الأحد، نوفمبر ١١، ٢٠٠٧

يا انا يا علي جمعة

مسايرة للموضة اللي ماشية في البلد اليومين دول

بصراحة جاي اتكلم شوية عن المفتي بتاع الحكومة

اصل يا جماعة المفتي ده طلع بتاع الحكومة بس

ما هو اصله بياخد مرتبه من الحكومة

يبقى بتاع الحكومة

وكله كوم والفتوى بتاعة الشباب الغرقانه كوم وحده

يقولك الغرقانين دول مش شهدا

استغفر الله في سرك يا راجل ومتقلش لحد

انا خايف والله كمان تقول انه اللي ما يعجبوش حال البلد اليومين دول

ويقوم رامي نفسه في النيل

ولا يدلدل من رقبته بحبل في سقف الاوضة

ولا يشد نفس بانجو يكتم على نفسه يروح فيها

كل دول ما يبقوش شهدا

استغفر الله

امال يعني نعمل ايه فضيلتك بالظبط

افتنا
افتنا
افتنا

*********
الكلام اللي فات ده عينه من كلام كتيير قريته وسمعته

الكل بيلوم على الدكتور علي جمعة

اغلب اللي بيتكلمو عالم لاسعة

وشاربه الهوا في كوز مخروم

يعني الدكتور علي جمعة يا يقول كلام على مزاجهم

يايبقى مفتي الحكومة

يعني مثلا

كل واحد يقول رأيه في فتوى من فتاوى الراجل المحترم ده

ويعلق مشاكل البلد كلها في رقبته

يا جماعة

الراجل ده فقيه

عالم فقه

زي عالم فيزيا

او عالم رياضيات

وكل علم له قواعد واصول ونظريات

بيتم على اساسها استنباط النتائج

الفتوى عبارة عن مسألة رياضية

او معادلة كيميائية

معطيات

ونتائج

وظروف محيطة

بصراحة لو الدكتور علي جمعة افتى بأنهم شهدا

كنت هتلاقي نص شباب البلد واخدينها عوم لايطاليا

وان غرقت في السكة فأنا شهيد

الدكتور علي جمعة مش بعيد عن الشارع في مصر

ولو كان جرح متين اسرة مصرية بفتواه

فهو بيحمي عشرين مليون اسره من التهور

والدفع بأبنائهم في سكة اللي يروح ما يرجعش

احيانا العلاج بيكون طعمه مر

لكن لازم نتحمله

اللي يغرق وهو خارج بطرق غير شرعية

في مركب عارف تماما انها غير صالحة للملاحة

هتشيله من على بعد عشرين كيلو من السواحل المصرية

وهترميه على مسافة من السواحل الايطالية

ويكملها عوم

من مبدأ

"يا نعيش عيشة فل يا نموت احنا الكل

اكيد مش شهيد

وحرام نساويه بشهدائنا اللي ضحو عشان الدين والوطن

وبلاش العواطف تاخدنا

وكراهيتنا لظروف البلد تخلينا زي الشريك المخالف

تحية حب واعزاز وتقدير

للدكتور علي جمعة

الرجل العصري

والشيخ المجدد

*****************

اخيرا

من يجد في نفسه حاجة من طهارة بول وعرق وشعر النبي

فليراجع نفسه

حتى نقول له الان يا عمر

التسميات:

8 Comments:

At الاثنين, نوفمبر ١٢, ٢٠٠٧ ١:١٤:٠٠ م, Blogger Unknown said...

تسلم إيدك
فعلا الناس بقت عاملة زي الشريك المخالف منغير ما تفكر

 
At الاثنين, نوفمبر ١٢, ٢٠٠٧ ٦:٥١:٠٠ م, Blogger البدراوى said...

