الأحد، نوفمبر 25، 2007

الشارع والشباك



كنت في مصر بتابع القنوات الاخبارية زيي زي غيري
الجزيرة ومن بعدها العربية وغيرها
طبعا الاعلام عندنا كان كل شوية والتانية بيقود حملة على القنوات دي خصوصا الجزيرة اللي كانت بتناقش قضايا مصر الداخلية بشكل مفصل بيوصل لدرجة خناقات الجيران على لعب العيال في الشارع
لغاية اما كتب لي القدر ان اشتغل في قطر وعلى بعد امتار من مقر الجزيرة
في الاول
اول ما جيت كنت محمل بالفكرة المسبقة عن النبي العربي المكون من تلات حروف ولو شلت منه نقطه يبقى اسم دولة عربية وكل الدعاية دي
لكن بعد شوية اكتشفت حاجات جديدة
انا ما بفهمش في السياسة قوي بصراحة ومبحبهاش
انا بتكلم عن البشر
اكتشفت ان الناس هنا مؤدبين بشكل عمري ما كنت اتخيله
لدرجة ان الواحد بيتكسف يتعامل معاهم
لانهم بصراحة احيانا بيحسسوك انك انت صاحب البلد وهمة ضيوف
ده اول اكتشاف
تاني حاجة كانت متابعتي لقناة الجزيرة والتلفزيون القطري والاختلاف الفظيع بينهم ده غير الهجوم اللي بيكون كل فترة والتانية في بعض الصحف على الجزيرة
واخيرا كان اكتشافي لنظرية الشارع والشباك
النظرية بمنتهى البساطة
دايما الناس في بيوتها بتتفرج على احداث الشارع من خلال الشباك
خناقة في الشارع
فرح في الشارع
تحرش جنسي في الشارع
معاكسة
مظاهرة
كل احداث الشارع
هنا ونتيجة الحر الشديد اغلب اوقات السنة
محدش بيفتح الشباك خالص
وغالبا برضه محدش من اهالي البلد بتلاقيه في الشارع
الشارع غالبيته مغتربين فلبيني هندي سيري لانكي
تشكيله من اجناس الارض
اهل لبلد غالبا ممكن بينزلو الشارع
او يفتحو الشباك عشان يتفرجو على الشارع لما بيكونو في اجازة في مصر
لانهم هنا حتى لو فتحو الشباك مفيش احداث تذكر بتحصل فيه
الشارع هنا بيمارس وظيفته الاوليه وهي انك تتحرك فيه من مكان لمكان
وغالبا جوه عربيتك المكيفه اللي برضه نادرا ما بتفتح شباكها الا لو وقفت قدام مطعم او محل عشان يجي العامل الهندي يوصلك طلباتك

وعشان كدة في خيالهم وعقيدتهم ان الشارع موجود في مصر
بمعنى اصح الشارع اللي ممكن يكون حيوي وحي وممكن تفتح الشباك وتتفرج منه على الاحداث موجود في مصر
علم المنطق بيقول
المصري عربي
السعودي عربي
القطري عربي
المصريين موجودين في الشارع في مصر
والسعوديين موجودين في الشارع في مصر
والقطريين موجودين في الشارع في مصر
العرب موجودين في الشارع في مصر
لو حصلت اي حادثة في الشارع في مصر معناها ان في عربي عمل حادثة ممكن يكون سعودي سوداني مصري وبكدة الاعلام العربي بيهتم
لو حصلت حادثة في السعودية او قطر او الكويت
مش شرط يكون فيه عربي عمل حادثة
بس اكيد فيه سيريلانكي او هندي او نيبالي عمل حادثة
وبكدة غالبا الاعلام العربي مش بيهتم بالحادثة لانها ولو جغرافيا حصلت في شارع عربي لكن حقيقة مش كدة
ده بالاضافة لحاجة تانية
اغلب المجتمعات هنا بتعتمد على القبلية والاتصال المباشر او التداول المباشر للخبر
يعني حاجة كدة زي لما حضرتك تكون في البيت وتحصل خناقة في الشارع
تقوم فاتح الشباك وتبتدي توصف الخناقة للناس جوه البيت
وغالبا بتلاقي كل الجيران فاتحين الشباك وبينقولو للي جوه البيت
لكن لو حصلت خناقة جوه البيت فمحدش بيطلع الشباك يبلغ الناس اللي في الشارع
وبتكتفي بأن اللي في البيت كلهم عرفو بطريقة مباشرة
وما بتفكرش ان الاشكال اللي حصل جوه البيت يهم حد في الشارع اصلا

هضرب مثال بسيط
حصلت حريقة في برجين من الابراج الضخمة هنا
ارتفاع البرج حوالي 50 دور في اقل تقدير وارتفعت السنة اللهب من اسفل البرجين وارتفعت لعنان السما
كنت ساعتها شغال تحت الابراج دي
البرجين دول كان كل الناس على اطراف العاصمة شايفاهم
وبكدة تحقق الاعلام المباشر بالروئية
والناس ابتدت تصور الحريق بالموبيلات وينقلوها لباقي معارفهم في المدن التانية
وبكدة تحقق الاعلام المباشر بالاخبار
لما رجع البيت فتحت قناة الجزيرة انا وكل زمايلي عشان نتفرج على نشرة الاخبار ونشوفهم هيقولو ايه عن الحريق
مكنش فيه اي اخبار عن الحريق بتاع الابراج الخمسين دور

ولكن كان فيه خبر تاني خالص

افتكر انه بالنسبه لنا
وبالنسبه لهم بالضرورة طالما انهم اذاعوه
هو الاهم
الخبر كان بيقول

انهيار منزل مكون من خمس طوابق بالاسكندرية شمال مصر

التسميات:

5 Comments:

At الأحد, نوفمبر 25, 2007 8:09:00 ص, Blogger MAKSOFA said...

