الخميس، نوفمبر 29، 2007

يعقوبيان - شيكاجو روايات الوجوه المربدة




من فترة وانا بقاوم نفسي اني اكتب عن روايات الاسواني
اخيرا انتهيت من شيكاجو وقبلها يعقوبيان
وبصراحة حتى الان لا اعلم سر هذا الدوي لكلا الروايتين
هبتدي اسرد الملاحظات بتاعتي
في كلا الروايتين هنلاحظ تعدد الشخصيات
وانه مفيش بطل حقيقي للرواية
حتى لو حبينا نوزن كل شخصية من حيث الاحداث
هنلاقي انهم تقريبا متساويين
مع فروق طفيفة
يعني البطولة الجماعية للرواية
وجعل البطل هو المبنى في يعقوبيان
والمدينة في شيكاجو
عشان كدة ما قدرتش اتوحد مع اي بطل من ابطال الرواية
وكانو كلهم بدءا من زكي الدسوقي – يعقوبيان
وصولا لطارق حسسيب – شيكاجو
بعاد عني بمسافة جعلتني لا اتعاطف مع اي منهم
ووقفت منهم وقف المتفرج فحسب
******
البطل الحقيقي للروايتين تقريبا كان الريس
ايوه
تقريبا الكلام عنه كان في الروايتين بشكل مكثف
والمشاهد بتاعته كانت محور في الرواية
وتقريبا كانت هيه نقطة التنوير
مع الحاج في يعقوبيان
ومع صلاح في شيكاجو
*********
اللغة في الروايتين ليست بالقوة اللي تجعل اي قارئ للرواية العربية
يقول ان ايا منهم قيمة حقيقة في الادب العربي
في كلا الروايتين مثلا
اربدت جميع الوجوه
اربد وجهه
اربد وجهها
واربد من الغضب
والشهوة
والسعادة
وكان نفسي حد يقولي ايه اربد دي مش لاقي
وكل ما اسئل واحد من اللي قرو الرواية ومعجبين بيها
اكتشف انه لا عارف معنى اربد
ولا لاحظ تكرارها في الروايتين
ده غير الفاظ زي
المربربتين والمكلبظتين
وكأننا تجار فراخ بيضة
*************
الروايتين كانو اقرب للسيناريو منهم للرواية
يعني هنلاحظ تكثيف الوصف الحركي للابطال
ولم ينقصهم عن السيناريو غير ترقيم المشاهد
وليل خارجي
ونهار داخلي
****************
على الرغم من كدة فيه مشاهد كانت واقعة بشدة
يعني تاخد صفر من عشرة
افتكر من شيكاجو دلوقتي
مشهد شيماء محمدي وهيا واقفة قدام مبنى الطلبة بعد الحريقة
وطارق بيسألها انت مصرية
بتقوله ايوه
يرد عليها يقولها انت هنا في شيكاجو مش في طنطا
مع انها ما قالتش انها من طنطا
ولا كانت شايلة في ايدها حمص وحلاوة
دي يا دوب بتقوله انها مصرية
********
تاني مشهد من شيكاجو
وده بصراحة اللي حسيته كوميدي
وقعدت اضحك عليه
مصور الرئيس لما بيطلب منه يتحرك يمين شوية
عشان بره الكادر
وبعدين الريس بص للسقف
علامة انه متضايق
(افتكرت الراجل التخين في فيلم المنسي لما كرم مطاوع كان بيقول انه لو بص في السقف يبقى متضايق)
طب بالعقل يا جماعة
لو هنتصور مع الرئيس
او المدير
او الوزير
او اي حد مهم
معقول هنخليه واقف على جنب يعني
اكيد هيقف في النص
واحنا حواليه
طب ازاي هيكون بره الكادر
حد يفهمني طيب
عموما واضح ان العلاقات الجميلة
والود الصافي بين الاسواني وسيادة الريس
هيا اللي وقعت له المشهد ده
*************
حد هيقولي بس الرواية نجحت نجاح مبهر
انا في رأئيي ان الرواية نجحت بسبب حالة الانحدار العام في المستوى اللي في البلد
يعني لو جرنان طلع يشتم في الريس والحكومة
الناس كلها بتقول ادي الكلام
ادي الصحافة
ادي الجرأة
دون النظر لحقيقة الكلام الوارد
نفس الحال بالنسبة للرواية
اللي اكتسبت نجاحها من حالة الاحتقان اللي في البلد بحالها
****************
تاني نقطة في نجاح الرواية
هو قراء الرواية في حد ذاتهم
يعني غالبية قراء الرواية
هما الجيل اللي اتربى على رجل المستحيل
والشياطين ال13
والعميل رقم صفر
والمغامرون الخمسه
الحدوته الشيقة جدا
واللي تخليك تمسك الواحدة منهم وما تقومش غير لما تخلصها
نفس الجيل ده كبر شوية
والحاج نبيل فاروق ربنا يدي له الصحة
الجيل ده بقى هو نفسه اللي لقى في الروايتين نفس طعم رجل المستحيل
بس على مقاس رجالي
*************
اراهن اي حد بيقرا الكلام ده
يقول لي انه قرا الرواية على اكتر من مره
يعني كان يقرا فصل فصل
غالبا كل اللي عرفتهم اجمعو على انهم خلصو الرواية في قعدة واحدة
واراهن اي حد تاني يقول لي انه قرا الرواية مرتين على بعض
عشان حس فيها بمعنى او قيمة حب يأكد عليها
واللي يكسب الرهان له عندي جايزة سمينة
**************
المشاهد الجنسية اللي في الروايتين كانو فوق العادة
مفيش واحدة مثلا في شيكاجو دخلت من باب الرواية
الا وطلعت وهيا متظبطة بصراحة
انا هنا مش بعترض ان الادب يتعرض للجنس
عادي ده محرك قوي لحياة الانسان
والقرآن الكريم جاءت فيه سورة يوسف
وكان الجنس موجود بقوة في احداث القصص الكريم
ولكن انا بتكلم عن التفصيل الدقيق لكثير من المشاهد
ده باولو كوهيليو كان ارحم في احداشر دقيقة
وكان الجنس عنده هو اساس الرواية
وحتى مشاهد المتعة كانت لها فلسفة قوية جدا
اما هنا
فالليلة ضلمة بصراحة
**********
في النهاية
ده بعض من كل
واحب احيي الدكتور علاء الاسواني على الروايتين
ومنتظر الرواية اللي جاية
وادينا بتنسلى
********
اعلم ان البعض اربدت وجوههم اثناء القراءة
لذا لا بأس بقليل من المسقعة الاسكندراني من يد الدكتورة شيماء
حتى تتوهج فيهم نار الشهوة
وانزل باعلان بلدنا بتتقدم بينا يا عباس

