السبت، أبريل ٢١، ٢٠٠٧

فرح للكل

من وانا صغير
وانا بدور على اني اكون سعيد
وانا عندي خمس سنين
كان سعادتي في اني اجيب كيس كاراتيه من الحجم الكبير لوحدي
وعيطت
لغاية ما امي ادتني عشر قروش
كان ساعتها مبلغ كبير
قبضت عليه بكل عزمي
ورحت عند دكان عم عيسى
وقلت له اديني كيس من الكبير
قالي مشاور ناسك
وكأني رايح اشتري قراط ارض
قلت له ايوه امي اللي مدياني العشر قروش
واخدت الكيس
وجري على البيت
كنت خايف عليه كأني شايل حلم بين يديا
ولما رحت البيت
لمست جوانب الكيس بيديا
وابتديت افتحه سنة بسنة
واخيرا
حبات الكراتية قدامي اخيرا
دار بخيالي كل الاعلانات بتاعة التليفزيون
ومع اول واحدة دابت في بقي
اكتشفت اني مش بحب طعم الكاراتيه
كان بطعم الجبنة الرومي المعفنة
كلت واحدتين تانيين
ومليش نفس اكمل
طلعت في الشارع
وفرقته للعيال
كانو مبسوطين بيه قوي
وبياكلوه بسعادة غريبة
على الرغم اني مكلتش منه حاجة خالص
الا اني كنت حاسس ان طعمه حلو
وكل واحد فيهم مادد يده بيقولي
اديني شوية تاني ياخي
مش انا صاحبك
فرقت الكيس كله
ومن ستر ربنا امي ما شافتنيش
والا كنت خدت علقة عشان الخساير اللي سببتها
***************
لما كبرت شوية
اتحرك معيار السعادة
من طعم العنب الاحمر عند عم اب الصاوي
الى طعم دولسيكا استيك من عند فتحي اب داوود
لقميص مشجر وبنطلون كروهات
كان موضه ساعتها
كان الواحد بيبقى فيه زي البلياتشو
لجزمة جلد
للبحث عن العدد الجديد من مجلة العربي الكويتيه
وقرايتها من الجلدة للجلدة
للفرجة على شوارع قنا بالليل
او الفرجة على الحريم العريانة في المجلات
للرغبة في السفر لمصر
والفرجة على شوارعها
وركوب المترو
اول مرة دخلت فيها سينما كانت سينما اوديون
(لغاية دلوقتي هيا المفضلة لدي كنوع من الحنين للذكريات الأولى)
اول مرة اشوف عرض مسرحي
كان في المسرح القومي
اول زيارة لسيدنا الحسين
كأي صعيدي بيعتبر ان زيارة القاهرة لا تكتمل الابه
وستنا السيدة زينب
ونفيسة العلم
واللي كانت زيارتها حدوتة لوحدها
اخويا وابن عمي كانو جايين لي من البلد
ليلة الخميس قالو لي
عايزين نصلي في السيدة نفيسة
قلت لهم من عنيا الاتنين
انا كنت بزحلقهم الصراحة
كنت تعبان جدا
المهم صحيت الجمعة الصبح
اشتريت اهرام الجمعة
وتالت صفحة
كانت صورة مسجد السيدة نفيسة واخدة نص الصفحة
قلت صلوات الله وبركاته عليكم آل البيت
دي علامة يعني
دعوة من ستنا عشان نزورها
قمت صحيتهم
لبسنا ونزلنا
استنينا الاتوبيس
مفيش اتوبيس بيروح السيدة نفيسة
ركبنا اول اتوبيس وقلنا نغير
الكمساري قلنا ممكن تركبه الاتوبيس ده
لغاية شارع بورسعيد
عند مديرية امن القاهرة
وبعدين ممكن نغير
او نتمشى نص ساعة
مش مشكلة
مفيش تلت ساعة
ولقيته بينادي علينا
الاستاذ اللي بيسأل عن السيدة نفيسة
ايوة يا اسطى
ادي الجامع ده اللي قدامك
انت مش قلت انه مش بيعدي من عند الجامع
ايوه يا استاذ
بس الاتوبيس فيه مشكلة في الفرامل
والسواق لف من هنا بسرعة عشان يرجع الورشة
دي مش طريقنا
اول مرة الاتوبيس يجي من هنا
كنت سعيد قوي
علشان همة كانو حاسين اني حققت لهم امنية
**************
اتغيرت اسباب السعادة
من نجاح بحققه في شغلي
لخطوة صح في حياتي
مكافأة او ترقية
او عقد جديد
وبعد كل حاجة بحققها
كنت بحس ان برضه مش السعادة
فيه حاجة اكبر
*********************
كانت متشعلقة بإيديا
كنت رايح معاها نشتري حاجات الفرح
ابتسامتها كانت ماليه وشها
وانا هطير من الفرحة
الفرح الاسبوع الجاي ان شاء الله
كنت سعيد بجد
بحق وحقيقي
أحلى حاجة انك تقدر تهدي الفرح للناس
يا رب
يارب

إهدي الفرح للكل

*****************

*الصورة بعدسة الفنان الاسباني - ستانلي بوكلا -عيون مصرية


التسميات:

الخميس، أبريل ١٢، ٢٠٠٧

راجع

راجعين يا هوى راجعين

اسمع