الأربعاء، يناير 16، 2008

مدونات قديمة للبيع

لسه هبتدي انام
بحكم اني كائن ليلي طوال العام المنصرم
لقيت ابو ندى داخل يصبح عليا
ابو ندى ده عرفني بنفسه
تاجر مدونات
ايوا
بيشتري مدونات قديمة
الروبابكيا يعني
طب ايه المطلوب
قال ايه
عايز ياخد مني الباس وورد واليوزر نيم
ويديني بدل منه موقع على النت
ابوشنب دوت كوم
قال لي ان فيه 680مدون باعو خلاص
بصراحة العرض كان مغري
وعنيا زغللت
وكنت هنسحب من كي بوردي واضحي باعز ما املك
اللي همه باس ووردي ويوزر نايمي
بس بصراحة انا خفت اسيبهم
والجو اليومين دوول برد
وامشي زلبوط في الشارع
كانت هتبقى مشكلة والله
طلبت منه بيانات اكتر
قال لي انه في الاردن
ودي شركة جديدة
ليها فرع في امريكا
وفرع في الاردن
وهتشتغل من اول مارس
http://www.bloggersreview.com/
واللي فوق ده الموقع بتاعها
انا بصراحه الدم الصعيدي غللي في عروقي
وقلت لا يسلم التدوين من الاذى
حتى اعرف مين همه ال 680 اللي باعو
ام هند في الموضوع
انا قلت للراجل ان ليا شركا في المدونة
وان المدونة دي اتحاد ملاك
ومقدرش اعمل حاجة
ولا اتصرف فيها
غير بعد ما اشور اتحاد الملاك
اخيرا
شركاءي الاعزاء في المدونة
ايه رأيكم
نتمم البيعة
ولا عندكم رأي تاني
عيزين تبيعو قول بيع
بيع يا لطفي
قصدي يا ابوشنب
ابو ندى تليفوناته عندي
ايميله عندي
والوسطاء يمتنعون

******************************
تحديث
ده جزء من الحوار اللي تم بيني وبين ابوندا

ضاعت البيعة يا جدعااااااان

***********************

تاجر المدونات: مرحبا كيفك استاذي

تاجر المدونات: ؟

ابوشنب: عال والله

تاجر المدونات: تمام

ابوشنب: ايه الاخبار معك

تاجر المدونات: بس حبيت اسلم عليك

ابوشنب: الله يسلمك

تاجر المدونات: تمام الحمد لله

ابوشنب: العدد زاد؟

تاجر المدونات: الحمد لله

ابوشنب: ولا لسه ما فيش زباين

تاجر المدونات: لا الحمد لله ما هو مش بس انا بشتغل في معاي 5 شباب وصبايا بساعدوني

ابوشنب: ممتاز

استأذنك؟

تاجر المدونات: الله معاك

ابوشنب: ارقام الموبايل راحت مني

تاجر المدونات: اسف للازعاج

ابوشنب: ممكن تعيدها لي

تاجر المدونات: أكيد

تاجر المدونات: 00962xxxxxxxxx

تاجر المدونات: xxxxxxxx

تاجر المدونات: 00962xxxxxxxxx

ابوشنب: على فكرة انت بعد ما خرجت كان ليا صديق عرضت عليه الفكرة ورحب جدا

تاجر المدونات: ممتاز كتير

ابوشنب: بس هو كان بيقول مش ممكن يكون مقابلها مادي فلوس يعني

تاجر المدونات: مدونته قديمه

ابوشنب: هو مش عايز موقع بيقول انه زهق من النت

اها

تاجر المدونات: مدونته قديمة ؟

ابوشنب: من بداية 95

تاجر المدونات: والله

ابوشنب: ابريل 95

تاجر المدونات: ممكن عنوانها

ابوشنب: طب اعرف بس الاول هو ممكن ياخد مقابلها فلوس يعني

تاجر المدونات: حسب المدونة

ابوشنب: هو عموما البيانات بتاعتها معايا

تاجر المدونات: اذا كانت تستوفي الشروط اللي عنا

ابوشنب: وهو مفوضني لو حب يبيعها

ابوشنب: الشروط اللي هيه ايه؟؟

تاجر المدونات: اعطيني عنوانها خليا اشوفها بس

ابوشنب: ليه يعني هتعاينها ههههههههه

تاجر المدونات: ههههههههههه

ابوشنب: طيب لو انا حبيت ابيع مدونتي بمقابل مادي ينفع ولا لأ؟

تاجر المدونات: ينفع ونص

ابوشنب: يعني تجيب كام

تاجر المدونات: ايوه

ابوشنب: انا بدون من نوفمبر 95

تاجر المدونات: عمر المدونه واحد من الشروط مش كلها انت عايز كم فيها ؟

ابوشنب: والله انت تقول كام انا معرفش اقدر

تاجر المدونات: انا ما بدي احكيلك سعر أبخسلك فيها بعدين الله بحاسبني انت البائع احكي

ابوشنب: اديني راوند فيجر

تاجر المدونات: round figure?