ياعمى فضيلة الشيخ على جمعه على عينى وراسي عالم ودكتور ومية فل لكن مسألة الناس اللى غرقوا دى بقى مينفعش نقول فيها انه بيجرح 200 اسرة علشان يحمى مليون للاتى
اولا الشيخ على جمعه تطوع بإبداء رأيه بدون ان يقوم احد بسؤاله وذلك فى ندوة فى جامعة القاهرة يعنى اصلا محدش سأله وقاله يا مولانا دول شهدا ولا هايروحوا نار جهنم علشان كده اعتقد انه كان المفترض ولو من باب الكياسة ومراعاة مشاعر الاسر المنكوبة فى أبنائها انه مكانش يعبر عن رأيه الشخصى (لانه مش فتوى )فى الوقت ده علشان الحكاية مش ناقصاه
وبعدين المفتى مسمعناش عن اى فتوى ليه قبل كده عن ضحايا العبارة ولاقطار الصعيد ولا حتى العساكر اللى ماتوا على الحدود اشمعنا دول يعنى

عموما انا مش بقلل من فضيلة المفتى لأنه فى موقع ومكان له تقدير عند كل مسلم مصرى لكن الرحمة حلوه علشان الناس مش مستحمله

 
At الخميس, نوفمبر ١٥, ٢٠٠٧ ١٢:٤٨:٠٠ ص, Anonymous غير معرف said...

بسم الله..
جزاك الله خير على تدوينتك.. فاللهم علمنا ما ينفعنا وارزقنا الفهم.
سؤال بسيط لمن ثارت ثائرتهم على العالم الجليل... هل سمعتموه بآذانكم يقول ما نسب اليه؟؟ فكم من عاصفة قامت ضده بسبب ما لم يقله!!! وإذا كان الكل يكذب.. فلم تستثنون "متعهدى تحريف الكلم عن مواضعه" من الصحفيين؟؟
مرة أخرى .. جزاك الله كل خير :)

 
At الخميس, نوفمبر ١٥, ٢٠٠٧ ١١:٢٣:٠٠ ص, Blogger MAKSOFA said...

بصراحة لو الدكتور علي جمعة افتى بأنهم شهدا

كنت هتلاقي نص شباب البلد واخدينها عوم لايطاليا

وان غرقت في السكة فأنا شهيد

الدكتور علي جمعة مش بعيد عن الشارع في مصر

ولو كان جرح متين اسرة مصرية بفتواه

فهو بيحمي عشرين مليون اسره من التهور

والدفع بأبنائهم في سكة اللي يروح ما يرجعش

احيانا العلاج بيكون طعمه مر

لكن لازم نتحمله

اللي يغرق وهو خارج بطرق غير شرعية

في مركب عارف تماما انها غير صالحة للملاحة

هتشيله من على بعد عشرين كيلو من السواحل المصرية

وهترميه على مسافة من السواحل الايطالية

ويكملها عوم

من مبدأ

"يا نعيش عيشة فل يا نموت احنا الكل

اكيد مش شهيد

وحرام نساويه بشهدائنا اللي ضحو عشان الدين والوطن

وبلاش العواطف تاخدنا

وكراهيتنا لظروف البلد تخلينا زي الشريك المخالف

تحية حب واعزاز وتقدير

للدكتور علي جمعة

الرجل العصري

والشيخ المجدد
-------------------------------------------------------------------------------- بصراحه دمك زي العسل وأنا موافقه علي كلامك والراجل قال لازم كل حاله تدرس علي حدا يعني موش الكل شهيد ،واحد رايح يشتغل حرامي هناك أو واحد رايح يشتغل في الدعاره والا واحد سارق أصلا الفلوس اللي مسافر بيها يبقي أزاي دول شهدا ، رغم أن أسلوبك ساخر وضحكت فعلا من قلبي الا أني بجد أحييك علي رأيك رغم أني موش مصدقه أن فيه حد قال كلام يختلف عن رأي المجموع وشتم في المفتي وحتي كتابتي لهذا التعلق حاسه أنك بتهزر -------------------------------أوعي تكون بتهزر ياأبو شنب ؟؟؟؟؟؟؟؟؟؟؟؟؟

 
At السبت, نوفمبر ١٧, ٢٠٠٧ ١٢:٣٣:٠٠ م, Blogger كلبوزة لكن سمباتيك said...