التسميات:

الثلاثاء، نوفمبر 27، 2007

تالتة/اول

Align Center
من سنتين بالتمام والكمال
كنت قاعد عاطل بعيد عنكم في البيت
مفيش لا شغلة ولا مشغلة
محبط بشكل ما اتعرضتش له قبل كدة
وانا بقلب في النت لقيت قصة او موضوع
مفهمتش ولا استوعبتش الشكل من اول لحظة
كان في مدونة مع نفسي
ومنها
ابتديت ادخل في مدونة
اطلع من مدونة
كان ايامها الواحد يقدر يقرا المدونات كلها في وقت قصير
قبل ما الدنيا تتزحم
وشوية شوية
عرفت اعمل مدونة خاصة بيا
في لحظات الاحباط دي
كان اول كلمة قدرت اكتبها
وحسيت بيها اول ما بقى لي مدونة
أخيراُ أقدر أعلى صوتي وأصرخ (أنا حــــــــــــــــــــــــــــــــــررررررر)
ومنها ابتديت ادون اودون
لغاية اللحظة دي
58 بوست
حوالي 450تعليق
400 بس لو شلنا منهم ردودي والتعليقات الدعائية
عدد لا بئس به من الاصدقاء من خلال المدونة
احمد شقير
احمد شلبي
البراء اشرف
وقدر واسع من الحرية
التدوينة الاشهر كانت
المحطة الاخيرة لعم حسن
وده عشان عم حسن
مش عشاني
كان بيقولي
زمان الناس كانت تقول فلان بيعرف يقرا ويكتب
على اللي بيفك الخط
دلوقتي
اللي بيكتب هو الكاتب اللي بيعمل كتاب
او يكتب في جرنان
والغريبة ان البوست بتاعه
اختارته جريدة الدستور
عشان ينزل في احد اعدادها
اللي انا ما شفتوش عشان كنت بره مصر
ساعات كتير كنت بكسل اكتب حاجة
بس عمري ما فكرت انزل بوست اقول فيه اني هقفل المدونة
قال يعني هيكل
التدوين عندي ابسط
دي حالة مزاجية
نوع من المتعة
اللي ما عدناش نلاقيها في حاجات كتير حوالينا
رقص مع الروح
في ساحة من الخيال
اكتب
حتى استنزفني لأخر حرف
وبعدها
استقبل الدنيا
***************
اليوم
هو تالته اول بالنسبة لي
اول يوم في السنة التالتة تدوين
بدأت الكتابة
ب
أخيراُ أقدر أعلى صوتي وأصرخ (أنا حــــــــــــــــــــــــــــــــــررررررر)0
ومازلت