ابوشنب: ايون

تاجر المدونات: aboshanab.blogspot.com

تاجر المدونات: مزبوط ؟

ابوشنب: ايوه

تاجر المدونات: ثواني

تاجر المدونات: انت صرت كاتب عني يا رجل

ابوشنب: اها

تاجر المدونات: ما شاء الله عليك

ابوشنب: انا قلت لك هسأل الشركا اللي معي ومنهم اللي ما اعرفش اتصل بيه

تاجر المدونات: بس الشركاء ما حدش منهم راضي

ابوشنب: فنزلت بوست عشان يقولو رأيهم

ابوشنب: لا دول اتنين بس اللي مش راضيين لسه ناس كتير هتقول بيع خاصة لو فيه فلوس

ابوشنب: اه

تاجر المدونات: اها

ابوشنب: تجيب كام معاك

تاجر المدونات: والله ما بقدر احكيلك سعر انت احكي

تاجر المدونات: على فكرة لحد الان ما في حد طلب منا فلوس الكل طلب عنوان على الانترنت وموقع

ابوشنب: اكيد مش مصريين ههههههههه

تاجر المدونات: عشان هيك انا متحير معاك على كل حال فكر بالموضوع وانا تحت أمرك

ابوشنب: عموما ادرس المدونة

تاجر المدونات: انت مش راح تخسر حاجه

ابوشنب: وشوفها تجيب كام

تاجر المدونات: انت راح تبتدي مدونه جديده

ابوشنب: وانا كمان ممكن اجيب لك حبايبي كتير

ابوشنب: اكيد

تاجر المدونات: وعنوان مدونتك الجديده راح على المدونه القديمة مدة سنه

ابوشنب: مدونة جديدة بشخصية جديدة وشكل جديد

تاجر المدونات: أكيد والتجديد بفيد ما بيضر

تاجر المدونات: اعطيني السعر اللي في بالك وانا تحت أمرك

تاجر المدونات: ومتل ما حكوها

ابوشنب: الواحد احيانا بيتسجن جوه القالب اللي عمله لنفسه

تاجر المدونات: بين الشاري والبايع يفتح الله

ابوشنب: المدونة اللي بتضحك لازم تضحك واللي بتتكلم في السياسة سياسه عايز اجدد

تاجر المدونات: مزبوط والله بس جدد بطريقه صح

ابوشنب: ولا مش عارف؟!

حاجة اول مرة تتمن بفلوس

ابوشنب: صح ازاي ليك وجهة نظر يعني؟

تاجر المدونات: ما فهمت عليك والله اسف

ابوشنب: اجدد بطريقه صح ازاي يعني؟؟

تاجر المدونات: فكر خليها ليك تفكر فيها

ابوشنب: هل لك رؤية

تاجر المدونات: لا والله

ابوشنب: طيب ايه عيوب المدونة الحالية

تاجر المدونات: ما فيها عيوب .......... العفو منك مش القصد

ابوشنب: لا والله انا ممكن اعمل مدون جديدة وبعد كام سنة ابيعها برضه لو جابت مقابل كويس فعايز حاجة تجيب تمن كويس ساعتها

تاجر المدونات: العملية مش بالسهوله اللي انتي متصورها انت كم زائر بيدخل على مدونتك يوميا

ابوشنب: لا قليل لأني ما ليش في الفرقعة

تاجر المدونات: يعني ؟

ابوشنب: اربعة خمسة بالكتير ومش كلهم بيسيبو تعليقات طبعا

تاجر المدونات: طيب هادا من أهم اللاشياء اللي بنزل سعر المدونه كمان. انت كم موضوع بتكتب يوميا ؟

ابوشنب: موضوع بالاسبوع بالشهر

تاجر المدونات: مممممممممممممم اها

تاجر المدونات: بتعرف تكتب انجليزي كويس ؟

ابوشنب: الحمد لله

تاجر المدونات: so u dont mind to let me write in english ... right ?

