الأربعاء، أكتوبر 24، 2007

ليه لأ - جمال مبارك


انا مش هقول ليه نعم



انا عايز اللي عنده اعتراض يقول لي ليه لأ



من غير حنجورية ولا شعارات



عايز اللي عنده اعتراض على جمال مبارك يقول ليه



بلاش نتأثر بحركات همبكية زي كفاية وغيرها



ولا للتوريث ولا مش عارف ايه



اذا كان الاعتراض لمجرد الاعتراض فاشرب من البحر



اذا كان عندكم اسباب نناقشها



للاسف البلد فيها مشاكل كتيير



والشباب اكتر حد بيتأثر بالمشاكل



وعمالين نطلع في مظاهرات عند سلم النقابة



وقدام النقابة



وجوه النقابة



وكل اللي واقف بيقول لا



او رافعة لوحة كاتب عليها لا



طيب



انا اعرف ان اي حد بيقول لا على شيئ



معناه انه عايز يقول نعم لحاجة تانيه



عمري ما شفت حد رافع لوحة بتقول نعم لاي حاجة



كل حياتنا بقت لا لأي حاجة



وكل ما اشوف حد في الشارع الاقيه يقول لأ



او كفاية



والاخرس الاقيه ماشي يهز دماغه يمين وشمال



وعلى رأي الاستاذ يوسف بن عن عباس الضو في المال والبنون



حضارة سبع تلاف سنة بتقول لأ



عم عباس الضو بيقول لأ



فريال فراويلة قالت لأ



وخلص الجزء الاول من المسلسل عليه وهو عمال يزعق ويقول لأ



طب محدش قال لأ ليه



عايزين اسباب وجيهة من غير شتيمة ولا قلة ادب



عايز اللي يرد يقول وجهة نظرة هو



مش وجهة نظر الاخوان المسلمين



او حركة كفاية



او ابراهيم عيسى



او عم عباس الضو



ايه وجه اعتراضك




التسميات:

13 Comments:

At الأربعاء, أكتوبر 24, 2007 12:30:00 م, Blogger بنوتة من وسط البلد said...

:)

تدوينة ظريفة

بس للاسف انت طلعت بتتكلم جد

الرفض ليس للرفض بدون اسباب يا سيدى
ولا حتى القبول والموافقة والتاييد يجي علشان الى نعرفه احسن من الى ما نعرفوش
او علشان شفولكوا بديل تتعرضوا بيه

هى دى السياسة ... اخبطوا راسكوا فى اتخن حيطة .. واعترضوا واشجبوا وتطلع ناس ولاد حلال يقولوا انتوا بتقولوا لا وخلاص .. فين البديل

طب اسالهم انت وحياة اغلى ما عندك .. فين البديل ... ده حتى عيب على دولة ليها ثقل وتاريخ وحضارة 500 تلاف سنة .. مايبقاش فيها بديل غير لمؤاخذة الننوس بعين جماله

يعنى ايه حكومة ودولة لا فيها كوادر ولا فيها قيادى ولا فيها اسم واحد بنفع نحطه جمب جمال مبارك .. امال كل البهوات والباشوات دول قاعدين فى مكاتبهم ومناصبهم بيعملوا ايه
غير تاميع البامية وتقشير البطاطس

ده اكبر دليل على فشل حكومتكم العظمى

وبعدين نرجع نسال مين الى خربها وقعد على قبرها

انا شخصيا اختار
شعبان عبد الرحيم

على الاقل قالها صريحة فى وش الدنيا
انا بكره اسرائيل

ويالا بالشفا ان شاء الله

تحيياتى
وانا مش بتكلم جد خااااااااااالص
ده انا غلبان يا بيه

 
At الأربعاء, أكتوبر 24, 2007 12:38:00 م, Blogger بنوتة من وسط البلد said...

نسيت حاجة كمان
لما قلنا احنا مش عارفين نختار

والحكومة المبجلة اختارتلنا هى البدلاء بمعرفتها فى المسرحية الكوميدية الى سمهوها انتخابات الرئاسة

جابولك شوية معاتيه بطراطير وقالك اختاروا

وبعديها على طول اديها شباب النيل

يا فرحتى بيهم

وحتى لو سنحت الفرضة لان اختار .. لن املك الاختيار

اعتذر جدا للاطالة

تحياتى

 
At الأربعاء, أكتوبر 24, 2007 3:04:00 م, Blogger hesterua said...

احب بس اصلحلك حاجة
يوسف مقالش فريال فراويلة

هو قال الدكتور امام بيقول لأ

 
At الخميس, أكتوبر 25, 2007 4:04:00 ص, Blogger أبوشنب said...