وجه نظر ممكن تكون صح
---------------------
عموما اهل قطر فعلا طيبين

 
At الأحد, نوفمبر 25, 2007 1:10:00 م, Blogger Geronimo said...

انا مع مكسوفة
وجهة نظر ممكن تكون صح
وممكن تكون غلط
اصل مش لدرجة انهم ميهتموش بخبر حريق برج 50 دور
ويهتموا بوقوع بيت ف اسكندرية
....
انا هقولك حاجة حسيتها لما سافرت
مصر بلد من العيار التقيل وخاصة بالنسبة للاخوة العرب
يعنى في اي تجمع عربي او مؤتمر
هتلاقي كل حاجة من مصر
الهرم
والدوا
ومربى ادفينا
وشيكولاتة كوفرتينا
ام كلثوم
والشيخ امام
والسلام الوطني بتاعهم اللى ملحنه مصري في الغالب
وجمال عبد الناصر
وجامعة الدول العربية
وعادل إمام
حتى فيفي عبده من مصر
المدرسين
والنحل الشغال
والمحاسبين والدكاترة والمهندسين من مصر
الجو حلو في مصر شتا وصيف
وفي مسارح وكباريهات في شارع الهرم
وفي مؤتمرات وندوات وامسيات ثقافية في دار الاوبرا
في ابراج وعشش
في حياة م الآخر

والبلاد التانية قد ما عندهم فلوس وعربيات همر وافراح وأكل وأدب

معندهمش حياة
معندهمش اللمبي ... معندهمش توك توك
معندهمش ناس بتغرق في البحر قبل ما توصل لبر امان ... معندهمش ناس بقت تبات من غير عشا ... عشان رغيف العيش بقا بربع جنيه .... معندهمش حريم بتبيع نفسها عشان تعيش ... حتى اللى عندهم هتلاقيهم برضه من مصر او من بلد شبه مصر ...

جايز الناس دي عندها قنوات اعلامية
بس معندهمش خالص المادة الاعلامية اللى عند مصر

 
At الأحد, نوفمبر 25, 2007 7:36:00 م, Blogger حازم شلبى said...

ابو شنب العزيز ... مررت للتحية فوجدت بوستك الدسم حاولت الاقى رد طبعاً رد ايه " جيرينمو " ماخلتش حاجة ممكن اقولها جابت من الاخر يعنى .. عزيزى احنا عايشين مع العالم دى و عارفينهم اكتر من اى حد فلا داعى للكلام فنحن اكبر من هؤلاء الاقزام .

تحياتى يا زميل الغربة

 
At الجمعة, يناير 04, 2008 1:04:00 م, Blogger من القلب said...

انا اول مرة ازور مدونتك و قريت كتير و عجبنى اسلوبك فى تحليل روايتين الاسوانى و كمان ضحكت على موضوع ركوبك العربية من الباب التانى :)
بس بجد حبيت اعلق على كلامك ده لان الموضوع ده فكرت فيه كتير .. ليه العرب بتكرهنا وشايفنا متسولين و ليه احنا بنشتم فيه و بنقول عليهم اغبياء

انا شايفة اننا السبب فى ده .. لو بصيت للطبقات هنا فى مصر هتلاقى الشغالة اشطر من ست البيت و العامل اشطر من صاحب المصنع
و العامل و الشغالة شايفين الغنى غبى و هم الشطار و اصحاب العمل شايفين العامل رخيص و يشترى منه عشرة تانين

و كتير من الاغنياء بتبص للفقير و تحسده على ضحكته فى اخر اليوم بين اولاده بالرغم من شقاءه طول اليوم


ليه الاجنبى لما بيروح دولة عربية بيكون خبير و لما المصرى بيروح بيشتغل زى الحمير ؟؟

ليه لما بيزوزنا العرب فى مصر بنعاملهم احسن ما بنعامل اهل بلدنا ؟؟

ليه بنرمى بناتنا الصغيرين فى حضن زوج عجوز عربى و احنا عارفين انها ما هى الا خادمة الصبح و عاهرة بالليل ؟؟

احنا رخصنا نفسنا ليه بقى بنزعل لما الناس تقول علينا اننا ولا حاجة ؟

يارب نتعلم ازاى نصون كرامتنا حتى لو فقراء


تحياتى على مدونتك البسيطة المشوقة


اه صحيح اربد وجه يعنى احمر حمرة فيها سواد عند الغضب :)

 
At الجمعة, مايو 01, 2009 2:01:00 م, Anonymous غير معرف said...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

 

إرسال تعليق

Links to this post:

إنشاء رابط

<< Home

اسمع