ابوشنب: ok

تاجر المدونات: great sir

first your blog is the minimal status to meet our standards

so

this offer will not be available in 48 hours

i am really sorry

if you are intrested

let me know as soon as possiple

possible؟؟

ابوشنب: ya

: but i don't speak about my blog only

: i have another

: and i have my close friends blogs also

: which have a very good numbers of reader

تاجر المدونات: aha

: what are the URLs

: ?

ابوشنب: like Shokir, Bonduk, Smsma

: and i can speak in their tongues

تاجر المدونات: great

: good

: listen my friend

: as i told you before .. we are a new company . and we are looking for good blogs

: so

: would you please tell me the price in your mind ?

: to tell you if we can continue or not

: i dont want to waste your time or my time

ابوشنب: ok for my blog 1000 buck

تاجر المدونات: 1000$

ابوشنب: ya

تاجر المدونات: ?

تاجر المدونات: oooh ok thank you for your time

: very much

: c u soon

ابوشنب: ok

تاجر المدونات: take care my friend

: bye

ابوشنب: bye

التسميات:

18 Comments:

At الأربعاء, يناير 16, 2008 11:18:00 ص, Blogger شـــــهــــروزة said...

دى الحدوتة بجد بقا

طب اية الفايدة؟
حتبقا البلوجات للبيع بعد كدة؟
ولا حيستولوا على المواد المنشورة فيها وتبقا ملكيتها اتنقلت لهم تلقائى بعد البيع؟

أمممممممممممممممممم

علامة استفهااام بحجم الهرم الأكبر

لو على رأيي فى البيع بما انى من اتحاد الملاك طشبعا يعنى

متبيعش
طالما اتعرض للشراء يبقا قيمته كبيرة اوى حتى لو محسيناش بيها
كفاية ان كل كلمة فيه او فى بلوجى على الأقل بعتبرها ابنى او بنتى
بنات أفكـــــــــارى
حد يبيع بناته يا راااجل؟

مش عارفة اوصللك مفهومى ازاى
لكن مش متخيلة ابدااا انى ابيع حاجة انا بنيتها من الأساس او زرعتها من البذرة وكبرت ادام عينى حبة حبة لحد ما بقت شجرة

انا مرتبطة ببلوجى ارتباط عاطفى فظيع على فكرة

تحياتى

 
At الأربعاء, يناير 16, 2008 11:46:00 ص, Blogger appy said...

لاااااااا نبيع ايه هو ينفع تعمل بيت صغير بجنينه حلوة وفى الشمس وتقعد كل يوم فيه وتتكلم مع اصحابك وتقولى تبيع لا طبعا مش هنبيع دى بيتنا وحياتنا وكلامنا واسرارنا لا مش هنبيع ينفع تفرط فى بلدك ازاى اكيد مينفعش فده زى ده

 
At الأربعاء, يناير 16, 2008 1:34:00 م, Blogger من القلب said...

غريبة اوى الحكاية دى
و هم هيستفدوا ايه انهم يشتروا المدونات
انا لو مكان مقدرش ابيع لان محدش هيعرف قيمة الكلام اللى فيها غيرى

اعتقد انك مش ناوى تبيع :)

 
At الأربعاء, يناير 16, 2008 2:16:00 م, Blogger A.SAMIR said...

انت بتتكلم بجد؟
حتى المدونات للبيع دلوقتي
يا نهار ابيض
على فكرة
خد بالك من هدومك
علشان بعد كدة هيبيعونا هدومنا
تحياتي

 
At الأربعاء, يناير 16, 2008 8:03:00 م, Blogger ra7eel said...

لالالالالالالالالالالالالالالالالالا

تبيع ايه ياراجل؟

اوعى تفرط فى ارضك يابو شنب

فضحيتك هتبقى بجلاجل فى البلد
ولا فضحيه عواد فى زمانه لما باع ارضه

ايه الهبل كل واحد حر فى مدونته ده متعة المدونات بجد ان كل مدونه ليها طابع شخصى معين لصاحبها
ازاى بقى يجمعوها وايه بقى المتعه لما ينشروها وخلاص؟

 
At الخميس, يناير 17, 2008 2:17:00 ص, Anonymous غير معرف said...

عفكرة انت نسيت تقولنا تمن المدونة كام وانا اعتقد ان التمن هو الفيصل يعنى لو بمليون جنيه مستحيل كنت تاخد راينا ولكن الظاهر ان السعر مش ولا بد عشان كده انت بتاخد راينا عموما انا راي تبيع وبعدين تعمل مدونة تانية وتسمى نفسك ابو دقن وكده حنعرفك وتبقى لا فقدت اصد قائك ولا حاجة مش كده ولا ايه

 
At الخميس, يناير 17, 2008 2:26:00 م, Blogger hesterua said...