و هو ايه قيمة فتواه هو اللي حيحاسبهم؟ هم راحوا لخالقهم و هو اعلم بهم
يا خويا يعدل عمته و يتشملل و يفتي في النصابين اللي عايشين و ناهبين في ام البلد
الله انا اتعصبت ليه
لا حول و لا قوة الا بالله
امشي انا بقى
سلام

 
At الثلاثاء, نوفمبر ٢٠, ٢٠٠٧ ٨:٢١:٠٠ ص, Blogger شجره الدر said...

انا بحب الراجل ده
لا مش قصدى انت ياشنوبى انا قصدى على جمعه
حقيقى جرىء قوى ماعتقدتش ان فى مفتى تانى الناس جابت سيرته كتير كدا على اراه وافتائاته
ياجماعه فعلا ارحموا الرجل ده عالم دين مش بيبيع فتاوى على اول الشارع
شغال ياشنوبى شغال
وحشتنى انت فين من فتره مش بشوفك ابقى تعالى عازماك على شاى

 
At الجمعة, نوفمبر ٢٣, ٢٠٠٧ ٥:٢٥:٠٠ م, Blogger أحمد عبد الفتاح said...

بص يابشمهندس انا متفق معاك في نص الكلام ومختلف في النص
متفق لحاد موضوع ان الفتوي ذي الرياضة والفيزياء ويمكن لاني ازهري ولاني طالب بكلية العلوم قسم فيزياء فالوصف جه عالجرح
بس هختلف معاك في حاجه
علي جمعه بيناقض هذه القواعد الي بتحكي عنهايعني لما مجمع البحوث الاسلامية يقول ان فتواه غلط يبقي نصدق مين ؟
نصدق واحدالسلطة محلية حاجات كتير في ينية ولامجموعه من أهم علماء الاسلام ؟
علي جمعه اغفل حديث صحيح يسد عين الشمس بيقول ان الي مات غريق شهيد
وده مش اول مرة راجع فتواه العظيمة هتعرف انه بيطلع فتواي علي هوي الحكومة

 
At الأحد, نوفمبر ٢٥, ٢٠٠٧ ٣:٥٧:٠٠ م, Blogger أبوشنب said...

TAREK

الناس لازم تفكر
بس الجعان صعب انه يفكر
اسألني انا

البدراوي
الرحمة حلوة يا عم

MARMAD
جزاك الله خيرا

MAKSOFA

انا اهزر
انا اهزر
انتي ما تعرفيش مين ابو شنب
شيلي يديكي من على عنيكي
وبصي شوفي مين ابوشنب
قال اهزر قال

SAMPATEEK
طبعا ربنا اللي هيحاسبهم
ولا انتي افتكرتي علي جمعة معاه توكيل محاسبة
الفتوى دي حاجة تنظيمية
هو انتي فاكرة لما واحد بيتحكم عليه بالاعدام في الدنيا معنى كدة انه هيدخل النار في الاخرة
دي عمليات تنظيمية في الدنيا
وربنا اليه المصير في الاخرة

صحيح
انا خلاص عديت
مكسوفة وسمباتيك بيعلقو عندي
يا مرحبا يا مرحبا

شجرة الدر
ازيك ايتها المتفتحة الازهار
الوارفة الظلال
المتشابكة الاغصان
ضللتي علينا بطلتك
زودي السكر شوية عالشاي وبلاش بخل


احمد عبدالفتاح
هوى الحكومة على قلبي زي العسل
والشيخ علي جمعة يغفل اللي عايز يغفله بقى
عندك مانع
صباح الفل

 

إرسال تعليق

<< Home

اسمع