يا شنب
ربنا يصبرك على ما بلاك ...
عينيك يا عينيك يا عين العنا
خديك يا خديك يا خد الخدا
وشكوت للقمر المضئ تلهفي
وسكبت من عين المعيد الادمعا.
:)))
إيه الفقر ده
مابطلتش ضحك من ساعة مادخلت.. ربنا يعوضك في الفلوس اللي ضاعت
أولاً الإهداء
والختام ما شفتهمش
حكم الشن يا ابنى
شانياً
إيه موضوع العواطف
هو انتو آل فندى عندكم قلوب زى الناس
هههههههههه
اللى عمرى ما سمعت حد بيتكلم عن العواطف
يا سيدى ربنا يهر حتة اللحمة اللى جوة صدرك من الحب يعنى
جميله اوي ... حلوه فعلا ..
الف مبروك الحب الحقيقي ( مش الحب ينفع برده يقولوه مبروك ؟) و قريبا نسمع اخبار عن الخطوبه .. تحياتي
Mohamed Mehrez
بس بجد عرفت ازاي اجابة السؤال
مع انهم كلهم فاكريني هندي
ههههههههههههه
Ahmed Shokeir
من ناحية تزيده
فمقولكش
أنا حاسس بيك
ربنا يصبرك ياعم أحمد
انتا راجع مصر امتى
ههههههههههه
Geronimo
أولا
ايوه وأنبي
وصوها عليه يا جماعة
والمرة الجاية هنزل تليفوتها عشان تكلموها
ثانياً
هية بلوة ربنا اللي يعلم بيها وحدة
شكرا على المواساة
Ghada
ربنا يعوض
هيه قالت لك ولا ايه
أبو أمل
الله يخرب بيت الكفرة يا شيخ
أنا مت من الضحك
هية الفكرة السودا دي لسة عندك
ربنا يخليلك أمل
وتشوفها تتحب وتتجوز
لها وحدها بس
يا بختها
فعلا دمك خفيف وكلامك جميل
يوميات عاشق مثالى
مساء العسل على العسل
ويا بختها بيك يا عمونا
وانا من منطلق المشاركة الوجدانية
بقولها معااااك
عبرووووووووووناااااا
واضح ان فاتورة المطعم كانت غالية جدا لدرجة انها بوظت أعصابك خالص
يلا ياعم فاتورة تفوت ولا حد يموت
بوست بسيط لكنه جميل وأسلوبه لذيذ
هلا حبيبي كيفك؟؟ بعد ام قريت البوست الاخير عرفت سر الاحساس بالغربة اللى عايش فيها. علشان اتحرمت من قعدتك, كلامك, ضحكتك, اشعارك, وقعدة المغربية لما كنت بترسم حكايات وترمي في امثال ومين يكتب ومين يفهم... وراح الولد ابو شنب وراحت حكايات البلد
ارجع البلد معدش فيها ولد
فينك يا عماد
يعنى مانشوفكش إلا عند الحبايب
احنا زرناك
عند بتاعة التفاح ان وعب باسط
وما لقيناكش
يسلك عليك الكنج عب باسط
ayhm jzzan
مش قوي يعني
بس ده موسم المباهاة عقبال عندك
hesterua
لأ مفيش
الناس بتصيف يا باشا
وانسى يا عمرو
ام المريله الكحلى
محدش والله مدلعني غيرك
وحتى إسألي
ده حته رسالة موبايل مفيش
جتنا نيله
voice of love
والألذ طعم الأكل هناك
bondok
فينك يا عم ده فيه عروسة ليك عندي
ابعت ميل
أبو أمل
عشان تعرفو أفضالنا عليكم يا بشر
آدي الكلام ولا بلاش... تسلم إيدك وفمك وقلبك يا أبو شنب
يا بختها يا عم.. وربنا ينولك اللي في بالك وتاكلوا الرز مع بعض سواء كان معمر أو مع الملايكة
((:
جوووول آآآآميييييييين يا وِلدَ العم
يا سلام هو في راجل بيحب يتسوق زي كده
:-)
المهم
ربنا ينولك مرادك -ويريح قلبك
امين
تحياتي
ياعم دا انت عملة نادرة في الزمن دة
كل اللي بتعملة بيقول كدة
باين عليك رومانسي قوي
انت لية ما كملتش مقولة الامام علي كرم اللة وجهة في البروفيل بتاعك
والا انت بس حبيت المقطع دة ، لازم تكتب الجملة كلها علشان تكون عادل
الفقر في الوطن غربة
والغني في الغربة وطن
إرسال تعليق
<< Home