انت جالك ابو ندا برضه
:)

على فكرة تفس الحوار والأشتغالات عملها معايا وعملتها معاه ...وكنت بكلمه بالفصحى كمان ..واقول له ويحك يا أبا ندا
:)

 
At الخميس, يناير 17, 2008 8:21:00 م, Blogger Desert cat said...

العنوان بتاع ابلوج فكرنى بعنوان
اعضاء للبيع
اوعى عقلك يروح بعيد والعياذ بالله لست انا هذه
انا قصدى مثلا كلاوى كبد زايدة دودية
فلو حضرتك ممكن تبيع من الاعضاء دى
اعتقد انك ممكن تبيع المدونة

 
At الجمعة, يناير 18, 2008 1:18:00 ص, Blogger Ragi said...

يا عم كنت اصبر عليه ودحلبه فى الكلام لغاية ما نعرف ايه هدفه
انت راجل طيب يا باشمهندس

 
At الجمعة, يناير 18, 2008 3:59:00 م, Blogger ابن حـجـر الـعـسـقـلانـى said...

بس ياأبو الأشناب هى فكرة غريبة و الله

طب كدة أنا ممكن اعمل مدونة و اعمل تلتميت أكونت على جوجل و ادخل اعلق على عشرين موضوع أكون عاملهم عليها و أروح رافع الفولت بتاع السعر .. و اشتغل يا و ابيع و اكسب و ابقى صاحب أملاك

 
At الأربعاء, يناير 23, 2008 6:40:00 م, Blogger tota said...

مدونتك فيها هدوء جميل اول مره ادخلها والاقيك بتناقش مشروع بيعها
المدونه عباره عن احاسيسك ولحظاتك ومشاعر جواك وذكريات بتشاركها مع غيرك كونك تبيعها يبقي بتبيع جزء من نفسك
سلامي ليك

 
At الخميس, يناير 24, 2008 6:45:00 ص, Blogger أبوشنب said...

لكل الناس اللي علقت على الموضوع

اشكركم على اراءكم الغالية

وفعلا كنتو عند حسن ظني بيكم

اشكركم كلكم

ولأحمد باشا ابو ندا

والله كان على عيني

بس انت شايف انا واحد من ضمن ناس كتير

يبقى الرأي للأغلبية

ومش هقدر ابيع

هارد لك

 
At الخميس, يناير 24, 2008 11:08:00 ص, Anonymous غير معرف said...

دلوقتى عوزين يشتروا المدونه وبعد شويه هيبقوا عوزين يشتروك شخصيا
هي ده الدنياااااااااا
يحيى الشناوي

 
At الجمعة, يناير 25, 2008 2:20:00 م, Blogger Bassma said...

الغريب يا ابو شنب انك بتناقش و عندك استعداد تسمع اراء .. مع اني اعرف عن الصعايدة ان دمهم يغلي فورا لو حد مسهم بكلمة او مس عندهم عزيز ...
ساعتها ما بيفكروش .. يقوماول ما يقولك تبيع تقولة اما اشور شركاتي ؟؟
يعني لو شركاتك قالولك بيع .. هتبيع يا ابو شنب ؟؟

 
At الاثنين, فبراير 18, 2008 9:44:00 ص, Blogger ana ga3an said...

غريبة نفس العرض دة اتعرض عليا
وكاتب عنة في المدونة عندي
بس كان التاجر واحدة
جايز هم حسو اني خلبوص و بتاع حريمات
قالك نبعتلة واحدة
بس محدش جابلي سيرة الفلوسسس

 
At الأحد, مارس 02, 2008 1:18:00 ص, Blogger karakib said...

جائني نفس العرض بشروط جيدة منذ ما يقارب الشهر و نصف
و رفضت تماما
و من نفس الشخص اللي اسمه ابو ندي و اداني نمرة تليفونه
لا اعرف ماذا سيفعلون بمدونة
اساسا
روبابيكيا

 
At الأحد, مارس 02, 2008 4:02:00 ص, Blogger ملك الكبدة said...

شوفلنا معاك بيعة يا برنس

 
At الجمعة, مايو 01, 2009 3:36:00 م, Anonymous غير معرف said...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

 

إرسال تعليق

Links to this post:

إنشاء رابط

<< Home

اسمع