التسميات:

الأحد، نوفمبر 25، 2007

الشارع والشباك



كنت في مصر بتابع القنوات الاخبارية زيي زي غيري
الجزيرة ومن بعدها العربية وغيرها
طبعا الاعلام عندنا كان كل شوية والتانية بيقود حملة على القنوات دي خصوصا الجزيرة اللي كانت بتناقش قضايا مصر الداخلية بشكل مفصل بيوصل لدرجة خناقات الجيران على لعب العيال في الشارع
لغاية اما كتب لي القدر ان اشتغل في قطر وعلى بعد امتار من مقر الجزيرة
في الاول
اول ما جيت كنت محمل بالفكرة المسبقة عن النبي العربي المكون من تلات حروف ولو شلت منه نقطه يبقى اسم دولة عربية وكل الدعاية دي
لكن بعد شوية اكتشفت حاجات جديدة
انا ما بفهمش في السياسة قوي بصراحة ومبحبهاش
انا بتكلم عن البشر
اكتشفت ان الناس هنا مؤدبين بشكل عمري ما كنت اتخيله
لدرجة ان الواحد بيتكسف يتعامل معاهم
لانهم بصراحة احيانا بيحسسوك انك انت صاحب البلد وهمة ضيوف
ده اول اكتشاف
تاني حاجة كانت متابعتي لقناة الجزيرة والتلفزيون القطري والاختلاف الفظيع بينهم ده غير الهجوم اللي بيكون كل فترة والتانية في بعض الصحف على الجزيرة
واخيرا كان اكتشافي لنظرية الشارع والشباك
النظرية بمنتهى البساطة
دايما الناس في بيوتها بتتفرج على احداث الشارع من خلال الشباك
خناقة في الشارع
فرح في الشارع
تحرش جنسي في الشارع
معاكسة
مظاهرة
كل احداث الشارع
هنا ونتيجة الحر الشديد اغلب اوقات السنة
محدش بيفتح الشباك خالص
وغالبا برضه محدش من اهالي البلد بتلاقيه في الشارع
الشارع غالبيته مغتربين فلبيني هندي سيري لانكي
تشكيله من اجناس الارض
اهل لبلد غالبا ممكن بينزلو الشارع
او يفتحو الشباك عشان يتفرجو على الشارع لما بيكونو في اجازة في مصر
لانهم هنا حتى لو فتحو الشباك مفيش احداث تذكر بتحصل فيه
الشارع هنا بيمارس وظيفته الاوليه وهي انك تتحرك فيه من مكان لمكان
وغالبا جوه عربيتك المكيفه اللي برضه نادرا ما بتفتح شباكها الا لو وقفت قدام مطعم او محل عشان يجي العامل الهندي يوصلك طلباتك