بنوتة من وسط البلد

شكرا للاطالة اولا

زي ما انتي قلتي

للاسف

مفيش حد بجد يصلح

من كل الناس اللي بتحكي عنهم دول

كان في حاجة زمان اسمها الاغوات او الخصيان ولا مؤاخذة

تشوفيهم حوالين الملك تفتكريهم رجالة

لكن مش كدة ابدا

والبدائل اللي ممكن هتيجي في المرحلة الجاية

كلها من عينة الاغوات ولابسين طراطير بترتر

علشان كدة نعم لجمال



hesterua

يعني داخل بصدرك علينا

وتحب وما تحبش

هو انت يعني تعرف يوسف اكتر مني

ايوه يا سيدي مقالش

جبت التايهه يا خي

ما هو عينتك دي هي الي خلتني اعلنها بصراحة

نعم جمال مبارك

 
At الخميس, أكتوبر 25, 2007 12:56:00 م, Blogger البدراوى said...

وجه اعتراضى يا وحش ان وصول جمال مبارك للحكم معناه ان مصر فيها 80 مليون حرمه واحسنلهم يروحوا يلبسوا طرح
بقى بزمتك انت مقتنع ان مصر بالـ 80 مليون بنى أدم مفيهومش واحد ينفع يحكمها غير ابن امه ده يا راجل ده حتى تبقى عيب
وعموما سؤالك المفروض يكون بالعكس ادينى انت ميزة واحدة فى جمال مبارك غير انه ابن حسنى وسوزان

 
At الخميس, أكتوبر 25, 2007 7:14:00 م, Blogger mariam said...

اولا انا اشكر انك طلبت حوار هادىء من غير قلة ادب
الغريبه انك طلبت مننا نقول ليه لأ رغم انك لم تقل ايه آه

ايه مؤهلات جمال مبارك انه يحكم مصر

مثلا عبد الناصر حكم مصر بعد الثوره بشرعية الثوره و بدأ حقبه جديده
ثم تولى السادات الحكم و هو ايضا احد رجال الثوره المحنكين
و حتى مبارك اللى بعترض عليه بشده مسك الحكم و هو طيار جوى و احد ابطال حرب اكتوبر
و كل واحد فيهم ممكن نتكلم عن تاريخه قبل الحكم
لكن جمال هنقول ايه؟
انه ابن الرئيس؟

طيب تعالى نتكلم عملى اكتر
جمال عمل ايه من ساعة ما بدأ فى امانة السياسات؟
انا عايزه اعرف انجازاته

شوف مثلا امثله لرجال لجنته
احمد عز مثلا محتكر الحديد
احمد نظيف من ساعة ما شكل الحكومه و كله فى النازل و الأسعار نار
رجال الوزارات المختلفه اللى واقفين محلك سر
الوحيد اللى كان يمكن ان نأمل منه خير
د. اسامه الغزالى حرب
و علشان كده استقال
لأنه قال انه اكتشف ان اللجنه دى خدعه

انا ضد جمال مبارك لأن الملكيه انتهت و الا كان ايه لازمة الثوره اللى وجعوا دماغنا بيها

لو كده توريث و كده توريث
يبقى الأولى ان الملك احمد فؤاد ابن الملك فاروق يمسك الحكم
على الأقل هو هيكون شرعى

و انا مش من الأخوان و مش مقتنعه بيهم
و مش من كفايه
و بختلف كتير مع ابراهيم عيسى

 
At الخميس, أكتوبر 25, 2007 11:14:00 م, Blogger بنوتة من وسط البلد said...

عزيزى
ولنفس لاسباب التى ذكرتها انا ايضا ارفض جمال مبارك

متصور شخص نشأ فى هذه البيئة هيحكمنا احنا واهالينا وعيالنا ازاى

لما يعرف انه مؤهل للحكم لمجرد انه ابن الرئيس,, هيعين ازاى رجال حكومته الى هيحكمونا ويتحكموا فى الى خلفونا

قول انت بقى ليه اه ؟؟

تحياتى

 
At الجمعة, أكتوبر 26, 2007 12:47:00 ص, Blogger coffee break said...

انا معاك فى موضوع آه لجمال مبارك
على الأقل إبن عز مش معفن و جعان و لو سرق هيسرق أقل من غيره

و بعدين عقلية تقدمية متعلم برة
غير لو الإخوان جم هنشوف ايام سودا

 
At الجمعة, أكتوبر 26, 2007 6:39:00 ص, Blogger أبوشنب said...

البدراوي

ليه بس كدة
طب جهز طرحتك من دلوقتي يا غالي

عموما مصر فيها رجالة كتير بتفهم

ومش شرط ان اللي يمسك الحكم يكون هو الافضل او الاكثر رجولة

بلاش ندخل ابو قرش في ابو قرشين



mariam

اول مؤهل ان جمال فعلا ملهوش تاريخ
وبكدة هتتخلص البلد من الحاكم صاحب اليد البيضاء على البلد

واللي يقعد كابس على نفسنا لأنه صاحب النعمة ولحم كتافنا من خيره

جمال كلنا عارفين سيرته الذاتيه
ومحدش هيجي في يوم يقول انه قيادة تاريخية وانه كان مع قطز في جهاد المغول

موضوع انجازات لجنة السياسات مش محل نقاش هنا بصراحة
وانا معرفش ايه يعني لجنة سياسات
واللي يعرف يكتمها في نفسه

موضوع احمد عز
هو يعني لو حد مسك البلد غير جمال
حديد التسليح هيتوزع في الجمعيات
انا مهندس مدني وعارف كويس ان اسعار الحديد في مصر مش خيالية ولا حاجة
هيا هيا الاسعار العالمية
اللي بتبيع بيها اغلب دول العالم

موضوع احمد فؤاد
والله هو لو جه وطلب كدة ساعتها نشوف الموضوع ده ونبتدي نتكلم فيه بجد



بنوتة من وسط البلد

والله انا مش متصور بالظبط الطريقة
لكن موضوع البيئة ده مش فاهم يعني ايه

وماله ابن الرئيس

ما ابن الدكتور بيطلع دكتور
وابن الطبال بيطلع طبال
وابن لعيب الكورة بيطلع لعيب كورة
وبنت الرقاصة بتطلع رقاصة
وابن القاضي بيطلع قاضي
وابن الشيخ بيربي دقنه
وابن الفقير بيطلع يشحت

جت عند ابن رئيس الجمهورية ووقفت
حرام الظلم
ده بالعكس
متوفره عنده خبرة كويسة
محدش يقدر ينكر تواجدة في الشارع السياسي وانه خبرة كمان

coffee break
ابن عز بجد مش تريقة
ده ابن الريس يا جماعة مش اي حاجة
وموضوع السرقة ده خلاص

الناس بقت عينها مفتحة قوي ومصحصحة
راحت ايامها
هو انت فاكر يعني جرايد المعارضة هتخليه يعرف ينام لو مسك الحكم

ولو قفلو جرايد المعارضة
المدونات والمواقع الالكترونية
الدنيا اتغيرت يا عم الحاج

لا تعليم بره
وملهوش علاقة بالعسكرية
ده تعليم مدني

 
At الجمعة, أكتوبر 26, 2007 10:59:00 م, Blogger mariam said...

يعنى هل بتتوقع ان جمال لو لا قدر الله مسك الحكم
مش هيمسكه الى الأبد
اعتقد ان الأجابه معروفه
و بعدين فى مقال لمحمد على ابراهيم بيقول ان مبارك هو صاحب انتصار اكتوبر
يعنى تزوير التاريخ سهل ممكن ينسبوا له اى انجاز ده مش مشكله

حضرتك بتقولى مش هتقيم لجنة السياسات
طيب ما ده الشغل بتاعه اقيمه منين يعنى
المفروض ده رجل سياسى و رئيس لجنه اشوف اداء لجنته و اقيمه
لكن اقيمه هو كشخص دى حاجه مش مهمه المهم شغله

حضرتك اكيد عارف ان احمد عز محتكر الحديد و فى قانون اسمه منع الأحتكار ليه مش بيطبق عليه؟

لو جمال لا قدر الله مسك الحكم هيبقى رئيس و لا ملك؟
و بعدين يعنى حضرتك شايف حال البلد بدل ما نفكر ازاى نتخلص من كل الموجودين نفكر نثبتهم

معلش انى طولت

 
At الأحد, أكتوبر 28, 2007 12:17:00 م, Blogger البدراوى said...

بالنسبة للطرح هاجهزها وهاعمل حسابك فى واحدة كمان ولا انت اكيد عامل حسابك صحيح
يعنى أيه ومش شرط ان اللي يمسك الحكم يكون هو الافضل او الاكثر رجولة امال يكون اكثر أيه
وحتى لو مش شرط يكون الاكثر أو الاكبر او الاعظم ولكن على الاقل بيكون بيتمتع من الحد المقبول من المميزات او الصفات التى تؤهله للمنصب ده
وبعدين يا ابو عمو مقلتش مين ابو قرش ومين ابوقرشين

 
At الثلاثاء, أكتوبر 30, 2007 12:32:00 ص, Blogger Ahmed Al-Sabbagh said...

تمت أضافة مدونتك لدليل الصباغ للمدونات

===============================

شاركنا الشعب الأمريكى أحزانه على ضحاياه فى ذكريات سبتمبر/أيلول الأليمة

لكن دعونا نُذّكر العالم بالجرائم الأمريكية التى أرتكبتها الولايات المتحدة ضد أبرياء وأطفال ومدنين

شارك وأدعم فكرة تخصيص يوم 30 أكتوبر يوما للجرائم الأمريكية


أحمد الصباغ

 
At الجمعة, مايو 01, 2009 2:00:00 م, Anonymous غير معرف said...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

 

إرسال تعليق

Links to this post:

إنشاء رابط

<< Home

اسمع