وعشان كدة في خيالهم وعقيدتهم ان الشارع موجود في مصر
بمعنى اصح الشارع اللي ممكن يكون حيوي وحي وممكن تفتح الشباك وتتفرج منه على الاحداث موجود في مصر
علم المنطق بيقول
المصري عربي
السعودي عربي
القطري عربي
المصريين موجودين في الشارع في مصر
والسعوديين موجودين في الشارع في مصر
والقطريين موجودين في الشارع في مصر
العرب موجودين في الشارع في مصر
لو حصلت اي حادثة في الشارع في مصر معناها ان في عربي عمل حادثة ممكن يكون سعودي سوداني مصري وبكدة الاعلام العربي بيهتم
لو حصلت حادثة في السعودية او قطر او الكويت
مش شرط يكون فيه عربي عمل حادثة
بس اكيد فيه سيريلانكي او هندي او نيبالي عمل حادثة
وبكدة غالبا الاعلام العربي مش بيهتم بالحادثة لانها ولو جغرافيا حصلت في شارع عربي لكن حقيقة مش كدة
ده بالاضافة لحاجة تانية
اغلب المجتمعات هنا بتعتمد على القبلية والاتصال المباشر او التداول المباشر للخبر
يعني حاجة كدة زي لما حضرتك تكون في البيت وتحصل خناقة في الشارع
تقوم فاتح الشباك وتبتدي توصف الخناقة للناس جوه البيت
وغالبا بتلاقي كل الجيران فاتحين الشباك وبينقولو للي جوه البيت
لكن لو حصلت خناقة جوه البيت فمحدش بيطلع الشباك يبلغ الناس اللي في الشارع
وبتكتفي بأن اللي في البيت كلهم عرفو بطريقة مباشرة
وما بتفكرش ان الاشكال اللي حصل جوه البيت يهم حد في الشارع اصلا

هضرب مثال بسيط
حصلت حريقة في برجين من الابراج الضخمة هنا
ارتفاع البرج حوالي 50 دور في اقل تقدير وارتفعت السنة اللهب من اسفل البرجين وارتفعت لعنان السما
كنت ساعتها شغال تحت الابراج دي
البرجين دول كان كل الناس على اطراف العاصمة شايفاهم
وبكدة تحقق الاعلام المباشر بالروئية
والناس ابتدت تصور الحريق بالموبيلات وينقلوها لباقي معارفهم في المدن التانية
وبكدة تحقق الاعلام المباشر بالاخبار
لما رجع البيت فتحت قناة الجزيرة انا وكل زمايلي عشان نتفرج على نشرة الاخبار ونشوفهم هيقولو ايه عن الحريق
مكنش فيه اي اخبار عن الحريق بتاع الابراج الخمسين دور

ولكن كان فيه خبر تاني خالص

افتكر انه بالنسبه لنا
وبالنسبه لهم بالضرورة طالما انهم اذاعوه
هو الاهم
الخبر كان بيقول

انهيار منزل مكون من خمس طوابق بالاسكندرية شمال مصر

التسميات:

الأحد، نوفمبر 11، 2007

يا انا يا علي جمعة

مسايرة للموضة اللي ماشية في البلد اليومين دول

بصراحة جاي اتكلم شوية عن المفتي بتاع الحكومة

اصل يا جماعة المفتي ده طلع بتاع الحكومة بس

ما هو اصله بياخد مرتبه من الحكومة

يبقى بتاع الحكومة

وكله كوم والفتوى بتاعة الشباب الغرقانه كوم وحده

يقولك الغرقانين دول مش شهدا

استغفر الله في سرك يا راجل ومتقلش لحد

انا خايف والله كمان تقول انه اللي ما يعجبوش حال البلد اليومين دول

ويقوم رامي نفسه في النيل

ولا يدلدل من رقبته بحبل في سقف الاوضة

ولا يشد نفس بانجو يكتم على نفسه يروح فيها

كل دول ما يبقوش شهدا

استغفر الله

امال يعني نعمل ايه فضيلتك بالظبط

افتنا
افتنا
افتنا

*********
الكلام اللي فات ده عينه من كلام كتيير قريته وسمعته

الكل بيلوم على الدكتور علي جمعة

اغلب اللي بيتكلمو عالم لاسعة

وشاربه الهوا في كوز مخروم

يعني الدكتور علي جمعة يا يقول كلام على مزاجهم

يايبقى مفتي الحكومة

يعني مثلا

كل واحد يقول رأيه في فتوى من فتاوى الراجل المحترم ده

ويعلق مشاكل البلد كلها في رقبته

يا جماعة

الراجل ده فقيه

عالم فقه

زي عالم فيزيا

او عالم رياضيات

وكل علم له قواعد واصول ونظريات

بيتم على اساسها استنباط النتائج

الفتوى عبارة عن مسألة رياضية

او معادلة كيميائية

معطيات

ونتائج

وظروف محيطة

بصراحة لو الدكتور علي جمعة افتى بأنهم شهدا

كنت هتلاقي نص شباب البلد واخدينها عوم لايطاليا

وان غرقت في السكة فأنا شهيد

الدكتور علي جمعة مش بعيد عن الشارع في مصر

ولو كان جرح متين اسرة مصرية بفتواه

فهو بيحمي عشرين مليون اسره من التهور

والدفع بأبنائهم في سكة اللي يروح ما يرجعش

احيانا العلاج بيكون طعمه مر

لكن لازم نتحمله

اللي يغرق وهو خارج بطرق غير شرعية

في مركب عارف تماما انها غير صالحة للملاحة

هتشيله من على بعد عشرين كيلو من السواحل المصرية

وهترميه على مسافة من السواحل الايطالية

ويكملها عوم

من مبدأ

"يا نعيش عيشة فل يا نموت احنا الكل

اكيد مش شهيد

وحرام نساويه بشهدائنا اللي ضحو عشان الدين والوطن

وبلاش العواطف تاخدنا

وكراهيتنا لظروف البلد تخلينا زي الشريك المخالف

تحية حب واعزاز وتقدير

للدكتور علي جمعة

الرجل العصري

والشيخ المجدد

*****************

اخيرا

من يجد في نفسه حاجة من طهارة بول وعرق وشعر النبي

فليراجع نفسه

حتى نقول له الان يا عمر

التسميات:

الأحد، نوفمبر 04، 2007

أستاذ جمعة

في صيف سنة 1989 ميلادية

اتجمع عدد من شباب البلد عندنا

واتفقو انهم يستغلو فترة الصيف في شيئ مفيد ليهم ولبلدهم

تم افتتاح فصول تقوية لطلبة المرحلة الاعدادية

ساعتها كنت مخلص خامسة ابتدائي وطالع اولى اعدادي

كان الشباب دول او المدرسين بتوعنا همه شباب البلد اللي سبقونا في مراحل التعليم

انا لما وصلت مرحلة الجامعة اشتركت في التدريس برضه

الشباب اللي درسونا وقتها

وعلى الرغم من ان سننا متقارب حاليا

لكن اتعودت اني اناديهم بأستاذ فلان

وصعب قوي اناديهم باسمهم حاف كدة

استاذ رمضان حمدالله واستاذ حمدي عبجليل واستاذ جمعة اسعد

استاذ جمعة يمكن له الفضل اني اكون مهندس بعد ربنا سبحانه وتعالى

كان بيدرس لنا رياضة اولى اعدادي

كنت كويس في الحساب في الابتدائي

لكن هو كان بيقولي لو اي حاجة مش فاهمها اروح له البيت

او كنت اروح له الحرجة - الارض- وكنا نقعد تحت النخلة بتاعتهم

من بعد العصر لغاية ادان المغرب

لغاية دلوقتي فاكر اشكال فن

والمجموعات

والاعداد الطبيعية

لما دخلت اولى اعدادي كنت مخلص منهج الرياضة كله

وايه

كما انزل

فاكر في مرة مدرس المدرسة كان تعبان خلاني اشرح للفصل بدل منه

بعدها اتعودت اني اكون اشطر واحد في الرياضة في الفصل

لغاية ثانوية عامة اللي ما اخدتش فيها اي دروس بتاتا

ونقصت نص درجة بس على النهائية في الرياضة

طول ما كنت اشوف استاذ جمعة لازم كنت اروح اسلم عليه

ازيك يا استاذ جمعة

هو ما يعرفش اكيد اني متذكر فضله علاي من اولى اعدادي

ممكن يكون هو نسي

بس انا عمري ما نسيت

انه من اصحاب الفضل علي

وانا شغال في القاهرة

عرفت ان الاستاذ جمعة جه من البلد

كان تعبان ورايح للدكاترة في مصر

خلصت شغلي وطلعت على امبابه

سلمت عليه

والف سلامة عليك

قال لي انه رايح بكرة للدكتور ومسافر بعدها

ملحقتش احكي معاه

كان الوقت متأخر وعايز يقوم ينام

لما رجعت البلد بعدها قابلته مرة واحدة عند دكان حريز

ازيك يا استاذ جمعة

صحتك اخبارها ايه

كان شكله تعبان قوي ساعتها

السنة اللي فاتت

كنت بكلم البيت على النت

اخبار البلد ايه

قالو لي الاستاذ جمعة مات

انا لله وانا اليه راجعون

مات في المستشفى في اسيوط

انهاردة افتكرته

وقريت له الفاتحة

يا ريت تقرو له الفاتحة معايا

وعايزكم تعرفو

انه من اصحاب الفضل علي

التسميات:

اسمع